Ekómelaka biso nyonso tómituna soki bato bakufaka mpo na nini, mingimingi ntango ndeko to moninga na biso akufi. Biblia elobi: “Etubeli oyo epesaka liwa ezali lisumu.”​—1 Bakorinti 15:56.

Mpo na nini bato nyonso basalaka masumu mpe bakufaka?

 Mobali ná mwasi ya liboso, Adama ná Eva, bakufaki mpo basalaki lisumu na miso ya Nzambe. (Ebandeli 3:17-19) Kotomboka oyo batombokelaki Nzambe ekokaki komema bango kaka na liwa, mpo bomoi euti epai ya Nzambe.​—Nzembo 36:9; Ebandeli 2:17.

 Adama atikelá bana na ye nyonso mbeba moko: lisumu. Biblia elobi: “Lisumu ekɔtaki na mokili mpo na moto moko mpe liwa mpo na lisumu, ndenge moko mpe liwa epalangani epai ya bato nyonso mpo bango nyonso basalaki lisumu.” (Baroma 5:12) Bato nyonso bakufaka mpo bango nyonso basalaka masumu.​—Baroma 3:23.

Ndenge liwa ekolongwa

 Nzambe alaki ete “akolongola mpenza liwa mpo na libela.” (Yisaya 25:8) Mpo na kolongola liwa, asengeli kolongola liboso eloko oyo ememá liwa, elingi koloba lisumu. Nzambe akosala yango na nzela ya Yesu Kristo, oyo “azali kolongola lisumu ya mokili.”​—Yoane 1:29; 1 Yoane 1:7.