Lisamu 6:1-10
Ku muzamaisi wa lipina; kuitusiswe zelizwa za mihala zecunilwe kulila ka mulumo wa Sheminiti.* Samu ya Davida.
6 Jehova, usike wanikalimela ka buhali bwahao,Mi usike wanihakulula ka mabifi ahao.+
2 Unishemube,* wena Jehova, kakuli nisweli nafokola.
Unifolise, wena Jehova,+ kakuli masapo aka anjanja.
3 Ki cwalo, niziyelehile hahulu,+Nakukupa, Jehova—kukaanga nako yekuma kai?+
4 Kuta, wena Jehova, mi unilamulele;+Unipilise kabakala lilato lahao lelisa feli.+
5 Kakuli ku babashwile hakuna yabulela* zahao;Mwa Libita* ki mañi yaka kulumbeka?+
6 Nikatezi kabakala kutonga;+Busihu kaufela nikolobisa mumbeta waka ka miyoko;Nishomwalisa bulobalo bwaka ka kulila.+
7 Meeto aka afokolisizwe ki kulila;+Haasabona hande* kabakala batu kaufela baba nikataza.
8 Amuzwe ku na, mina kaufela babaeza zemaswe,Kakuli Jehova ukautwa sililo saka.+
9 Jehova ukautwa kupo yaka ya kuli anishemube;+Jehova ukaamuhela tapelo yaka.
10 Lila zaka kaufela likaswaba mi likaikalelwa;Likakutela mwamulaho kapili-pili ka maswabi.+
Litaluso ze kwatasi
^ Mubone Litaluso za Manzwi.
^ Kamba “Unishwele makeke.”
^ Kamba “Sheoli,” fo kikuli, sibaka sa swanisezo sa babashwile. Mubone Litaluso za Manzwi.
^ Kamba “yahupula.”
^ Kamba “Asupezi.”
