Bibele ilususueza kufana ka kuitatela ni kueza cwalo ka libaka leliswanela. Ibulela kuli kufana ka nzila yeo hakutusi feela yafiwa kono hape kutusa ni mufani. (Liproverbia 11:25; Luka 6:38) Jesu naabulezi kuli: “Kunani tabo yetuna mwa kufana yefita ye mwa kufiwa.”—Likezo 20:35.

•  Ki bufani bobucwañi bobutabisa Mulimu?

•  Ki bufani bobucwañi bobusa tabisi Mulimu?

•  Litimana za mwa Bibele zebulela za bufani

 Kufana ka kuitatela kwatusa. Bibele ibulela kuli: “Mutu ni mutu azwise ka mwaatulezi mwa pilu yahae, isiñi ka kukata-kata kamba ka kuhapelezwa, kakuli Mulimu ulata yafana inze atabile.”—2 Makorinte 9:7, litaluso ze kwatasi.

 Kufana ka pilu kaufela ki kalulo ya “bulapeli” bwatabela Mulimu. (Jakobo 1:27) Mufani yatusa babatokwile utabisa Mulimu, mi ukolotisa Mulimu ka bufani bwahae. (Liproverbia 19:17) Bibele ibulela kuli Mulimu yena kasibili ukakutiseza mufani.—Luka 14:12-14.

 Haiba mufani aeza cwalo kabakala buitati.Ka mutala:

•   Kubata kutabisa batu.—Mateu 6:2.

•   Kubata kukutisezwa.—Luka 14:12-14.

•   Kubata kukwahela sibi.—Samu 49:6, 7.

 Haiba mutu afa mpo yeitusiswa kwa lika zatoile Mulimu. Ka mutala, kufosahalile kufa mutu masheleñi kuli aeze papali ya likwinano za masheleñi kamba kuitusisa maswe milyani yekola kamba kunwa maswe bucwala. (1 Makorinte 6:9, 10; 2 Makorinte 7:1) Hape hakusika luka kutusa mutu yakona kuipumanela za kwa mubili kono haalati feela kusebeza.—2 Matesalonika 3:10.

 Haiba kueza cwalo kupaleliswa mutu kupeta buikalabelo bwamufile Mulimu bwa kubabalela lubasi lwahae. Bibele ibulela kuli litoho za mabasi baswanela kufumanela mabasi abona lika zebatokwa. (1 Timotea 5:8) Hakusika luka kuli toho ya lubasi atuse hahulu batu babañwi kuli mane apalelwe nihaiba kubabalela lubasi lwahae. Ka kuswana, Jesu naanyazize batu bane bahana kubabalela bashemi babona ba basupali ka kubulela kuli maluwo abona kaufela neli “mpo yeneezwi ku Mulimu.”—Mareka 7:9-13.