ຄຳນຳ
ຄຳພີໄບເບິນເປັນຄຳເວົ້າຂອງພະເຈົ້າທີ່ເວົ້າກັບພວກເຮົາທຸກຄົນ. ເຮົາຕ້ອງຮຽນຄຳພີໄບເບິນເພື່ອຈະຮູ້ຈັກຜູ້ທີ່ແຕ່ງປຶ້ມຫົວນີ້. (ໂຢຮັນ 17:3; 2 ຕີໂມທຽວ 3:16) ໃນປຶ້ມຫົວນີ້ ພະເຢໂຫວາພະເຈົ້າບອກໃຫ້ຮູ້ວ່າເພິ່ນຕ້ອງການໃຫ້ມະນຸດແລະໂລກນີ້ເປັນແນວໃດ.—ປະຖົມມະການ 3:15; ພະນິມິດ 21:3, 4
ຄຳພີໄບເບິນມີຜົນກະທົບຕໍ່ຊີວິດຂອງຄົນເຮົາຫຼາຍກວ່າປຶ້ມອື່ນໆ. ຄຳພີໄບເບິນກະຕຸ້ນເຮົາໃຫ້ສະແດງຄຸນລັກສະນະຕ່າງໆຂອງພະເຢໂຫວາ ເຊັ່ນ: ຄວາມຮັກ ຄວາມເມດຕາ ແລະຄວາມເຫັນອົກເຫັນໃຈ. ຄຳພີໄບເບິນໃຫ້ຄວາມຫວັງແລະຊ່ວຍເຮົາໃຫ້ອົດທົນເຖິງວ່າຈະເຈິກັບບັນຫາທີ່ໜັກປານໃດກໍຕາມ. ປຶ້ມຫົວນີ້ຍັງບອກໃຫ້ຮູ້ວ່າມີຫຍັງແດ່ໃນໂລກນີ້ທີ່ບໍ່ໄດ້ເປັນຕາມຄວາມຕ້ອງການຂອງພະເຈົ້າ.—ເພງສັນລະເສີນ 119:105; ເຮັບເຣີ 4:12; 1 ໂຢຮັນ 2:15-17
ໃນຕອນທຳອິດ ຄຳພີໄບເບິນຂຽນເປັນພາສາເຮັບເຣີ ພາສາອາຣາເມອິກ ແລະພາສາກຣີກ. ມີການແປຄຳພີໄບເບິນແບບຄົບຊຸດຫຼືບາງສ່ວນໃນຫຼາຍກວ່າ 3.000 ພາສາ. ຄຳພີໄບເບິນເປັນປຶ້ມທີ່ມີການແປແລະແຈກຢາຍຫຼາຍທີ່ສຸດໃນປະຫວັດສາດ. ເຮົາບໍ່ແປກໃຈໃນເລື່ອງນີ້ ຍ້ອນຄຳພະຍາກອນໃນຄຳພີໄບເບິນບອກລ່ວງໜ້າວ່າ: “ຈະມີການປະກາດຂ່າວດີເລື່ອງການປົກຄອງຂອງພະເຈົ້າ [ຂ່າວສານສຳຄັນໃນຄຳພີໄບເບິນ] ໄປທົ່ວໂລກ ເພື່ອໃຫ້ຄົນທຸກຊາດມີໂອກາດໄດ້ຍິນ ແລ້ວຈຸດຈົບກໍຈະມາຮອດ.”—ມັດທາຍ 24:14
ຍ້ອນຂ່າວສານທີ່ຢູ່ໃນຄຳພີໄບເບິນສຳຄັນຫຼາຍ ພວກເຮົາຈຶ່ງມີເປົ້າໝາຍທີ່ບໍ່ພຽງແຕ່ແປໃຫ້ຖືກຕ້ອງຕາມຕົ້ນສະບັບເທົ່ານັ້ນ ແຕ່ຍັງໃຊ້ຄຳທີ່ຈະແຈ້ງແລະເຂົ້າໃຈງ່າຍນຳອີກ. ພາກຜະໜວກຫົວຂໍ້ “ຫຼັກການໃນການແປຄຳພີໄບເບິນ” “ລັກສະນະເດັ່ນຂອງຄຳພີໄບເບິນສະບັບນີ້” ແລະ “ຄຳພີໄບເບິນລອດມາຮອດເຮົາໄດ້ແນວໃດ?” ເວົ້າເຖິງຫຼັກການແປຕ່າງໆແລະມີລັກສະນະເດັ່ນຫຍັງແດ່.
ຜູ້ທີ່ຮັກພະເຢໂຫວາພະເຈົ້າແລະນະມັດສະການເພິ່ນຢາກອ່ານຄຳເວົ້າຂອງພະເຈົ້າທີ່ແປຢ່າງຖືກຕ້ອງແລະເຂົ້າໃຈງ່າຍ. (1 ຕີໂມທຽວ 2:4) ດັ່ງນັ້ນ ເພື່ອໃຫ້ເປັນໄປຕາມເປົ້າໝາຍທີ່ຈະແປຄຳພີໄບເບິນສະບັບແປໂລກໃໝ່ໃນຫຼາຍພາສາເທົ່າທີ່ຈະຫຼາຍໄດ້ຈຶ່ງມີການແປຄຳພີໄບເບິນສະບັບນີ້ເປັນພາສາລາວນຳ. ຜູ້ອ່ານທີ່ຮັກ ພວກເຮົາອະທິດຖານແລະຫວັງວ່າເຈົ້າຈະໄດ້ຮັບປະໂຫຍດຈາກພະຄຳພີສະບັບນີ້ເມື່ອເຈົ້າພະຍາຍາມ ‘ຊອກຫາພະເຈົ້າ . . . ແລະຮູ້ຈັກເພິ່ນ.’—ກິດຈະການ 17:27
ຄະນະກຳມະການການແປພະຄຳພີສະບັບແປໂລກໃໝ່
ສິງຫາ 2013
