“Niha nizamaya mwa musindi wa lififi lelituna, hanisabi sesiñwi, kakuli wena uinzi ni na; tupa yahao ni mulamu wahao liniwisa pilu.”—Samu 23:4, Bibele ya Toloko ya Lifasi Lelinca.

 “Niha Nikazamaya Mwa Musindi wa Muluti wa Lifu, hanina kusaba bumaswe niheba bulibuñwi; kakuli Wena uinzi ni na; mulamu wahao, ni lusata lwahao, ki zona zeniomba-omba.”—Samu 23:4, Bibele ya King James Version.

 Mulimu wasilelezanga ni kubabalela batanga bahae, mane niha bakopana ni miinelo yetaata. Mwa timana ye, kuitusisizwe swanisezo ya ngu ye mwa pabalelo ya mulisanaa yona, ili kubonisa mo Mulimu ababalelanga batanga bahae. a Habaikutwangi kuli bainzi banosi habakopana ni miinelo yetaata, yetalusizwe mwa timana ye sina kuzamaya mwa musindi wa lififi lelituna kamba kuba mwa muinelo okona kubeya bupilo bwabona mwa lubeta. Baikutwa kusilelezwa inge kuli Mulimu uinzi ni bona luli.

 Ka nako yeneñolwa Bibele, mulisana naaitusisanga mulamu wahae kuli asileleze lingu zahae kwa libatana. Hape hañata naaitusisanga mulamu wahae, ili one uli omutelele ni osikami kwa mafelelezo, kuli aetelele lingu kamba kulihoha kuli alisileleze kwa kozi. Ka mukwa oswana, Jehova Mulimu uswana sina mulisana yalilato yasileleza ni kuetelela batanga bahae. Mane niha bakopana ni miinelo yetaata hahulu mwa bupilo, Jehova wabababalelanga mwa linzila zeshutana-shutana.

•   Ubaluta ni kubaomba-omba ka Linzwi lahae, yona Bibele.—Maroma 15:4.

•   Wautwanga litapelo zabona mi ubafanga kozo ya mwa munahano.—Mafilipi 4:6, 7.

•   Uitusisanga Bakreste babañwi kuli babasusueze.—Maheberu 10:24, 25.

•   Ubafa sepo ya kupila bupilo bobunde kwapili, ili nako yeo akafelisa miinelo kaufela yemaswe yebakopana ni yona ka nako ya cwale.—Samu 37:29; Sinulo 21:3-5.

 Davida ki yena yanaañozi Samu 23, mi naabanga mulisana ka nako yanaali mutangana, mi hasamulaho, aba mulena wa sicaba sa Isilaele waikale. (1 Samuele 17:34, 35; 2 Samuele 7:8) Samu yeo ikala ka kutalusa Jehova kuli ki Mulisana yaetelela, yafepa, ni yakatulusa batanga bahae, sina feela mwaezezanga mulisana wa lingu.—Samu 23:1-3.

 Kwa Samu 23:4, Davida haama ku Mulimu, uitusisize linzwi la (wena). Nto ye ibonisa kuli Davida unani silikani sesitiile ni Jehova. Davida naaziba kuli Mulimu naamubabalela mi naaziba miliko yanaakopana ni yona mwa bupilo. Kabakaleo, Davida naasasabi sesiñwi.

 Hamulaho wa kubulela za swanisezo ya mulisana ni lingu zahae, Samu 23 timana 5 ni 6 iitusisa swanisezo ya muñaa ndu ni muenyi. Sina muñaa ndu yasishemo, Jehova uamuhela hande Davida sina muenyi yakutekeha. Nihaiba lila za Davida halikoni kupaleliswa Mulimu kubabalela Davida. Kwa mafelelezo a samu yeo, Davida ubonisa kuli unani buikolwiso bwa kuli Mulimu uka mubonisa bunde ni lilato mwa mazazi a bupilo bwahae kaufela.

 Swanisezo ye kwa Samu 23 ibonisa kuli Jehova ki Mulimu yalilato, ili yazwelapili kubabalela batanga bahae.—1 Pitrosi 2:25.