Exoda 11:1-10
11 Jehova kihaa li ku Mushe: “Kusanani koto iliñwi yenika tisa fahalimwaa Faro ni Egepita. Hamulaho wa koto yeo, uka milukulula kuli muzwe mwa sibaka se.+ Nako yaka milukulula, ikaba kumilelekisa luli mwa sibaka se.+
2 Cwale bulelela batu kuli baana ni basali kaufela bakupe babayahile ni bona lika za silivera ni za gauda.”+
3 Mi Jehova atahisa kuli Maisilaele bashemubiwe ki Maegepita. Mi hape Mushe kasibili naakutekeha hahulu mwa naha ya Egepita mwahalaa batanga ba Faro ni mwahalaa sicaba.
4 Cwale Mushe ali: “Jehova sabulezi ki se: ‘Fahalaa busihu nikaya mwahalaa Egepita,+
5 mi mweli kaufela mwa naha ya Egepita ukashwa,+ kukala ka mweli wa Faro yainzi mwa lubona lwahae kuisa ku mweli wa mutanga wamusizana yabelekela kwa sibelelo, mane ni limunanu za maizibulo kaufela likashwa.+
6 Mwa naha kaufela ya Egepita kukaba ni sililo sesituna sesisambaaba sibeteñi, ili sesisike sabateñi hape.+
7 Kono hakuna kuba nihaiba nja yekahuhula* Maisilaele, yekahuhula batu kamba limunanu zabona, ilikuli muzibe kuli Jehova wakona kukauhanya Maisilaele kwa Maegepita.’+
8 Mi batanga bahao kaufela bakataha ku na mi bakato kubama ni kuwiseza lipata zabona fafasi, inze bali: ‘Hakuye, wena ni batu bahao kaufela baba kulatelela.’+ Mi hasamulaho, nikaya.” Mushe amano bulela cwalo, azwa fapilaa Faro ahalifile hahulu.
9 Cwale Jehova ali ku Mushe: “Faro haana kumiutwa,+ ilikuli niatise limakazo zaka mwa naha ya Egepita.”+
10 Mushe ni Aruni baeza limakazo ze kaufela fapilaa Faro,+ kono Jehova atuhelela Faro kutatafala pilu, mi Faro naasika lukulula Maisilaele kuzwa mwa naha yahae.+
Litaluso ze kwatasi
^ Linzwi ka linzwi, “yekashengela lulimi lwayona.”
