Masese 20:1-30
20 Vinyo ekómisaka moto mosɛki,+ mpe masanga oyo elangwisaka ekómisaka moto mobulumobulu;+Moto nyonso oyo azali kotika yango ebungisa ye nzela azali na bwanya te.+
2 Nsɔmɔ oyo mokonzi apesaka ezali lokola koganga ya nkɔsi;*+Moto nyonso oyo atumoli nkanda na ye atye bomoi na ye na likama.+
3 Moto oyo akimi kowelana abongi na lokumu,+Kasi bazoba bamikɔtisaka na koswana.+
4 Moto ya gɔigɔi abalolaka mabele te na eleko ya malili makasi,Na eleko ya kobuka mbuma ntango akozanga eloko akobanda kosɛngasɛnga.*+
5 Makanisi* na motema ya moto ezali lokola mai mozindo,Kasi moto ya bososoli atokaka yango.
6 Bato mingi batutaka ntolo ete bazali sembo,*Kasi nani akoki komona moto oyo azali mpenza sembo?
7 Moto ya sembo atambolaka na bosembo na ye.+
Esengo na bana oyo bakoya nsima na ye.+
8 Ntango mokonzi afandi na kiti na ye ya bokonzi mpo na kosambisa,+Miso na ye emonaka nyonso oyo ezali mabe.+
9 Nani akoki koloba: “Napɛtoli motema na ngai;+ nazali pɛto,Nalongwe na lisumu na ngai”?+
10 Kilo ya lokuta ná emekeli-kilo ya lokuta:*Nyonso mibale eyinami na Yehova.+
11 Ata mwana* ayebanaka na misala na ye,Soki bizaleli na ye ezali pɛto mpe malamu.+
12 Litoi oyo eyokaka mpe liso oyo emonakaYehova nde asalá yango nyonso mibale.+
13 Kolinga mpɔngi te, noki okóma mobola.+
Fungolá miso mpe okozala na bilei ebele.+
14 Mosombi alobi: “Ezali mabe, ezali mabe!”Nsima na yango akei mpe abandi komikumisa mpo na eloko oyo asombi.+
15 Wolo ezali, mabanga kitoko ya korai mpe ezali ebele,Kasi monɔkɔ oyo ebimisaka boyebi ezali eloko moko ya motuya.+
16 Soki moto amipesi ndanga mpo na mopaya, zwá elamba na ye;+Soki asali yango mpo na mwasi mopaya,* zwá ndanga epai na ye.+
17 Limpa oyo ezwami na nzela ya bokosi ezalaka elɛngi epai ya moto,Kasi na nsima, monɔkɔ na ye ekotonda na mabanga mikemike.+
18 Mikano elongaka soki moto aluki toli,+Osengeli na mayele ya kotambwisa makambo* ntango okei etumba.+
19 Moto oyo akoselaka bato makambo; atambolatambolaka mpo na kobimisa makambo ya nkuku;+Kozala esika moko te na moto oyo alingá koloba makambo ya basusu.*
20 Moto nyonso oyo alakelaka tata na ye ná mama na ye mabe,Mwinda na ye ekobomama ntango molili eyei.+
21 Libula oyo ezwami na lokoso na ebandeli,Ekozala lipamboli te na nsuka.+
22 Koloba te ete: “Nakozongisa mabe!”+
Tyelá Yehova elikya,+ mpe akobikisa yo.+
23 Yehova ayinaka kilo ya lokuta,*Mpe bimekeli-kilo ya bokosi ezali malamu te.
24 Matambe ya moto etambwisami na Yehova;+Ndenge nini moto akoki kososola nzela na ye moko?*
25 Ezali motambo ntango moto abeleli mbangumbangu ete: “Mosantu!”+
Mpe kaka na nsima abandi kotalela lisusu elako yango malamumalamu.+
26 Kaka ndenge mposo ya blé ekabwanaka na mbuma+Ndenge moko mpe mokonzi ya bwanya akabolaka bato mabe na bato ya sembo.+
27 Mpema ya moto ezali mwinda ya Yehova,Emonisaka polele makambo mozindo oyo ezali na kati na ye.
28 Motema boboto* mpe bosembo ebatelaka mokonzi;+Na nzela ya bolingo ya sembo akómisaka kiti ya bokonzi na ye makasi.+
29 Lokumu ya bilenge ezali makasi na bango,+Mpe nkembo ya mibange ezali nsuki mpɛmbɛ na bango.+
30 Etumbu* esalisaka biso tótika kosala mabe,+Disiplini* ezali lokola eloko oyo elongolaka mabe na motema na biso.
Maloba na nse
^ To, “mwana-nkɔsi oyo nkingo etondi na nsuki.”
^ To mbala mosusu, “Akolukaluka na eleko ya kobuka mbuma, kasi akozwa eloko te.”
^ To, “Toli.”
^ To, “basakolaka ete bazali na bolingo ya sembo.”
^ To, “Mitindo ya mabanga mibale ya kilo mpe bimekeli-kilo mibale.”
^ To, “mwana mobali.”
^ To, “mopaya.”
^ To, “litambwisi ya bwanya.”
^ To, “oyo alengolaka na mbɛbu na ye.”
^ To, “mitindo mibale ya mabanga ya kilo.”
^ To, “nzela ya kokende.”
^ To, “Bolingo ya sembo.”
^ Lil., “Bampota oyo bazokisi biso.”
^ Lil., “Kobɛta.”
