Liproverbia 22:1-29
22 Sesiswanela ki kuketa libizo lelinde* kufita bufumu bobuñata;+
Kufiwa likute* ki kokunde kufita silivera ni gauda.
2 Bafumi ni babotana baswana ka nzila ye:*
Bubeli bwabona babupilwe ki Jehova.+
3 Yabutali ubona kozi mi waipata,Kono babasina zibo bazwelapili cwalo mi hasamulaho bautwa butuku.*
4 Mupuzo wa buikokobezo ni kusaba JehovaKi bufumu ni kanya ni bupilo.+
5 Miutwa ni tutwa li mwa nzila ya mutu yasasepahali,Kono mutu kaufela yatokomela bupilo* bwahae u kwahule hahulu ni zona.+
6 Luta mwana* nzila yaswanela kuzamaya ku yona;+Nihaka supala haana kukeluha ku yona.+
7 Mufumi ubusa babotana,Mi yakalima ki mutangaa mutu yamukalimile.+
8 Mutu kaufela yacala kusaluka ukakutula ziyezi,+Mi tupa ya buhali bwahae ikalobeha.+
9 Mutu yafana* ukafuyaulwa,Kakuli uikabela lico zahae ni babotana.+
10 Leleka mutu wa kashwau,Mi lifapahano likafela;Likomano* ni matapa likafela.
11 Yalata kuba ni pilu yekenile, ili wa lipulelo zemusaUkaba mulikanaa mulena.+
12 Meeto a Jehova abukeleza zibo,Kono ufilikanya manzwi a babasa sepahali.+
13 Yabuzwa uli: “Kunani tau fande!
Nikabulaelwa fahalaa patelo!”+
14 Mulomo wa basali ba mizamao yemaswe* ki mukoti otungile.+
Yanyaziwa ki Jehova ukawela mwateñi.
15 Bukuba butomile mibisi mwa pilu ya mwana,*+Kono tupa ya kalimelo ika buzwisa ku yena.+
16 Yabukula mubotana kuli aekeze kwa bufumu bwahae+Ni yafa bafumi limpoUkakenelwa ki bubotana.
17 Sikeka zebe yahao, uutwe manzwi a bababutali,+Kuli uise pilu yahao kwa zibo yaka,+
18 Kakuli kwatabisa kuabuluka mwa pilu yahao,+Ilikuli kaufelaa ona abe fa milomo yahao nako kaufela.+
19 Nikufa zibo kacenu,Kuli usepe Jehova.
20 Kikuli hanisika kuñolela kale,Kukufa kelezo ni zibo,
21 Kukuluta manzwi a niti ni asepahala,Ilikuli ukone kukutisa piho yenepahezi ku yakulumile?
22 Usike wauzweza mubotana kabakala kuli ki mubotana,+Mi usike wanyandisa mutu yashebile mwa munyako wa muleneñi,+
23 Kakuli Jehova uka bazekela taba yabona+Mi ukafelisa bupilo* bwa baba babukula.
24 Usike watwaelana ni mutu wa kacimacimaKamba kuswalisana ni mutu wa mabifi,
25 Kuli usike waituta linzila zahaeNi kuikenya mwa lilaba.+
26 Usike waina mwahalaa babaswalana mwa mazoho kueza buitamo,Babasepisa kulifa likoloti za babañwi.+
27 Haiba utokwile sa kulifa,Ukaamuhiwa mumbeta wahao foulobalanga!
28 Usike wasutisa sisupo sa mululwani sakaleSene siezizwe ki bo kuku wahao.+
29 Kana seulemuhile mutu wa sikwala haeza musebezi wahae?
Mutu yo ukayema fapilaa malena;+Haana kuyema fapilaa batu-tu feela.
Litaluso ze kwatasi
^ Linzwi ka linzwi, “Kushemubiwa.”
^ Kamba “libubo lelinde.” Linzwi ka linzwi, “libizo.”
^ Linzwi ka linzwi, “bakopanela fa.”
^ Kamba “bafiwa koto.”
^ Kamba “moyo.”
^ Linzwi ka linzwi, “mushimani.”
^ Linzwi ka linzwi, “Yanani liito lelinde.”
^ Kamba “Mizeko.”
^ Linzwi ka linzwi, “mushimani.”
^ Kamba “moyo.”
