Yisaya 7:1-25
7 Na mikolo ya Ahaze+ mwana ya Yotame mwana ya Uzia, mokonzi ya Yuda, Rezine mokonzi ya Siri mpe Peka+ mwana ya Remalia, mokonzi ya Yisraele, bamataki mpo na kobundisa Yerusaleme, kasi akokaki* kozwa yango te.+
2 Bapesaki nsango na ndako ya Davidi ete: “Siri eyokani na Efraime.”
Mpe motema ya Ahaze ná motema ya bato na ye ebandaki kolɛnga, ndenge banzete ya zamba eninganaka na mopɛpɛ.
3 Bongo Yehova alobaki na Yisaya ete: “Nabondeli yo, kende kokutana na Ahaze, yo ná mwana na yo Sheare-yashube,*+ na nsuka ya nzela oyo elekisaka mai na liziba ya likoló+ pene na balabala monene ya elanga ya mosukoli-bilamba.
4 Osengeli koloba na ye ete: ‘Salá nyonso ete ofanda nyɛɛ. Kobanga te, mpe motema na yo ebanga te mpo na biteni mibale ya nkoni oyo ezali kobimisa milinga, mpo na nkanda makasi ya Rezine mpe ya Siri, mpe ya mwana na ye Remalia.+
5 Mpamba te Siri ná Efraime ná mwana ya Remalia bakani kosala yo mabe, balobi:
6 “Tómata kobundisa Yuda mpe tópasolapasola yango mpe tóbɔtɔla yango mpo ekóma ya biso;* mpe tótya mwana ya Tabeele ayangela yango.”+
7 “‘Yehova Nkolo Mokonzi-Oyo-Aleki-Nyonso alobi boye:
“Ekosimba te,Ekosalema mpe te.
8 Mpo motó ya Siri ezali Damasi,Mpe motó ya Damasi ezali Rezine.
Liboso mbula 65 ekokaEfraime ekobebisama nyonso mpe ekozala lisusu ekólo te.+
9 Motó ya Efraime ezali Samaria,+Mpe motó ya Samaria ezali mwana ya Remalia.+
Soki bozali na kondima makasi te,Bokopikama makasi te.”’”
10 Yehova akobaki koloba na Ahaze ete:
11 “Sɛngá Yehova Nzambe+ na yo apesa yo elembo. Ekoki kozala mozindo lokola Nkunda* to etombwaná lokola likoló.”
12 Kasi Ahaze alobaki: “Nakosɛnga te, nakotya mpe Yehova na komekama te.”
13 Bongo Yisaya alobaki boye: “Nabondeli bino, bóyoka Ee ndako ya Davidi. Ndenge bozali kotyola motema molai ya bato ekoki te, bolingi lisusu kotyola motema molai ya Nzambe?+
14 Yango wana Yehova ye moko akopesa bino elembo: Talá! Elenge mwasi akozwa zemi, akobota mwana mobali,+ mpe akopesa ye nkombo Emanuele.*+
15 Liboso ayeba koboya mabe mpe kopona malamu, akolya manteka mpe mafuta ya nzoi.
16 Mpo liboso mwana yango ayeba koboya mabe mpe kopona malamu, mabele ya bakonzi mibale oyo ozali kobanga ekosundolama mpenza.+
17 Yehova akomemela yo mpe bato na yo mpe ndako ya tata na yo ntango moko ya mpasi oyo eyá naino te banda mokolo oyo Efraime ekabwanaki na Yuda:+ akotinda mokonzi ya Asiri.+
18 “Na mokolo yango, Yehova akobɛta piololo mpo na kobengisa banzinzi uta na mosika ya banzela ya mai ya Nile ya Ezipito mpe banzoi oyo ezali na mokili ya Asiri,
19 yango nyonso ekoya mpe ekokitela mabwaku* oyo ekitá makasi, madusu ya mabanga minene, mwa bazamba nyonso ya nzubɛnzubɛ mpe bisika nyonso ya komɛla mai.
20 “Na mokolo yango, na razware oyo bafuteli na etúká ya Ebale,* na nzela ya mokonzi ya Asiri,+ Yehova akokokola motó mpe nsuki ya makolo, mpe ekolongola mandefu nyonso.
21 “Na mokolo yango, moto moko akotika na bomoi mwana-ngɔmbɛ ya mwasi ya etonga ná mpate mibale.
22 Mpe lokola miliki ekozala ebele, akolya manteka; mpo moto nyonso oyo akotikala na mokili akolya manteka ná mafuta ya nzoi.
23 “Na mokolo yango, esika nyonso oyo ezalaki kala na banzete ya vinyo 1 000 oyo ezalaki na motuya ya shekele ya palata 1 000, ekozala kaka na mwa banzete ya nzubɛ mpe na matiti mabe.
24 Bato bakoya kuna na makula mpe na litimbo, mpo mokili yango mobimba ekokóma kaka mwa banzete ya nzubɛ mpe matiti mabe.
25 Mpe bangomba nyonso oyo kala bazalaki kolongola matiti mabe na nkongo, okopusana kuna te mpo na nsɔmɔ ya mwa banzete ya nzubɛ mpe matiti mabe; ekokóma esika ya kofungola bangɔmbɛ mpo elya mpe esika bampate ezali konyatanyata.”
Maloba na nse
^ To mbala mosusu, “bakokaki.”
^ Elimboli, “kaka bato oyo batikali nde bakozonga.”
^ To, “tótya bandelo na bifelo na yango.”
^ To, “Sheole,” elingi koloba, nkunda ya bato nyonso. Talá Ndimbola ya maloba.
^ Elimboli, “Nzambe azali elongo na biso.”
^ To, “mabwaku ya mokɛli.”
^ Elingi koloba, “Efratɛ.”
