Bo Ed ni bo musalaa bona bo Jennie, nebalikile kukutaza ka kuitusisa foni lwapili mwa 2010. a Bo Jennie babulela kuli, “Nenisa tabeli kukutaza ka kuitusisa foni. Nabulelela bakuluna kuli, ‘hanina kueza cwalo fateñi hape!’” Bo Ed ni bona nebaikutwa cwalo. Batalusa kuli, “Hanitabeli kulizezwanga ki batu bababata kunilekisa nto yeñwi, kacwalo niikutwanga kuli batu benilizezanga hanikutaza ka kuitusisa foni ni bona baikutwanga cwaIo.”

 Cwale butuku bwa COVID-19 bwakalisa, mi Lipaki za Jehova batuhela kuyanga fa ndu ni ndu inze bakutaza. Kono ka kumamela taelo ya Jesu ya kushaela taba yende, nebazwezipili kukutaza, sihulu ka kuñola mañolo ni ka kuitusisa foni. (Mateu 24:14; 28:19, 20) Ka nako yeswana, mikopano ya Sikreste, kukopanyeleza cwalo ni mukopano wa kuzwela mwa simu, neiezezwanga fa progilamu yekonahalisa kuli batu babonane. Kwa mukopano omuñwi, bo Ed balika kukutaza ka kuitusisa foni hape, nihaike kuli neku babezi taata. Nebaikutwile cwañi hane balizelize mutu lwapili? Batalusa kuli, “Neniikalezwi hahulu kuli mane nalapela kukupa tuso! Kihona niliza. Mi kona mone nizibanezi ni bo Tyrone.” b

 Bo Tyrone ni bo musalaa bona, bo Edith, bapila mwa sibaka sa matakanyani sesibizwa Kentucky, kwa U.S.A. Bo Tyrone banani lilimo ze 83 mi habasa bona hande. Nihakulicwalo, nebalumezi kuitutanga Bibele ni bo Ed. Nebabalanga buka yene baitusisanga kwa kuituta ka kuitusisa gilasi yetunafaza lika mi bakalisa kuitutanga Bibele kamita ni bo Ed fa foni.

 Hamulaho wa kweli, bo Tyrone ni bo Edith bakalisa kufumanehanga kwa mikopano yene ieziwanga kwa puteho yene ili mwa sibaka seo. Nihakulicwalo, bakeñisa kuli kwa sibaka kobapila hakuna Intaneti, nebafumanehanga kwa mikopano ka kuitusisa foni. Ki lika mañi zene tahisize kuli bo Edith ni bona batabele kuituta niti?

 Ka nako yene baitutanga ni bo Tyrone, bo Ed ni bo Jennie nebautwanga bo Edith inze batusa bo Tyrone kufumana likalabo ni mañolo mwa Bibele yabona. Kono nebasa bonisangi kuli batabela kuituta. Bo Jennie babulela kuli, “Neluutwanga kuli bo Edith nebabilaezwa ki taba yeñwi, kono na ni bo Ed nelusa zibi libaka.”

 Zazi leliñwi, bo Jennie baikutwa kuli baswanela kuambola bo Edith. Kacwalo ka nako yeswanela, bakupa bo Ed foni. Babulela kuli, “Bo Tyrone, niutwa linzwi la basali bamina mwatasi, mi nibata feela kubakupa kubala liñolo kamba kualaba.”

 Hamulaho wa nakonyana, bo Edith babulela fa foni. Bakala kubulela ka linzwi leliombalile kuli, “Nenibatanga kuambola ni mina.” Kihona babulela kuli: “Ni yomuñwi wa Lipaki za Jehova. Nifokozi kwa moya ka lilimo ze 40.”

 Bo Jennie bakomoka hahulu. Bahuwa bali, “Mu kaizelaaka!”, mi kaufelaa bona bakala kulila.

 Hamulaho wa fo feela, bo Ed bafa bo Edith broshuwa ya Mukutele ku Jehova. Mwa lisunda zene tatami, bo Ed ni bo Jennie balemuha kuli bo Edith nebaeza zwelopili yende. Bo Ed batalusa kuli, “Kwa makalelo, nebautwahalanga kuli nebabilaezwa ki taba yeñwi. Fa cwale sebautwahala kuba ni tabo.” Bo Edith nebaezize zwelopili yende ya kwa moya mi fa hape sebali bahasanyi ba taba yende babatabile. Bo muunaa bona nebakolobelizwe sina yomuñwi wa Lipaki za Jehova mwa July 2022.

 Bo Ed habahupula mone baikutwelanga ka za kukutaza ka kuitusisa foni, hape bahupulanga lizazi lene baikambotile lwapili ni bo Tyrone. Bo Ed hase babalezi bo Tyrone liñolo la Joani 6:44 ni kubataluseza kuli Jehova uhohelanga batu mwa niti, bo Tyrone balumela, ka kubulela kuli: “Neninze nilibelela kuli mukaliza.” Bo Jennie batabile kuli bona ni bakubona nebabile ni bundume bwa kukutaza ka kuitusisa foni. Batalusa kuli, “Jehova wafuyaulanga buikatazo bobucwalo.”