Basambisi 15:1-20
-
Samsone azongiseli Bafilistia mabe (1-20)
15 Nsima ya mwa ntango, na eleko ya kobuka mbuma ya blé, Samsone akendaki kotala mwasi na ye, mpe amemelaki ye mwana-ntaba. Alobaki: “Nazali na mposa ya kokɔta na shambrɛ* ya mwasi na ngai mpo namona ye.” Kasi tata-bokilo na ye apekisaki ye akɔta kuna.
2 Alobaki boye: “Namilobaki: ‘Boye oyini ye mpenza.’+ Yango wana napesaki ye moninga na yo ya libala.+ Leki na ye ya mwasi aleki ye na kitoko, boye te? Nabondeli yo, zwá nde ye.”
3 Kasi Samsone alobaki na bango: “Mbala oyo, Bafilistia bakoloba na ngai eloko te soki nasali bango mabe.”
4 Bongo Samsone akendaki mpe akangaki bagambala 300. Na nsima, azwaki mwa banzete,* akangisaki mikila ya bagambala mibalemibale, mpe atyaki mwa nzete mokomoko na katikati ya mikila oyo akangisaki.
5 Bongo atyaki mɔtɔ na mwa banzete yango mpe atikaki bagambala ekɔta na bilanga ya Bafilistia, oyo ezalaki na mbuma. Samsone atumbaki biloko nyonso, ezala maboke ya matiti ya mbuma ya blé* oyo bakati, mbuma oyo bakati naino te, ná bilanga ya vinyo mpe bilanga ya olive.
6 Na nsima, Bafilistia batunaki: “Nani asali likambo oyo?” Bayebisaki bango: “Ezali Samsone, bokilo ya Motimina, mpo azwaki mwasi ya Samsone mpe apesaki ye moko ya bilenge mibali oyo bakɔtisaki Samsone na fɛti ya libala.”+ Na yango, Bafilistia bamataki mpe batumbaki mwasi yango ná tata na ye na mɔtɔ.+
7 Bongo Samsone alobaki na bango: “Lokola bosali boye, nakotika likambo oyo te tii ntango nakozongisela bino mabe.”+
8 Na yango, abomaki bango mokomoko,* bato ebele mpenza. Na nsima akitaki mpe akómaki kofanda na mobenga ya libanga ya Etami.
9 Nsima na yango, Bafilistia bamataki mpe batyaki kaa na Yuda, mpe bazalaki kotambolatambola na Lehi.+
10 Bongo mibali ya Yuda batunaki bango: “Mpo na nini bomati mpo na kobundisa biso?” Bayanolaki: “Toyei mpo na kokanga Samsone,* mpo na kosala ye kaka ndenge ye asalaki biso.”
11 Na yango, mibali 3 000 ya Yuda bakitaki tii na mobenga ya libanga ya Etami mpe balobaki na Samsone: “Oyebi te ete Bafilistia bazali kokonza biso?+ Sikoyo, osali biso boye mpo na nini?” Alobaki na bango: “Nasali bango ndenge bango mpe basalaki ngai.”
12 Kasi balobaki na ye: “Tokiti awa mpo na kokanga yo* mpe kopesa yo na lobɔkɔ ya Bafilistia.” Bongo Samsone alobaki: “Bólapela ngai ndai ete bokosala ngai mabe te.”
13 Balobaki na ye: “Ya solo, tokoboma yo te, tokokanga yo kaka bansinga, mpe tokopesa yo na lobɔkɔ na bango.”
Na yango, bakangaki ye bansinga mibale ya sika mpe babimisaki ye na libanga yango.
14 Ntango akómaki na Lehi, Bafilistia bagangaki na esengo ntango bamonaki ye. Bongo elimo ya Yehova ekitelaki ye,+ mpe bansinga oyo bakangaki ye na mabɔkɔ ekómaki lokola nsinga ya lini oyo eziki na mɔtɔ; bansinga yango elɛmbaki, ekatanaki mpe elongwaki na mabɔkɔ na ye.+
15 Amonaki mokuwa moko ya mbanga ya mpunda-mobali, asembolaki lobɔkɔ, azwaki yango mpe abomaki na yango mibali 1 000.+
16 Na nsima, Samsone alobaki:
“Na mokuwa moko ya mbanga ya mpunda, nabomi banguna mpe natye bibembe na bango mabokemaboke!
Na mokuwa moko ya mbanga ya mpunda, nabomi mibali 1 000.”+
17 Ntango asilisaki koloba bongo, abwakaki mokuwa yango mosika mpe abengaki esika yango Ramate-lehi.*+
18 Na nsima, ayokaki mposa makasi ya mai. Na yango abelelaki Yehova mpe alobaki: “Yo nde opesi lobiko monene oyo na lobɔkɔ ya mosaleli na yo. Sikoyo nakufa na mposa ya mai mpe nakwea na lobɔkɔ ya bato oyo bazali misutu?”
19 Bongo Nzambe afungolaki libulu moko na Lehi, mpe mai ebimaki na libulu yango.+ Ntango Samsone amɛlaki, nguya* na ye ezongaki mpe azwaki lisusu makasi. Yango wana apesaki esika yango nkombo Ene-hakore,* oyo ezali na Lehi tii na mokolo ya lelo.
20 Mpe Samsone asambisaki Yisraele na mikolo ya Bafilistia mbula 20.+
Maloba na nse
^ To, “shambrɛ ya kati.”
^ To, “mwa banzete ya mɔtɔ.”
^ To, “ɔrje.”
^ Lil., “abɛtaki bango, amatisimatisi makolo na bango na bibɛlɔ.”
^ To, “kokanga Samsone bansinga.”
^ To, “kokanga yo bansinga.”
^ Elimboli, “mwa ngomba ya mbanga.”
^ To, “elimo.”
^ Elimboli, “liziba ya moto oyo azali kobenga.”
