Jesu Ulupilisa ka Mukwa Ufi?
Kalabo ya Bibele
Jesu naapilisize batu babasepahala hanaafile bupilo bwahae sina sitabelo sa tiululo. (Mateu 20:28) Kacwalo, Bibele ibiza Jesu kuli ki “Mupilisi wa lifasi.” (1 Joani 4:14) Hape ibulela kuli: “Kupiliswa hakuyo ku yomuñwi usili, kakuli hakuna libizo lisili mwatasaa lihalimu lebafilwe batu leluka piliswa ka lona.”—Likezo 4:12.
Jesu ‘naashwezi batu kaufela’ bababonisa tumelo ku yena. (Maheberu 2:9; Joani 3:16) Hasamulaho, “Mulimu naamuzusize kwa bafu,” mi Jesu akutela kwa lihalimu sina sibupiwa sa moya. (Likezo 3:15) Teñi ko, Jesu wakona “kupilisa ka kutala babaatumela Mulimu ka tapelo, kakuli wapila kamita kuli abakupele.”—Maheberu 7:25.
Ki kabakalañi halutokwa Jesu kuli alukupele?
Kaufelaa luna lu baezalibi. (Maroma 3:23) Sibi silupaleliswa kusutelela ku Mulimu, mi sitahisa lifu. (Maroma 6:23) Kono Jesu usebeza sina “muyemeli” wa batu bababonisa tumelo mwa sitabelo sahae sa tiululo. (1 Joani 2:1, litaluso ze kwatasi) Wabakupelanga ka taata ku Mulimu kuli autwe litapelo zabona ni kuswalela libi zabona ka sitabelo sa Jesu. (Mateu 1:21; Maroma 8:34) Mulimu waalabanga zakupa Jesu kakuli zalumelelana ni tato Yahae. Mulimu naalumile Jesu fa lifasi “kuli lifasi lito piliswa ka yena.”—Joani 3:17.
Kana lutokwa feela kulumela ku Jesu kuli lupiliswe?
Batili. Nihaike kuli lutokwa kulumela ku Jesu kuli lupiliswe, kunani lika zeñwi zelutokwa kueza. (Likezo 16:30, 31) Bibele ibulela kuli: “Sina mubili osina moya hauli oshwile, ni tumelo haisina misebezi ishwile.” (Jakobo 2:26) Kuli lupiliswe, lutokwa:
Kuituta ka za Jesu ni Ndatahe, yena Jehova.—Joani 17:3.
Kubonisa tumelo ku bona.—Joani 12:44; 14:1.
Kubonisa tumelo yaluna ka kuutwa litaelo zabona. (Luka 6:46; 1 Joani 2:17) Jesu naalutile kuli haki mutu kaufela yanaa mubizize kuli “Mulena” yakapiliswa kono ki mutu feela “yaeza tato ya [Ndatahe] ya kwa mahalimu.”—Mateu 7:21.
Kuzwelapili kubonisa tumelo yaluna kusina taba ni miinelo yetaata yelukona kukopana ni yona. Jesu naabonisize butokwa bwa kueza cwalo hanaabulezi kuli: “Yaitiisize kuisa kwa mafelelezo ukapiliswa.”—Mateu 24:13.
Hape Mwendi Mwakona Kutabela Litaba Ze
LITIMANA ZA MWA BIBELE ZETALUSIZWE
Joani 3:16—“Kakuli Mulimu Naalatile Hahulu Lifasi”
Jehova Mulimu naabonisize cwañi kuli ulata mañi ni mañi waluna mi ubata kuli lupile kuya kuile?
LITUTO ZA BUTOKWA ZA MWA BIBELE
Ki Kabakalañi Jesu Hanaashwile?
Mwendi muutwile kuli Jesu naashwezi libi zaluna. Kono kana lifu la mutu alimuñwi lakona kutusa batu babañata-ñata?
TAWALA YA MULIBELELI
Ki Lika Mañi Zemuswanela Kueza Kuli Mupile Bupilo Bobunde?
Mutokwa kueza nto yeñwi kuli mupile bupilo bobunde bo Mulimu alelezi batu babamulata.
