ບົດທີ 03

ຄຳພີໄບເບິນເຊື່ອຖືໄດ້ບໍ?

ເປີດ

ຄຳພີໄບເບິນມີຄຳສັນຍາແລະຄຳແນະນຳຫຼາຍຢ່າງ. ແຕ່ເຈົ້າອາດຍັງບໍ່ກ້າເຊື່ອສິ່ງທີ່ຄຳພີໄບເບິນບອກຮ້ອຍເປີເຊັນ. ເຈົ້າອາດຄິດວ່າປຶ້ມເກົ່າແກ່ຫົວນີ້ຈະເຊື່ອຖືໄດ້ບໍ? ເຈົ້າອາດບໍ່ໝັ້ນໃຈວ່າຄຳສັນຍາທີ່ບອກໄວ້ໃນຄຳພີໄບເບິນຈະເຊື່ອຖືໄດ້ບໍ? ແຕ່ຫຼາຍລ້ານຄົນເຊື່ອ. ເຮົາຢາກເຊີນເຈົ້າໃຫ້ມາພິສູດດ້ວຍໂຕເຈົ້າເອງ.

1. ເລື່ອງຕ່າງໆໃນຄຳພີໄບເບິນເປັນຄວາມຈິງບໍ?

ຄຳພີໄບເບິນບັນທຶກ “ຖ້ອຍຄຳທີ່ເປັນຄວາມຈິງຢ່າງຖືກຕ້ອງ.” (ຜູ້ເທສະໜາປ່າວປະກາດ 12:10, ລ.ມ.) ເລື່ອງຕ່າງໆໃນຄຳພີໄບເບິນກ່ຽວຂ້ອງກັບເຫດການແລະຜູ້ຄົນທີ່ມີຢູ່ແທ້. (ອ່ານລູກາ 1:3; 3:1, 2) ນັກປະຫວັດສາດແລະນັກບູຮານຄະດີຫຼາຍຄົນຢືນຢັນຄວາມຖືກຕ້ອງຂອງມື້ທີ່ສຳຄັນ ຜູ້ຄົນ ສະຖານທີ່ ແລະເຫດການຕ່າງໆທີ່ບອກໄວ້ໃນຄຳພີໄບເບິນ.

2. ເປັນຫຍັງເຮົາຈຶ່ງເວົ້າໄດ້ວ່າຄຳພີໄບເບິນຍັງບໍ່ຫຼ້າສະໄໝ?

ຫຼາຍຄັ້ງຄຳພີໄບເບິນເວົ້າເຖິງສິ່ງຕ່າງໆທີ່ຫຼາຍຄົນຍັງບໍ່ຮູ້ຈັກໃນສະໄໝບູຮານ. ຕົວຢ່າງເຊັ່ນ ຄຳພີໄບເບິນເວົ້າເຖິງຄວາມຮູ້ທາງວິທະຍາສາດ ເຊິ່ງຫຼາຍຄົນໃນສະໄໝນັ້ນບໍ່ເຊື່ອວ່າເປັນຄວາມຈິງ. ແຕ່ເມື່ອວິທະຍາສາດກ້າວໜ້າຂຶ້ນກໍເຮັດໃຫ້ເຮົາຮູ້ວ່າສິ່ງທີ່ຄຳພີໄບເບິນເວົ້າເປັນຄວາມຈິງ. ຄຳພີໄບເບິນ “ເຊື່ອຖືໄດ້ທັງຕອນນີ້ແລະຕະຫຼອດໄປ.”—ຄຳເພງ 111:8, ລ.ມ.

3. ເປັນຫຍັງເຮົາຈຶ່ງເຊື່ອສິ່ງທີ່ຄຳພີໄບເບິນເວົ້າເລື່ອງອະນາຄົດໄດ້?

ຄຳພີໄບເບິນມີຄຳພະຍາກອນ aຫຼາຍເລື່ອງທີ່ບອກລ່ວງໜ້າວ່າຈະເກີດເຫດການຫຍັງຂຶ້ນ. (ເອຊາອີ 46:10) ແລະຍັງບອກລ່ວງໜ້າຢ່າງຖືກຕ້ອງກ່ຽວກັບສະພາບການຂອງໂລກໃນທຸກມື້ນີ້ນຳ. ໃນບົດນີ້ເຮົາຈະເບິ່ງຄຳພະຍາກອນບາງເລື່ອງໃນຄຳພີໄບເບິນ. ຄວາມຖືກຕ້ອງຂອງຄຳພະຍາກອນເຫຼົ່ານັ້ນໜ້າງຶດງໍ້ຫຼາຍ!

ຮຽນຮູ້ຫຼາຍຂຶ້ນ

ຂໍໃຫ້ເບິ່ງວ່າຄວາມຮູ້ທາງວິທະຍາສາດສອດຄ່ອງກັບຄຳພີໄບເບິນແນວໃດ ແລະເບິ່ງລາຍລະອຽດຂອງຄຳພະຍາກອນບາງເລື່ອງໃນຄຳພີໄບເບິນທີ່ໜ້າງຶດງໍ້.

4. ວິທະຍາສາດສອດຄ່ອງກັບຄຳພີໄບເບິນ

ໃນສະໄໝບູຮານ ຄົນສ່ວນຫຼາຍເຊື່ອວ່າໂລກຢອງຢູ່ເທິງບາງຢ່າງ. ເປີດວິດີໂອ.

ວິດີໂອ: ໂລກຫ້ອຍຢູ່ໂດຍບໍ່ໄດ້ຕິດກັບຫຍັງ (1:13)

ສັງເກດສິ່ງທີ່ບອກໄວ້ໃນປຶ້ມໂຢບປະມານ 3.500 ປີມາແລ້ວ. ອ່ານໂຢບ 26:7 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງໂລກຫ້ອຍຢູ່ “ໂດຍບໍ່ໄດ້ຕິດກັບຫຍັງ” ຈຶ່ງເປັນຄວາມຮູ້ທີ່ໜ້າງຶດງໍ້?

ຜູ້ຄົນຫາກໍມີຄວາມເຂົ້າໃຈກ່ຽວກັບວົງຈອນຂອງນ້ຳເມື່ອປະມານ 200 ປີມານີ້. ແຕ່ຂໍໃຫ້ສັງເກດສິ່ງທີ່ຄຳພີໄບເບິນບອກເມື່ອຫຼາຍພັນປີກ່ອນ. ອ່ານໂຢບ 36:27, 28 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງການອະທິບາຍເລື່ອງວົງຈອນຂອງນ້ຳແບບຮຽບງ່າຍໃນຂໍ້ນີ້ຈຶ່ງໜ້າປະທັບໃຈ?
ຂໍ້ຄຳພີທີ່ເຈົ້າຫາກໍອ່ານເຮັດໃຫ້ເຈົ້າເຊື່ອຖືຄຳພີໄບເບິນຫຼາຍຂຶ້ນບໍ?

5. ຄຳພີໄບເບິນບອກລ່ວງໜ້າເຖິງເຫດການຕ່າງໆທີ່ສຳຄັນ

ອ່ານເອຊາອີ 44:27–45:2 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຄຳພີໄບເບິນບອກລາຍລະອຽດຫຍັງແດ່ໄວ້ລ່ວງໜ້າ 200 ປີກ່ອນທີ່ບາບີໂລນຈະຖືກຍຶດ?

ເປີດວິດີໂອ.

ວິດີໂອ: ຄຳພີໄບເບິນບອກລ່ວງໜ້າເລື່ອງການຫຼົ້ມຈົມຂອງບາບີໂລນ (0:58)

ປະຫວັດສາດຢືນຢັນວ່າຊີຣຶຊກະສັດຂອງເປີເຊຍແລະທະຫານຂອງລາວຍຶດເມືອງບາບີໂລນໃນປີ 539 ກ່ອນ ຄ.ສ. b ເຂົາເຈົ້າປ່ຽນທິດທາງການໄຫຼຂອງແມ່ນ້ຳທີ່ອ້ອມເມືອງນັ້ນ. ຫຼັງຈາກນັ້ນກໍເຂົ້າໄປໃນເມືອງທາງປະຕູທີ່ເປີດປະໄວ້ ເຂົາເຈົ້າຍຶດເມືອງນັ້ນໄດ້ໂດຍທີ່ບໍ່ມີການສູ້ຮົບ. ທຸກມື້ນີ້ ເວລາໄດ້ຜ່ານມາ 2.500 ປີແລ້ວ ແລະຕອນນີ້ເມືອງບາບີໂລນເປັນພຽງຊາກຫັກພັງ. ຕອນນີ້ຂໍໃຫ້ສັງເກດສິ່ງທີ່ຄຳພີໄບເບິນບອກລ່ວງໜ້າ.

ອ່ານເອຊາອີ 13:19, 20 ແລ້ວລົມກັນກ່ຽວກັບຄຳຖາມຕໍ່ໄປນີ້: