Mokanda ya mibale ya Ntango 4:1-22
4 Na nsima, asalaki etumbelo ya kwivre.+ Bolai na yango ezalaki mapeko 20, bonene na yango mapeko 20 mpe banda na nse tii likoló ezalaki mapeko 10.
2 Asalaki Ebombelo monene ya mai*+ na ebende oyo enyangwisami. Ezalaki lokola nzungu, mpe monɔkɔ na yango banda ngámbo tii ngámbo ezalaki mapeko 10, banda na nse tii likoló ezalaki mapeko 5, mpe esɛngaki nsinga ya mapeko 30 mpo na kozinga yango.+
3 Zingazinga na nse ya monɔkɔ ya Ebombelo monene ya mai* ezalaki na milɔngɔ mibale ya mayemi ya milona ya mbika,+ mayemi zomi mpo na lipeko moko. Banyangwisaki ebende ya kwivre mpe basalaki ebombelo ná mayemi yango nzela moko.
4 Ebombelo yango efandaki likoló ya bangɔmbɛ-mibali 12 ya kwivre.+ Ngɔmbɛ 3 etali na nɔrdi, 3 etali na wɛsti, 3 etali na sudi, mpe 3 etali na ɛsti; Ebombelo monene ya mai efandaki likoló na yango, mpe bansima ya bangɔmbɛ yango etalaki na katikati.
5 Mpe bonene ya ebende na yango ezalaki tandu moko;* monɔkɔ na yango esalemaki lokola monɔkɔ ya kɔpɔ, lokola fololo lísi. Ebombelo yango ekokaki kokɔta bati* 3 000.
6 Lisusu, asalaki basaani minene zomi ya mai mpe atyaki mitano na lobɔkɔ ya mobali, mitano na lobɔkɔ ya mwasi.+ Na kati ya basaani yango, bazalaki kosukola biloko oyo basaleli mpo na makabo ya kotumba.+ Kasi ebombelo ya mai ezalaki kosalisa banganga-nzambe mpo na kosukola.+
7 Na nsima asalaki bitɛlɛmiselo ya miinda zomi ya wolo,+ kaka ndenge esɛngamaki;+ atyaki yango na tempelo, mitano na lobɔkɔ ya mobali, mitano na lobɔkɔ ya mwasi.+
8 Asalaki mpe mesa zomi mpe atyaki yango na tempelo, mitano na lobɔkɔ ya mobali, mitano na lobɔkɔ ya mwasi;+ mpe asalaki mabakuli 100 ya wolo.
9 Na nsima asalaki lopango+ ya banganga-nzambe+ mpe lopango monene+ ná baporte ya lopango yango, mpe azipaki baporte na yango na kwivre.
10 Mpe atyaki Ebombelo monene ya mai* na ngámbo ya lobɔkɔ ya mobali, na sudi-ɛsti.+
11 Hirame asalaki mpe basaani mpo na putulu ya mɔtɔ, bapau, mpe mabakuli.+
Na bongo Hirame asilisaki mosala oyo Mokonzi Salomo asɛngaki ye asala mpo na ndako ya Nzambe ya solo.+ Talá biloko oyo asalaki:
12 makonzí mibale+ mpe mitó oyo basalá lokola kibakuli oyo ezalaki na nsɔngɛ ya makonzí yango mibale; minyama mibale+ mpo na kozipa mitó yango mibale oyo basalá lokola kibakuli, oyo ezalaki na nsɔngɛ ya makonzí;
13 mpe mbuma 400 ya nzete ya grenade+ mpo na minyama mibale, milɔngɔ mibale ya mbuma ya nzete ya grenade mpo na monyama mokomoko, mpo na kozipa mitó mibale oyo basalá lokola kibakuli oyo ezalaki likoló ya makonzí yango;+
14 bashario zomi ná basaani minene zomi likoló ya bashario yango;+
15 Ebombelo monene ya mai ná bangɔmbɛ 12 oyo ezalaki na nse na yango;+
16 basaani mpo na putulu ya mɔtɔ, bapau, nkanya,+ mpe bisaleli na yango nyonso oyo Hirame-abive+ asalelaki Mokonzi Salomo na kwivre oyo babongisá kitoko, mpo na ndako ya Yehova.
17 Mokonzi azalaki konyangwisa biloko yango mpe kosopa yango na mabele,* na etúká ya Yordani, oyo ezali kati na Sukote+ ná Zereda.
18 Bongo Salomo asalaki bisaleli yango nyonso ebele mpenza; bakokaki te koyeba kilo ya kwivre oyo basalelaki.+
19 Salomo asalaki bisaleli nyonso+ mpo na ndako ya Nzambe ya solo: etumbelo ya wolo,+ bamesa+ mpo na kotya mampa ya kolakisa;+
20 bitɛlɛmiselo ya miinda ná miinda na yango ya wolo ya pɛto,+ oyo bazalaki kopelisa liboso ya Esika Eleki Mosantu* ndenge esɛngamaki;
21 bafololo, miinda mpe bapɛnsi ya mike ya wolo, wolo ya pɛto mpenza;
22 biloko ya koboma mɔtɔ, mabakuli, bakɔpɔ mpe biloko ya kotya mɔtɔ, ya wolo ya pɛto; mpe ekɔtelo ya ndako, baporte na yango ya kati mpo na Esika Eleki Mosantu+ mpe baporte ya ndako ya tempelo, ezalaki ya wolo.+
Maloba na nse
^ To, “Mbu.”
^ Lil., “Mbu.”
^ Lil., “Mbu.”
^ To, “mabele ya lima.”
^ Lil., “shambrɛ ya kati mpenza.”
