Batu babatanga kuziba mulelo wa bupilo mwa linzila zeshutana-shutana, inge cwalo ka kubuza kuli, ‘Ki kabakalañi haluli teñi fa lifasi?’ kamba ‘Nipilelañi?’ Bibele ibonisa kuli Mulimu naalubupile kuli lube balikani bahae. Halunyakisiseñi zeñwi za lituto za butokwa za niti zefumaneha mwa Bibele.

•   Mulimu ki yena Mubupi waluna. Bibele ibulela kuli: “Ki [Mulimu] yalubupile, isiñi luna beñi.”—Samu 100:3, litaluso ze kwatasi; Sinulo 4:11.

•   Kunani libaka Mulimu hanaabupile lika, kukopanyeleza cwalo ni luna.—Isaya 45:18.

•   Mulimu ulubupile ni takazo ya ‘kutokwa za Mulimu,’ mi kueza cwalo kukopanyeleza kubata kuziba mulelo wa bupilo. (Mateu 5:3) Ubata kuli lukulise takazo yeo.—Samu 145:16.

•   Lukulisa takazo yaluna ya kutokwa za Mulimu ka kuba balikani bahae. Nihaike kuli batu babañwi baikutwa kuli habakoni kuba balikani ba Mulimu, Bibele ilususueza kuli: “Musutelele ku Mulimu, mi ukasutelela ku mina.”—Jakobo 4:8; 2:23.

•   Kuli lube balikani ba Mulimu, luswanela kupila ka kuya ka mulelo wahae ka za batu. Bibele italusa mulelo wo kwa liñolo la Muekelesia 12:13, lelili: “[Musabe] Mulimu wa niti mi [mumamele] milao yahae, kakuli nelubupilwe kuli lueze cwalo.”—Bibele ya Good News Translation.

•   Kwapili, lukaiponela mulelo wa Mulimu wa kwa makalelo ka za batu hautalelezwa ka kutala, Mulimu haakafelisa manyando ni kufa balikani bahae, bona batu baba mulapela, bupilo bobusa feli.—Samu 37:10, 11.