Bo Maria Lúcia, ba kwa Brazil, bakula butuku bwa sihozo bobubizwa Usher, ili bobu tahisanga kuli mutu atuhele kuutwa hande mane cwalo ni kubona. Nebapepilwe inze bali bo susu mi nebaitutile puo ya bo susu inze basali banana. Mi hase bakwanisize lilimo ze 30 batuhela kubona hande. Kusina taba ni miinelo yetaata yeo, bo Maria Lúcia nebasika ikauhanya ku babañwi. Ka nako ya cwale sebanani lilimo zefitelela 70, mi bazwelapili kupila bupilo bobunde inze batabile.

 Bo Maria Lúcia nebakopani ni Lipaki za Jehova mwa silimo sa 1977, pili basika tuhela kale kubona. Batalusa kuli: “Nenikopani ni bo mulikanaaka bane nikenanga ni bona sikolo ba libizo la Adriano, ili bane basazo ba Lipaki. Neba nitaluselize za sepiso ya Mulimu ya paradaisi yekaba teñi fa lifasi kwapili, ilimo batu kaufela bakaikola bupilo inze banani buikangulo bobunde. Nenitabisizwe hahulu ki zene banibulelezi kuli mane nalumela kuituta Bibele. Honafo feela, nakala kuswalisana ni puteho yeñwi mwa Rio de Janeiro, ili kone batolokanga mikopano yemiñwi mwa puo ya bo susu. Ka tuso ya Jehova, naeza zwelopili ya kwa moya mi nakolobezwa mwa July 1978.”

 Hamulaho wa nako, bo Maria Lúcia batutela mwa puteho mone kusina Lipaki bane baziba puo ya bo susu. Kwa makalelo nekubabezi hahulu taata, bakeñisa kuli nebasa koni kuutwisisa zene bulelwa kwa mikopano. Likaizeli bababeli babatusa. Nebainanga ni bona kwa mikopano mi neba bañolelanga litaba zene bulelwanga. Bo Maria Lúcia babulela kuli, “Hane nibanga kwa ndu, nenibalanga litaba zeo ka kukuta-kutela ilikuli niliutwisise hande. Hamulaho wa nako, likaizeli bao baituta puo ya bo susu mi baba batoloki baka.”

 Muinelo wa bo Maria Lúcia hase utotobezi, kwababela taata kubona zene tolokiwanga ki likaizeli bao. Kacwalo bakala kuitusisanga muambolelo omuñwi wa bo susu. Ki muambolelo mañi ona wo? Bo Maria Lúcia batalusa kuli: “Neniswalanga mwa mazoho a mutu yanitolokela. Ka nzila yeo neni kona kuziba zatokola mutu.”

 Bo Maria Lúcia baitumela hahulu kwa musebezi obaeza likaizeli baba batolokelanga. Batalusa kuli, “Ki limpo zende zezwa ku Jehova. Ka tuso ya bona, naikolanga mikopano ya puteho, mikopano ya mupotoloho, ni mikopano yemituna.”

 Bo Maria Lúcia batukufalezwi mwa musebezi wa kukutaza. Ka kuitusisa puo ya bo susu ya kuambola ka kuswala mwa mazoho, bo Maria bakutazanga ku bo susu ili baba tabiswanga ki buikatazo bobaezanga kuli bayo bataluseza taba yende. Ka nako ya butuku bwa COVID-19, bo Maria Lúcia bañolezi bo susu babañwi mañolo amañata ka tuso ya banyani babona bo José Antônio, ili bao ni bona ki bo susu mi hape hababoni. a

 Baezanga cwañi cwalo? Bo Maria Lúcia batalusa kuli, “Haniñola, niitusisanga nto yeñwi ya pulasitiki ili ya sibupeho sa taku ya L. Nto yeo initusanga kuli niñole hande litaba nisasikamisi ni kuliñola mwa maparagilafu. Bo José Antônio banani buikoneli bwa kuhupula litaba. Baakalezanga litaba ni mañolo a mwa Bibele, mi cwale na kihona nika liñola mwa mañolo eniñola. Nilikanga kuñola ka nzila yebakona kuutwisisa bo susu. Haki batu kaufela babali bo susu babaziba kubala litaba zeñozwi.”

 Nihaike kuli bo Maria Lúcia mazazi a habasa bona ni hanyinyani, bazwezipili kubeleka ka taata. Bo Karoline, babañwi ba likaizeli baba batolokelanga babulela kuli: “Bo Maria Lúcia baezanga misebezi kaufela ya fa lapa mi ndu yabona ikenile nako kaufela. Batabela hahulu kuapeha lico ni kuikabela zona ni balikani babona.”

 Bo Jefferson, babasebeza sina baana-bahulu mwa puteho yeba swalisana ni yona bo Maria Lúcia, batalusa kuli: “Bo Maria Lúcia balata hahulu Jehova. Mi balata batu. Kamita baezanga lika zetusa babañwi. Ki batu babaisa babañwi pilu.”—Mafilipi 2:4.