Bo Clodean, babali babañwi ba Lipaki za Jehova babapila kwa South Africa, nebaswelwi mwa sipatela kuli bapazulwe. Nebasina buikangulo bobunde kwa mubili mi nebatokwa kunyakisisa mialafelo yeshutana-shutana kuli bakete mualafelo oswanela. Pili basika pazulwa kale ni hase bapazuzwi, nebautwanga kukatala, butuku, mi nebalembwalile. Hase balukuluzwi ni kukutela kwa ndu, nebainzi lisunda zebato ba zelishumi basakoni kuina. Mi bakeñisa butuku bobuyambukela bwa COVID-19, hakuna batu bane babapotelanga.

 Bo Clodean nebaikatulezi kusaikutwa bumaswe kabakala muinelo one bali ku ona, kacwalo, bakupa Mulimu kuli abafe maata ilikuli baomba-ombe babañwi. Kacwalo, hane bakonile kuina, honafo feela balizeza foni munyanaa musali yene bapila mabapa ni yena, naaitutanga Bibele ni Lipaki za Jehova nako yeñwi kono naatuhezi kuituta. Bo Clodean neba mutaluselize manzwi a susueza kuzwelela mwa Linzwi la Mulimu, mi manzwi ao naatahisize kuli musali yo akale kuituta Bibele hape. Bo Clodean hape neba mutaluselize butokwa bwa kufumaneha kwa mikopano ya Sikreste, mi balukisa kuli muituti wabona akone kufumaneha kwa mikopano ya puteho ka kuitusisa progilamu yekonahalisa kuli baputehi babonane. Musali yo naafumanehile kwa mukopano mi mane naaalabile ka nako ya puisano ya lipuzo ni likalabo.

 Bo Clodean hape nebaambozi ni munyanaa muituti wabona wamusizana, mi ni yena naatabela kuituta Bibele. Musizana yo mane ataluseza bo Clodean ka za batu babañwi bane bakatabela kuituta Bibele. Ki lika mañi zenezwile mwateñi? Bo Clodean nebakalisize lituto za Bibele ni basali babañwi babane. Kono mane kunani lika zeñwi zende zeneezahezi!

 Bakeñisa kuli bo Clodean nebaisa hahulu pilu batu babañwi, nebakonile kukala kuituta Bibele ni basali babañwi balishumi ka nako ya butuku bobuyambukela, ili kutalusa kuli nebabile ni lituto ze 16! Babañwi ku bona bafumanehanga kwa mikopano kamita ka kuitusisa progilamu yekonahalisa kuli baputehi babonane. Kupateha mwa musebezi wa kukutaza kutusize bo Clodean kusaisa hahulu pilu kwa butata bobakopana nibona. Hape baikutwa kuli nebakonile kuomba-omba babañwi bakeñisa kuli Jehova, yena “Mulimu yaomba-omba mwa miinelo kaufela,” naabaomba-ombile mwa muinelo otaata one bali ku ona.—2 Makorinte 1:3, 4.

 Baituti ba bo Clodean baikutwa cwañi ka za litaba zebaitutile? Yomuñwi ku bona utalusa kuli: “Nitusehile mwa linzila zeñata. Kono nto yeniitebuha hahulu ki kuziba libizo la Mulimu. Kueza cwalo kunitusize kusutelela ku Jehova.” Mi musali wapili yene balizelize foni bo Clodean yena mane atuha akolobezwa. Zebaipumani ku zona bo Clodean libatahiselize tabo yetuna. Mi ki kale bafola kwa butuku bone bubakataza.