LITIMANA ZA MWA BIBELE ZETALUSIZWE
1 Pitrosi 5:6, 7—“Kabakaleo, Muikokobeze Mwatasaa Lizoho la Mulimu Lelimaata, . . . Inze Munepela Lipilaelo Zamina Kaufela ku Yena”
“Ka mukwa ocwalo, muikokobeze mwatasaa lizoho lelimaata la Mulimu, kuli amipahamise ka nako yateñi, inze munepela lipilaelo zamina kaufela ku yena, kakuli wamiisa pilu.”—1 Pitrosi 5:6, 7, Bibele ya Toloko ya Lifasi Lelinca.
“Kabakaleo, muikokobeze mwatasaa lizoho la Mulimu lelimaata, kuli amipahamise ka nako yeswanela, inze munepela lipilaelo zamina kaufela ku yena, kakuli wamiisa pilu.”—1 Pitrosi 5:6, 7, Bibele ya New King James Version.
Taluso ya Liñolo la 1 Pitrosi 5:6, 7
Ka kuitusisa manzwi a, muapositola Pitrosi ukolwisa Bakreste kuli bakona kulapela ku Mulimu kumutaluseza butata bobakopana ni bona ni lika zebabilaeza. Mulimu ushemubanga batu babaikokobeza mi uka bafuyola hahulu.
“Muikokobeze mwatasaa lizoho la Mulimu lelimaata.” Mwa Bibele, pulelo ya lizoho la Mulimu hañata iamanga kwa maata ahae a kupilisa kamba kusileleza. (Exoda 3:19; Deuteronoma 26:8; Ezira 8:22) Bakreste baikokobeza mwatasaa lizoho la Mulimu habaitinga ku yena. Baziba faafita maata abona mi baziba kuli habakoni kutiyela miliko kaili bona. (Liproverbia 3:5, 6; Mafilipi 4:13) Banani buikolwiso bwa kuli Mulimu unani maata a kubatusa ka nako yeswanela ni ka nzila yende.—Isaya 41:10.
“Kuli amipahamise ka nako yeswanela.” Batu babatiyela miliko ka pilu-telele bakona kuba ni buikolwiso bwa kuli Mulimu uka bapahamisa kamba kubafuyola kwapili. Haana kutuhelela batanga bahae kulikiwa kuya kuile kamba kulikiwa ki muliko obasa koni kutiyela. (1 Makorinte 10:13) Kono haiba bazwelapili kueza zende, Mulimu uka bafuyola luli “ka nako yateñi.”—Magalata 6:9.
“Inze munepela lipilaelo zamina kaufela ku yena, kakuli wamiisa pilu.” Bakreste bakona kunepela lipilaelo zabona kaufela ku Mulimu ka kulapela ku yena ka buikokobezo. Hatiso yeñwi ibulela kuli: “Linzwi la kunepela lelitalusa kezo, libonisa buikatazo bolukona kueza kuli luyumbe nto yeñwi. Libonisa nto yaeza mutu inze aziba.” Mukreste hasaa nepezi lipilaelo zahae ku Mulimu, haana kubilaezwa hahulu ki zona mi ukaba ni “kozo ya Mulimu” yetalusizwe mwa Bibele. (Mafilipi 4:6, 7) Wakona kuba ni buikolwiso bwa kuli Mulimu ubata kumutusa kakuli waziba kuli Mulimu wamuisa pilu ni kuli wakona kuitusisa maata ahae amatuna kumutiisa.—Samu 37:5; 55:22.
Litaba zeñwi zeswalisana ni litaba ze kwa 1 Pitrosi 5:6, 7
Kauhanyo 5 ki yona ya mafelelezo mwa liñolo lapili lanaañozi muapositola Pitrosi kwa Bakreste. (1 Pitrosi 1:1) Ka kuswana ni kacenu, balateleli ba Kreste ka nako yeo, nebakopana ni miliko yeshutana-shutana yenelikile tumelo yabona mi neikona kubabilaeza. (1 Pitrosi 1:6, 7) Pitrosi naaziba butata bone bakopana ni bona, kacwalo ibato ba ka 62-64 C.E abañolela liñolo la kubatiisa ni kubasusueza.—1 Pitrosi 5:12.
Pitrosi ufeza liñolo lahae ka kususueza Bakreste babakopana ni miliko kabakala tumelo yabona. Haiba bazwelapili kuikokobeza ni kuitinga ku Mulimu, bakona kuba ni buikolwiso bwa kuli Mulimu uka batusa kuitiisa. (1 Pitrosi 5:5-10) Ka mukwa oswana, manzwi a Pitrosi akona kususueza Bakreste babanyandiswa kacenu.
Mubuhe vidio yekuswani ye kuli mubone litaba zeñwi zefumaneha mwa buka ya 1 Pitrosi.
Hape Mwendi Mwakona Kutabela Litaba Ze
LITIMANA ZA MWA BIBELE ZETALUSIZWE
Mafilipi 4:6, 7 Italusizwe—“Musike Mwabilaezwa ki Sesiñwi”
Ki litapelo zecwañi zekona kutusa batanga ba Mulimu kufelisa lipilaelo ni kubatusa kuba ni kozo ya mwa munahano?
LITUTO ZA BUTOKWA ZA MWA BIBELE
Kana Mulimu Wautwa Litapelo Kaufela?
Kono kucwañi haiba mutu alapela ka mulelo wa buitati? Kucwañi haiba muuna anyandisa musalaa hae, mi kihona akupa kuli Mulimu amufuyole?
LITIMANA ZA MWA BIBELE ZETALUSIZWE
Mika 6:8 Italusizwe—“Uzamaye ka buikokobezo ni Mulimu wahao”
Timana ye italusa ka bukuswani zatokwa Mulimu kuli lueze ka kuitusisa lipulelo zetaalu za butokwa.
LITUTO ZA MWA BIBELE
Liitusiso Zetusa Kwa Kuituta Bibele
Mukete liitusiso zemubata kuitusisa kuli muitute Bibele ka nzila yekatahisa kuli muikole litaba zemuituta ni kuitebuha zona.
