Epai ya Baroma 7:1-25
7 Bandeko, boyebi te ete Mibeko ezali na bokonzi likoló ya moto ntango azali na bomoi? (Mpo nazali koloba na baoyo bayebi mibeko.)
2 Na ndakisa, mwasi oyo abalá akangani na mobali na ye na mobeko ntango mobali yango azali na bomoi; kasi soki mobali na ye akufi, alongwe na mobeko ya mobali na ye.+
3 Yango wana, ntango mobali na ye azali na bomoi, soki akómi mwasi ya mobali mosusu, bakobenga ye mwasi ya ekobo.+ Kasi soki mobali na ye akufi, alongwe na mobeko na ye, yango wana soki akómi mwasi ya mobali mosusu, azali mwasi ya ekobo te.+
4 Bongo bandeko na ngai, na kotalela Mibeko, bino mpe bokufaki na nzela ya mbeka ya nzoto ya Kristo, mpo bókóma bato ya moto mosusu,+ ya moto oyo asekwisamaki* uta na bakufi,+ mpo tóbotela Nzambe mbuma.+
5 Mpo ntango tozalaki kolanda bamposa ya nzoto, bamposa ya masumu oyo elamwisamaki na Mibeko ezalaki kosala mosala na banzoto* na biso mpo tóbota mbuma ya liwa.+
6 Kasi sikoyo tolongwe na Mibeko,+ mpo tokufi na kotalela eloko oyo ezalaki kokanga biso, mpo tózala baombo na ndenge ya sika na elimo,+ kasi na ndenge ya kala te na mibeko oyo ekomami.+
7 Bongo tokoloba nini? Mibeko ezali nde lisumu? Te, ata moke te! Ya solo mpenza mbɛlɛ nayebi lisumu te soki Mibeko ezalaka te.+ Na ndakisa, mbɛlɛ nayebi bilulela te soki Mibeko elobaka te ete: “Osengeli kolula eloko ya moto te.”+
8 Kasi lisumu esalelaki libaku oyo mobeko epesaki yango, mpe ebotaki na motema na ngai bilulela ya ndenge nyonso, mpo soki mibeko ezalaka te mbɛlɛ lisumu ekufá.+
9 Ya solo, kala nazalaki na bomoi liboso mibeko eya. Kasi ntango mobeko eyaki, lisumu ezongaki lisusu na bomoi, kasi ngai nakufaki.+
10 Mpe mobeko oyo esengelaki komema na bomoi,+ namonaki ete ezalaki komema nde na liwa.
11 Mpo lisumu esalelaki libaku oyo mobeko epesaki yango, ebendaki ngai mpe ebomaki ngai na nzela ya mobeko yango.
12 Yango wana, Mibeko ya Moize ezali mosantu, mpe makambo oyo ekomami na kati ezali mosantu, sembo mpe malamu.+
13 Bongo eloko ya malamu ememaki ngai na liwa? Te, ata moke te! Kasi lisumu nde ememaki ngai na liwa. Na nzela ya eloko moko oyo ezali malamu, lisumu ememaki ngai na liwa mpo na komonisa soki lisumu ezali nini.+ Mpe mobeko emonisaki ete lisumu ezali likama monene mpenza mpo na bato.+
14 Mpo toyebi ete Mibeko ezali eloko ya elimo, kasi ngai nazali na nzoto ya mosuni, natɛkamá mpo nazala moombo ya lisumu.+
15 Mpo nayebaka te oyo nasalaka. Mpo oyo nalingi nasalaka yango te, kasi oyo nayini yango nde nasalaka.
16 Nzokande, soki nasalaka oyo nalingi te, nandimi ete Mibeko eleki malamu.
17 Kasi sikoyo ezali lisusu ngai te nde nasalaka yango, kasi nde lisumu oyo efandi na kati na ngai.+
18 Mpo nayebi ete na kati na ngai, elingi koloba na nzoto na ngai, eloko moko ya malamu efandi kuna te; mpo nalingaka kosala oyo eleki malamu, kasi nakokaka kosala yango te.+
19 Mpo malamu oyo nalingi nasalaka yango te, kasi mabe oyo nalingi te yango nde nasalaka.
20 Nzokande, soki oyo nalingi te yango nde nasalaka, wana ezali lisusu ngai te moto nazali kosala yango, kasi lisumu oyo efandi na kati na ngai.
21 Yango wana, namoni mobeko oyo epai na ngai: ntango nalingi kosala oyo ezali malamu, oyo ezali mabe nde ezali epai na ngai.+
22 Na motema na ngai, nasepelaka mpenza na mobeko ya Nzambe,+
23 kasi nazali komona na nzoto* na ngai mobeko mosusu oyo ezali kobunda etumba na mobeko ya makanisi na ngai+ mpe oyo ezali komema ngai mokangami epai ya mobeko ya lisumu+ oyo ezali na nzoto* na ngai.
24 Ngai moto ya mawa! Nani akobikisa ngai na nzoto oyo ezali komema ngai na liwa?
25 Nzambe azwa matɔndi na nzela ya Yesu Kristo Nkolo na biso! Yango wana, na makanisi na ngai nazali moombo ya mobeko ya Nzambe, kasi na nzoto na ngai nazali moombo ya mobeko ya lisumu.+
Maloba na nse
^ Lil., “alamwisamaki.”
^ Lil., “biteni ya nzoto.”
^ Lil., “biteni ya nzoto.”
^ Lil., “biteni ya nzoto.”
