LITIMANA ZA MWA BIBELE ZETALUSIZWE
Samu 46:10—“Amukuze, mi Muzibe Kuli ki Na Mulimu”
“Amukoze mi muzibe kuli ki na Mulimu. Nikabubekwa mwahalaa macaba; Nikabubekwa mwa lifasi.”—Samu 46:10, Bibele ya Toloko ya Lifasi Lelinca.
“Amukuze, mi muzibe kuli ki Na Mulimu: Nikabubekwa mwahalaa macaba, Nikabubekwa mwa lifasi.”—Samu 46:10, Bibele ya King James Version.
Taluso ya liñolo la Samu 46:10
Mulimu ususueza batu kaufela kuli bamulapele ni kuziba kuli ki yena yanani tukelo ya kubusa lifasi. Hakuna mutu ni yomukana yakona kulatula maata ahae.—Sinulo 4:11.
“Amukoze mi muzibe kuli ki na Mulimu.” Litoloko zeñwi za Bibele litolokile kalulo yapili ya timana ye kuli “amukuze.” Ki lona libaka batu babañata habanani mubonelo ofosahalile wa kuli balaezwi kubonisa likute kamba kukuza feela habali mwa keleke. Nihakulicwalo, pulelo ya Siheberu yetolokilwe kuli “amukoze mi muzibe kuli ki na Mulimu” ki kelezo yezwa ku Jehova a Mulimu mi ueleza batu ba macaba kaufela, ubaeleza ka taata kuli batuhele kumulwanisa ni kuli balemuhe kuli ki yena feela yaswanela kulapelwa.
Lufumana manzwi aswana kwa Samu 2. Kwa liñolo leo, Mulimu usepisa kuli ukaanga muhato wa kuyundisa baba mulwanisa. Kono babalemuha maata ahae baitinga ku yena kuli abaetelele, abafe maata, ni butali. Banani tabo mi baikutwa kusilelezwa, sihulu habakopana ni miinelo yetaata, kakuli “[basabela] ku Yena.”—Samu 2:9-12.
“Nikabubekwa mwahalaa macaba; Nikabubekwa mwa lifasi.” Kwamulaho, Jehova naabubekilwe hanaaitusisize maata ahae amatuna kusileleza batu bahae. (Exoda 15:1-3) Kwapili, ukabubekwa hahulu nikufita, muta batu kaufela fa lifasi bakaipeya kwatasaa zamaiso yahae ni kumulapela.—Samu 86:9, 10; Isaya 2:11
Litaba zeñwi zeswalisana ni litaba ze kwa Samu 46:10
Hatiso yeñwi ibulela kuli Samu 46 “ki pina ya milumbeko yebonisa maata a Mulimu, yena musilelezi yamaata wa batu bahae.” Batu ba Mulimu hane baopelanga Samu 46, nebabonisanga kuli basepile Jehova kuli wakona kubasileleza ni kubatusa. (Samu 46:1, 2) Manzwi a kwa liñolo leo naabahupulisanga kuli Jehova uinzi ni bona kamita.—Samu 46:7, 11.
Kuli batiise sepo yabona ku Jehova Mulimu ya kuli unani maata a kubasileleza, samu yeo nei basusuezanga kunahanisisa misebezi yahae yemaata. (Samu 46:8) Samu yeo sihulu neibonisa kuli Jehova wakona kufelisa lindwa. (Samu 46:9) Ka mubulelelo omuñwi, Jehova naafelisize lindwa mwa linako zene iñolwa Bibele ka kusileleza batu bahae kwa macaba anaali lila zabona. Nihakulicwalo, Bibele isepisa kuli hona cwale-cwale fa, Mulimu mane ukaeza cwalo ka nzila yeipitezi ka kufelisa lindwa mwa lifasi kaufela.—Isaya 2:4.
Kana Jehova usatusa batanga bahae kacenu? Eni. Mane muapositola Paulusi naasusuelize hahulu Bakreste kuitinga ku yena kuli abatuse. (Maheberu 13:6) Manzwi a kwa Samu 46 alutusa kuba ni sepo yetiile ya kuli Mulimu unani maata a kulusileleza. Alutusa kuunga Mulimu sina “masabelo aluna ni maata aluna.”—Samu 46:1.
Mubuhe vidio yekuswani ye kuli mubone litaba zeñwi zefumaneha mwa buka ya Lisamu.
a Jehova ki lona libizo la Mulimu. (Samu 83:18) Mubone taba yeli “Jehova ki Mañi?”
Hape Mwendi Mwakona Kutabela Litaba Ze
LITIMANA ZA MWA BIBELE ZETALUSIZWE
Jeremia 29:11 Italusizwe—“Niziba Seni Milelezi, Senihupuzi ka Mina”
Kana Mulimu ulelezi cimo zekaezahala ku mañi ni mañi waluna?
LITUTO ZA BUTOKWA ZA MWA BIBELE
Ki Mañi Musimululi wa Bibele?
Kambe batu ki bona bane bañozi Bibele, kana nekuka swanela kuibiza kuli ki Linzwi la Mulimu? Mwa Bibele kufumaneha maikuto a mañi?
LITUTO ZA MWA BIBELE
Liitusiso Zetusa Kwa Kuituta Bibele
Mukete liitusiso zemubata kuitusisa kuli muitute Bibele ka nzila yekatahisa kuli muikole litaba zemuituta ni kuitebuha zona.
