Nabotamá na San Juan Chancalaito, engumba moko ya moke na etúká ya Chiapas, na ekólo Mexique. Bato ya libota na ngai bazali bato ya Chol, oyo bankɔkɔ na bango bazalaki Ba-Maya. Babotá biso 12, ngai nde mwana ya 5. Ntango nazalaki mwana moke, Batatoli ya Yehova bazalaki koyekola na ngai ná bandeko na ngai Biblia. Likambo ya mawa, nasalelaki te batoli ya Biblia na bolenge na ngai.

 Ntango nakokisaki mbula 13, nakómaki komɛla drɔgɛ mpe koyiba. Na mbula wana nakimaki ndako mpe nakómaki kofanda epai na epai. Ntango nakómaki na mbula 16, nakómaki kosala na bilanga ya bangi. Nasalaki kuna soki mbula mobimba ntango mokolo moko na butu tomemaki ebele ya bangi na bwato mpe etuluku mosusu ya bato oyo batɛkaka mpe bangi babɛtaki biso masasi. Masasi na bango ezwaki ngai te mpo namibwakaki na mai mpe nabɛtaki mai tii nabimaki na ngámbo mosusu. Na nsima, nakimaki na États-Unis.

 Nakobaki kotɛka bangi kuna mpe kosala lisusu makambo mingi ya mabe. Ntango nakómaki na mbula 19, bakangaki ngai mpe bakatelaki ngai etumbu ya bolɔkɔ mpo bafundaki ngai mpo na moyibi na ngai mpe mpo nalingaki koboma moto. Na bolɔkɔ, nakɔtaki na etuluku moko ya bato ya mobulu mpe tosalaki lisusu mobulu makasi. Yango wana, bakonzi balongolaki ngai wana mpe batindaki ngai na Lewisburg, na Pennsylvanie, na bolɔkɔ mosusu oyo bazalaki kokɛngɛla yango makasi.

 Bizaleli na ngai ebebaki lisusu makasi na bolɔkɔ ya Lewisburg. Lokola nazalaki na nzoloko ya bato ya mobulu na nzoto, ezalaki mpasi te nakɔta na etuluku ya bato yango na bolɔkɔ yango. Nakómaki kutu mobulu makasi, kobunda mpambampamba. Mokolo moko namikɔtisaki na bitumba oyo bato ya mobulu babundaki na lopango ya bolɔkɔ. Tobundaki mabe mpenza; mpo na kobunda, tosalelaki kutu banzete ya baseball mpe bakilo oyo basalaka na yango ngalasisi. Mpo etumba yango esila, basoda oyo bakɛngɛlaka bolɔkɔ yango basopelaki biso gaze oyo ebimisaka mai ya miso. Na nsima, bakonzi ya bolɔkɔ batyaki ngai na esika batyaka bato ya bolɔkɔ ya mobulu makasi. Nazalaki nkandankanda mpe na maloba mabe. Nazalaki kobɛta bato mpambampamba, kutu ezalaki kosepelisa ngai. Nazalaki komona ata mabe moko te mpo na bizaleli na ngai.

 Na esika batyaki ngai, nazalaki kobima te mokolo mobimba, yango wana nakómaki kotánga Biblia mpo na kolekisa ntango. Na nsima, soda moko apesaki ngai buku Okoki kozala na bomoi ya seko na mabele oyo ekobongwana paradis. a Ntango natángaki buku yango, makambo oyo nayekolaki na bomwana elongo na Batatoli ya Yehova ezongelaki ngai na makanisi. Na nsima, nakanisaki mingi ndenge ezaleli na ngai ya mobulu ezongisaki ngai nsima mpenza. Nakanisaki mpe libota na ngai. Lokola bandeko na ngai mibale ya basi bakómaki Batatoli ya Yehova, makanisi oyo eyelaki ngai, ‘bakozala na bomoi ya seko.’ Na nsima, namitunaki boye, ‘Mpo na nini ngai te?’ Ezalaki na ntango yango nde nazwaki ekateli ya kobongwana.

 Kasi, nayebaki ete nazalaki na mposa básalisa ngai mpo nabongwana. Yango wana, nabondelaki liboso Yehova Nzambe mpe nasɛngaki ye asalisa ngai. Na nsima, nakomelaki Biro ya Batatoli ya Yehova ya États-Unis mokanda mpo na kosɛnga boyekoli ya Biblia. Biro yango ezwaki ebongiseli mpo bandeko ya lisangá ya pene báya kotala ngai. Na ntango wana, kaka bato ya libota na ngai nde bazalaki na ndingisa ya koya kotala ngai, yango wana ndeko moko ya lisangá yango akómaki kotindela ngai mikanda ya kolendisa mpe mikanda oyo elimbolaka Biblia mpe yango epesaki ngai mposa mpenza ya kobongola bizaleli na ngai.

 Nasalaki litambe moko monene ntango nazwaki ekateli ya kolongwa na etuluku ya bato ya mobulu oyo naumelaki na bango bambula mingi. Mokambi ya etuluku yango azalaki mpe esika batyaki ngai, yango wana nasololaki na ye na ntango ya bopemi mpe nayebisaki ye ete nalingi kokóma Motatoli ya Yehova. Nakamwaki ntango ayebisaki ngai: “Soki ezali mpenza mposa na yo, salá yango. Nakoki kopekisa Nzambe te. Kasi soki olingi kaka okima biso, oyebi oyo ekokómela yo.”

 Mbula mibale oyo elandaki, bakɛngɛli ya bolɔkɔ bamonaki ete nabongoli bizaleli na ngai. Yango wana, bakómaki komonisela ngai mwa boboto. Na ndakisa, batikaki kokanga ngai bashɛni na mabɔkɔ ntango bazali komema ngai na dushɛ. Soda mosusu kutu apusanaki pene na ngai mpe alendisaki ngai nakoba kosala mbongwana oyo nazali kosala. Kutu, na mbula ya nsuka ya etumbu na ngai, bakonzi ya bolɔkɔ batindaki ngai na bolɔkɔ mosusu oyo bazalaki kokɛngɛla yango makasi te; ezalaki pene ya bolɔkɔ ya monene. Na 2004, nsima ya kolekisa mbula 10 na bolɔkɔ, babimisaki ngai mpe bazongisaki na Mexique na bisi ya bolɔkɔ.

 Ntango nakómaki na Mexique, eumelaki te nayebaki esika Ndako ya Bokonzi ya Batatoli ya Yehova ezalaka. Mbala ya liboso nayanganaki na makita, nalataki iniforme na ngai ya bolɔkɔ mpo yango nde elamba ya malamu oyo nazalaki na yango. Batatoli ya Yehova bakipaki te ndenge nazalaki komonana na miso, bayambaki ngai na esengo. Boboto na bango etindaki ngai namona ete nazali na kati ya bakristo ya solo. (Yoane 13:35) Nsima ya makita yango, bankulutu bazwaki ebongiseli mpo nakóma koyekola Biblia. Mbula moko na nsima, nazwaki batisimo mpe nakómaki Motatoli ya Yehova na mokolo ya 03/09/2005.

 Na sanza ya 01/2007, nakómaki mobongisi-nzela ya sanza na sanza, kolekisa ngonga 70 sanza nyonso na koteya basusu makambo ya Biblia. Na 2011, nazwaki diplome na Eteyelo ya Biblia mpo na bandeko mibali minzemba, (oyo ebengamaka lelo Eteyelo ya bapalanganisi ya nsango malamu ya Bokonzi). Eteyelo yango esalisaki ngai mingi na kokokisa mikumba na ngai na lisangá.

 Na 2013, nabalaki mwasi na ngai, Pilar. Alobaka na ndenge ya lisɛki ete andimaka te makambo oyo nayebisaka ye mpo na bomoi na ngai ya kala. Nazongela te bomoi na ngai ya kala. Ezala ngai to mwasi na ngai, tondimaka ete Biblia ezali na nguya mpenza ya kobongola bomoi ya bato.​—Baroma 12:2.

 Namonaka ete maloba ya Yesu oyo ezali na Luka 19:10 etali nde ngai. Elobi: “[Yesu] ayaki mpo na koluka mpe kobikisa bato oyo babungaki.” Namiyokaka lisusu te ete nabungá. Natambolaka lisusu te mpo na kosala bato mabe. Na lisalisi ya Biblia, nazali na bomoi oyo ezali na ntina, kimya na basusu mpe oyo eleki ntina, nazali na boyokani malamu ná Yehova, Mokeli na ngai.