Yobo 6:1-30
6 Bongo Yobo ayanolaki ete:
2 “Soki ata mitungisi na ngai+ emekamaka mpenza na kilo,Mpe etyamaka na emekeli-kilo nzela moko na mpasi na ngai!
3 Mpo sikoyo ekómi kilo koleka zɛlo ya mbu.
Yango wana maloba na ngai ekómi bilobaloba mpamba.*+
4 Mpo makula* ya Mozwi-ya-Nguya-Nyonso etɔbɔli ngai,Mpe elimo na ngai ezali komɛla ngɛngɛ na yango;+Makambo ya nsɔmɔ oyo euti na Nzambe etandani mpo na kobunda na ngai.
5 Mpunda ya zamba+ ekoganga nde ntango ezali na matiti,To ngɔmbɛ-mobali ekolela nde ntango ezali na biloko ya kolya?
6 Biloko oyo ezangi elɛngi elyamaka nde kozanga mungwa,To mai oyo ebimaka na lititi babengi gimove ezalaka nde na elɛngi?
7 Naboyi* kosimba biloko ya ndenge wana.
Ezali lokola biloko oyo ebebisami.
8 Aa! Soki eloko oyo nazali kosɛnga ekokisamaka ata,Mpe soki Nzambe akokisaka mposa na ngai!
9 Soki Nzambe asepelaka ata kobuka ngai,Mpe soki afungolaka ata lobɔkɔ na ye mpe aboma ngai!+
10 Mpo yango elingaki kutu kobɔndisa ngai;Nalingaki kopumbwapumbwa na esengo atako mpasi oyo ezali kosila te,Mpo naboyi te maloba ya Mosantu.+
11 Nazali na makasi ya kokoba kozela?+
Mpe nsuka nini ezali kozela ngai, mpo nakoba kozala na bomoi?*
12 Makasi na ngai ekokani na oyo ya libanga?
To mosuni na ngai esalemi nde na kwivre?
13 Ndenge nini nakoki komisalisaAwa balongoli ngai biloko nyonso ya kobikela?
14 Moto nyonso oyo aboyaka komonisela moninga na ye bolingo ya sembo+Akotika kobanga Mozwi-ya-Nguya-Nyonso.+
15 Bandeko na ngai bazali bakosi,+ lokola mokɛli na eleko ya malili makasi,Lokola mai ya mikɛli na eleko ya malili makasi oyo ezali kokauka.
16 Eyindi mpo mai ekómi libanga,Nɛjɛ oyo ekómi mai emibombi na kati na yango.
17 Kasi na eleko na yango, mikɛli ekaukaka mpe esilaka;Ntango molunge eyaka, ekaukaka.
18 Nzela na yango eleki epai mosusu;Emibwakaka na mokili ekauká mpe elimwaka.
19 Milɔngɔ ya bato ya Tema+ oyo bazali koleka batalitali yango,Basali-mobembo ya Seba*+ bazeli yango.
20 Bayoki nsɔni mpo batyaki motema na ndenge ya mabe;Bayei tii kuna, kasi balɛmbi nzoto.
21 Mpo sikoyo bino mpe bokómi boye mpo na ngai;+Bomoni nsɔmɔ ya mpasi na ngai, mpe bokómi kobanga.+
22 Nalobi nde na bino: ‘Bópesa ngai eloko,’
To nasɛngi bópesela ngai likabo na bozwi oyo bozali na yango?
23 Nasɛngi nde bóbikisa ngai na lobɔkɔ ya mongunaTo bóbikisa* ngai na banyokoli?
24 Bólakisa ngai, mpe nakofanda nyɛɛ;+Bósalisa ngai nayeba libunga na ngai.
25 Maloba ya bosembo eyokisaka mpasi te!+
Kasi mpamela na bino ezali na litomba nini?+
26 Boyokani mpo na kopamela maloba na ngai,Maloba ya moto oyo azangi elikya,+ oyo mopɛpɛ ememaka?
27 Kutu bokobwaka mbɛsɛ mpo na mwana oyo tata akufá,+Mpe bokotɛka moninga na bino moko!*+
28 Bongo sikoyo, bótala ngai malamu,Mpo nakokosa te na miso na bino.
29 Bókanisa lisusu mpo na yango, nabondeli bino. Bófunda ngai na mabe te.Ɛɛ, bókanisa lisusu mpo na yango, mpo tii lelo nazali kaka sembo.*
30 Lolemo na ngai ezali nde koloba makambo ezangi bosembo?
Monɔkɔ na ngai ekoki nde kososola te eloko oyo ezali mabe?
Maloba na nse
^ To, “nakómi koloba kozanga kokanisa.”
^ To, “mbanzi.”
^ To, “Molimo na ngai eboyi.”
^ To, “nakoba koyeisa molai mikolo ya bomoi (molimo) na ngai.”
^ To, “Etuluku ya Basabea oyo bazali na mobembo.”
^ Lil., “bósikola.”
^ To, “bokopesa moninga na bino na esika ya eloko moko boye.”
^ To, “moyengebene.” Talá Ndimbola ya maloba.
