Bato mingi oyo bakómaki pene ya liwa balobaka ete bayokaki ete balongwe na nzoto na bango, to ete bamonaki kongɛnga moko makasi to mpe esika moko ya kitoko mpenza. Buku moko (Recollections of Death) elobi ete ‘bato mosusu bamonaka ete yango epesaki bango libaku ya komona mwa moke mboka ya bawa.’ Biblia elobeli te makambo oyo bato bakoki komona soki bakómi pene ya kokufa; kasi elobi makambo ya solo oyo emonisi ete bimonamona wana ezalaka te emonaneli ya mboka ya bawa.

 Bakufi bayebi eloko te.

Biblia elobi ete bakufi “bayebi ata eloko moko te.” (Mosakoli 9:5) Ntango moto akufi, akendaka na mboka ya bawa te; atikaka nde kozala na bomoi. Liteya oyo elobaka ete moto azalaka na molimo oyo ekufaka te, oyo ekobaka kozala na bomoi nsima ya liwa, euti na Biblia te. (Ezekiele 18:4) Na yango, likambo nyonso oyo moto akoki komona ntango akómi pene na liwa ekoki kozala lola te, lifelo te, mboka ya bawa mpe te.

 Lazare alobaki nini mpo na bomoi nsima ya liwa?

Lisolo moko ya Biblia elobeli Lazare, oyo akufaki mpenza mpe Yesu asekwisaki ye nsima ya mikolo minei. (Yoane 11:38-44) Soki Lazare akendaki na esika moko ya bisengo nsima ya liwa na ye, boye Yesu asalaki mabe ndenge azongisaki ye na bomoi awa na mabele. Nzokande, Biblia elobi ata na esika moko te ete Lazare alobelaki bomoi nsima ya liwa. Na ntembe te, soki Lazare amonaki bimonamona nsima ya liwa, alingaki kolobela yango. Tóbosana te ete ntango Lazare akufaki, Yesu alobaki ete alali mpɔngi mpo na komonisa ete Lazare akufaki mpe ayebaki ata eloko moko te.​—Yoane 11:11-14.