Basambisi 14:1-20
14 Na nsima Samsone akitaki na Timina, mpe kuna amonaki mwasi moko Mofilistia.*
2 Bongo amataki koyebisa tata na ye ná mama na ye ete: “Na Timina, namoni mwasi moko Mofilistia oyo asepelisi ngai, mpe nalingi bózwela ngai ye mpo akóma mwasi na ngai.”
3 Kasi tata na ye ná mama na ye balobaki na ye: “Okoki te koluka mwasi ya kobala kati na bandeko na yo to kati na bato nyonso ya ekólo na biso?+ Mpo na nini okende kozwa mwasi epai ya Bafilistia, bato oyo bakatamá ngenga te?” Kasi Samsone alobaki na tata na ye: “Zwelá ngai ye, mpo ngai nalingi kaka ye.”*
4 Tata na ye ná mama na ye bazalaki koyeba te ete likambo yango eutaki epai ya Yehova, mpo Ye* azalaki koluka libaku ya kobundisa Bafilistia, mpo Bafilistia bazalaki kokonza Yisraele na ntango wana.+
5 Na yango Samsone akitaki na Timina elongo na tata na ye ná mama na ye. Ntango akómaki na bilanga ya vinyo ya Timina, talá! nkɔsi* moko ezalaki koyela ye na koganga.
6 Bongo elimo ya Yehova epesaki ye nguya,+ mpe apasolaki nkɔsi yango na ndambo mibale kaka na mabɔkɔ mpamba, ndenge kaka bapasolaka mwana-ntaba na ndambo mibale. Kasi ayebisaki tata na ye to mama na ye te likambo oyo asalaki.
7 Na nsima akitaki mpe asololaki na mwasi yango, mpe Samsone amonaki ete mwasi yango abongi mpenza na ye.+
8 Na nsima, ntango azalaki kozonga na Timina mpo na komema mwasi yango na ndako,+ Samsone alekaki mpo na kotala ebembe ya nkɔsi wana. Akutaki ndako ya banzoi mpe mafuta ya nzoi na kati ya ebembe ya nkɔsi yango.
9 Bongo azwaki mafuta ya nzoi na mabɔkɔ na ye mpe azalaki kolya yango nzelanzela. Ntango akómaki esika tata na ye ná mama na ye bazalaki, apesaki bango ndambo, mpe balyaki. Kasi ayebisaki bango te ete azwaki yango na ebembe ya nkɔsi.
10 Tata na ye akendaki epai ya mwasi yango, mpe Samsone asalaki fɛti kuna; mpo ezali ndenge wana nde bilenge mibali bazalaki kosala.
11 Ntango bamonaki ye, bazwaki bilenge mibali 30 mpo bákɔtisa ye na fɛti mpe báfanda elongo na ye.
12 Na nsima, Samsone alobaki na bango boye: “Nabondeli bino, tiká napesa bino sambole moko. Soki mpenza bolimboleli ngai yango na boumeli ya mikolo nsambo ya fɛti oyo, nakopesa bino bilamba ya lini 30 mpe bilamba mosusu 30 ya kitoko.
13 Kasi soki bokoki te kolimbolela ngai yango, bino nde bokopesa ngai bilamba ya lini 30 mpe bilamba mosusu ya kitoko 30.” Balobaki: “Yebisá biso sambole yango; tolingi koyoka yango.”
14 Bongo ye alobaki na bango:
“Na molei, eloko moko ya kolya ebimi,Mpe na oyo azalaka makasi, eloko moko ya elɛngi ebimi.”+
Kasi bakokaki te kolimbola sambole yango na boumeli ya mikolo misato.
15 Na mokolo ya minei, balobaki na mwasi ya Samsone: “Kosá mobali na yo+ mpo alimbolela biso sambole yango. Soki te, tokotumba yo ná ndako ya tata na yo na mɔtɔ. Bobengisaki biso awa nde mpo na kozwa biloko na biso?”
16 Na yango, mwasi ya Samsone alelelaki ye mpe azalaki koloba ete: “Namoni oyinaka ngai mpenza, olingaka na yo ngai te.+ Opesi bato ya ekólo na ngai sambole, kasi olimboleli ngai yango te.” Bongo Samsone alobaki na ye boye: “Talá, nalimboleli yango ata baboti na ngai te, bongo mpo na nini nalimbolela yo yango?”
17 Kasi akobaki kolelela ye mikolo nyonso oyo etikalaki na mikolo nsambo ya fɛti na bango. Nsukansuka na mokolo ya nsambo, alimbolelaki ye yango mpo atyaki ye mbamba. Na nsima mwasi yango alimbolelaki bato ya ekólo na ye sambole yango.+
18 Bongo na mokolo ya nsambo, liboso moi elala,* mibali ya engumba balobaki na ye boye:
“Eloko nini eleki mafuta ya nzoi na elɛngi,Mpe eloko nini eleki nkɔsi na makasi?”+
Samsone alobaki na bango:
“Soki mwasi na ngai asalisaka bino te,*+Bolingaki kolimbola sambole na ngai te.”
19 Mpe elimo ya Yehova epesaki ye nguya,+ mpe akitaki na Ashekelone,+ abomaki mibali 30 kati na bango, azwaki bilamba na bango mpe apesaki yango bato oyo balimbolaki sambole.+ Kasi asilikaki makasi wana azalaki kozonga* na ndako ya tata na ye.
20 Na nsima, babalisaki mwasi ya Samsone+ na moko ya bilenge mibali oyo bakɔtisaki Samsone na fɛti ya libala.+
Maloba na nse
^ Lil., “amonaki mwasi moko kati na bana basi ya Bafilistia.”
^ Lil., “abongi na miso na ngai.”
^ “Ye” ekoki kozala Nzambe.
^ To, “mwana-nkɔsi oyo nkingo etondi na nsuki.”
^ To mbala mosusu, “liboso Samsone akɔta na shambrɛ na ye ya kati.”
^ Lil., “Soki bóbalolaka mabele elongo na mwana-ngɔmbɛ na ngai ya mwasi te.”
^ To, “komata.”
