Yisaya 42:1-25
42 Talá! Mosaleli na ngai,+ oyo nazali kosalisa!
Moto oyo naponi,+ oyo nandimi!*+
Natye elimo na ngai epai na ye;+Akomema bosembo na bikólo.+
2 Akoganga te, akotombola mongongo na ye mpe te,Akoyokisa te mongongo na ye na balabala.+
3 Akobuka te mongendu oyo elɛmbi,Mpe akoboma te nsinga ya lini oyo mɔtɔ na yango elingi kokufa.+
Akomema mpenza bosembo.+
4 Akolɛmba te mpe akotika te tii akotya bosembo na mabele;+Mpe bisanga ekokoba kozela mobeko* na ye.
5 Talá oyo Nzambe ya solo, Yehova, alobi,Mozalisi ya likoló mpe Nzambe Monene oyo atandá yango,+Moto oyo atandá mabele mpe mbuma na yango,+Moto oyo apesaka mpema na bato oyo bafandi wana+Mpe elimo na bato oyo batambolaka wana.+
6 “Ngai Yehova nabengi yo na bosembo;Nasimbi lobɔkɔ na yo.
Nakobatela yo mpe nakopesa yo ozala kondimana mpo na bato+Mpe lokola pole mpo na bikólo,+
7 Mpo ofungola miso ya bato oyo bakufá miso,+Mpo obimisa moto ya bolɔkɔ na kashoMpo obimisa na bolɔkɔ bato oyo bafandi na molili.+
8 Nazali Yehova. Yango nde nkombo na ngai;Napesaka* nkembo na ngai na moto mosusu te,Napesaka mpe lisanzoli na ngai na bikeko* te.+
9 Talá, makambo ya liboso esalemi;Sikoyo nazali kosakola makambo ya sika.
Liboso yango ebima, nazali koyebisa bino yango.”+
10 Bóyembela Yehova loyembo ya sika,+Lisanzoli na ye uta na bansuka ya mabele,+Bino baoyo nyonso botambolaka na mbu mpe na nyonso oyo etondisi yango,Bino bisanga mpe bino baoyo bofandi kuna.+
11 Esobe mpe bingumba na yango etombola mongongo na yango,+Bamboka epai Kedare+ afandi.
Bato oyo bafandi na libanga monene báganga na esengo;Báganga na mongongo makasi uta na nsɔngɛ ya bangomba.
12 Bápesa Yehova nkemboMpe básakola lisanzoli na ye na bisanga.+
13 Yehova akobima lokola mobali ya nguya.+
Akolamwisa molende na ye lokola mobundi-etumba.+
Akoganga, ɛɛ, akobɛta ntangwa ya etumba;Akolakisa ete azali na nguya koleka banguna na ye.+
14 “Nafandi nyɛɛ ntango molai.
Nazalaki kaka kofanda nyɛɛ mpe namipekisaki.
Lokola mwasi oyo azali kobota nakolelalela,*Nakopemapema mpe nakosila mpema na mbala moko.
15 Nakobebisa bangomba mpe bangomba mikeMpe nakokaukisa matiti na yango nyonso.
Nakokómisa bibale bisanga,*Mpe nakokaukisa bitima oyo etondi na matiti.+
16 Nakotambwisa bato oyo bakufá miso na nzela oyo bayebi te+Nakosala ete bátambola na balabala oyo bayebi te.+
Liboso na bango nakokómisa molili pole+Mpe nakokómisa mabele ya mabulumabulu mokili ya patatalu.+
Yango nde makambo oyo nakosalela bango, mpe nakosundola bango te.”
17 Baoyo bazali kotyela bikeko* motema,Baoyo bazali koloba na bikeko* ete: “Bozali banzambe na biso,”+Bakozonga mpenza nsima, bakoyoka nsɔni mingi mpenza.
18 Bóyoka, bino bato oyo bokufá matoi;Bótala mpe bómona bino bato oyo bokufá miso.+
19 Nani akufá miso, soki mosaleli na ngai te?Nani akufá mpenza matoi, lokola momemi-nsango oyo nazali kotinda?
Nani akufá mpenza miso lokola moto oyo azwi mbano,Nani akufá mpenza miso lokola mosaleli ya Yehova?+
20 Omoni makambo mingi, kasi ozali kotya likebi te.
Ofungoli matoi, kasi ozali koyoka te.+
21 Mpo na bosembo na ye,Yehova asepeli kokumisa mobeko* mpe kokómisa yango eloko ya nkembo.
22 Kasi bango bazali bato oyo bapunzami mpe babɔtɔli bango biloko na makasi;+Bango nyonso bazwami na motambo na kati ya mabulu, mpe babombi bango na babolɔkɔ.+
Bapunzi bango mpe moto ya kobikisa bango azali te,+Babɔtɔli bango biloko na makasi mpe moto azali te oyo akoloba ete: “Zongisá bango!”
23 Nani kati na bino akoyoka likambo oyo?
Nani akotya likebi mpe akoyoka na ntango oyo ekoya?
24 Nani akabi Yakobo mpo bábɔtɔla ye bilokoMpe Yisraele epai ya bapunzi?
Ezali te Yehova, Moto oyo tosaleli lisumu?
Baboyi kotambola na banzela na ye,Mpe baboyi kotosa mobeko* na ye.+
25 Bongo akobaki kosopela bango nkanda na ye ya makasi,+Nkanda na ye mpe nsɔmɔ ya etumba.
Ezikisaki eloko nyonso oyo ezalaki zingazinga na bango, kasi batyaki likebi te.+
Epelelaki bango, kasi batyaki yango na motema te.+
Maloba na nse
^ To, “molimo na ngai endimi.”
^ To, “mateya.”
^ To, “nakabolaka.”
^ To, “bikeko oyo eyemami.”
^ To, “nakokimela.”
^ To, “mokili.”
^ To, “bikeko oyo eyemami.”
^ To, “bikeko ya konyangwa.”
^ To, “mateya.”
^ To, “mateya.”
