Kwa Maroma 6:1-23
6 Cwale lukabulelañi? Kana luzwelepili mwa sibi, kuli sishemo sa Mulimu siate?
2 Kutokwa nihanyinyani! Haubona lushwile kwa neku la sibi,+ lukazwelapili cwañi kupila mwa sibi?+
3 Kamba kana hamuzibi kuli kaufelaa luna bane bakolobelizwe ku Kreste Jesu+ nelukolobelizwe ka lifu lahae?+
4 Hakulicwalo, nelupumbekilwe ni yena ka kolobezo yaluna mwa lifu lahae,+ kuli sina Kreste hanaazusizwe kwa bafu ka kanya ya Ndate, ni luna luswanela kuzamaya ka bupilo bobunca.+
5 Haiba luswalisani ni yena ka lifu leliswana ni lahae,+ kaniti lukaswalisana hape ni yena ka zuho yeswana ni yahae.+
6 Kakuli lwaziba kuli mikwa yaluna yakale neikokotezwi ni yena fa kota,+ kuli mubili waluna wa sibi usike waba ni maata,+ ilikuli lutuhele kuba batanga ba sibi.+
7 Kakuli yashwile ulukuluzwi* kwa sibi sahae.
8 Hape, haiba lushwile ni Kreste, lulumela kuli hape lukapila ni yena.
9 Kakuli lwaziba kuli, bakeñisa kuli Kreste cwale uzusizwe kwa bafu,+ haasana kushwa hape;+ lifu halisana maata fahalimwaa hae.
10 Kakuli lifu lanaashwile, neli la kushwa feela hañwi kuli afelise sibi,*+ kono bupilo bwapila, ubupilela Mulimu.
11 Ni mina ka mukwa oswana, muipale kuli mushwile luli kwa neku la sibi kono mupilela Mulimu ka Kreste Jesu.+
12 Kabakaleo musike mwatuhelela sibi kuzwelapili kubusa sina mulena mwa mibili yamina yeshwa+ ka kumihapeleza kuutwa litakazo zayona.
13 Mi musike mwafa mibili* yamina kwa sibi sina libelekiso za bumaswe, kono muifane ku Mulimu sina babazuhile kwa bafu, ni kufa mibili* yamina ku Mulimu sina libelekiso za kuluka.+
14 Kakuli sibi hasilukeli kumibusa, kakuli hamuyo mwatasaa mulao+ kono mu mwatasaa sishemo sa Mulimu.+
15 Cwale lukabulelañi hape? Kana lwaswanela kueza sibi kabakala kuli haluyo mwatasaa mulao kono lu mwatasaa sishemo sa Mulimu?+ Kutokwa nihanyinyani!
16 Kana hamuzibi kuli haiba muifana ku mutu ufi kamba ufi, sina batanga bahae baba muutwa, mu batanga ba yo yemuutwa,+ ibe ba sibi+ sesilibisa kwa lifu,+ kamba ba kuutwa kokulibisa kwa kuluka?
17 Kono niitumela ku Mulimu kakuli nemubanga batanga ba sibi, kono kuzwelela kwa pilu mumamezi mufuta wa tuto yene mufilwe.
18 Ki cwalo, bakeñisa kuli nemulukuluzwi kwa sibi,+ nemufetuhile batanga ba kuluka.+
19 Nibulela sina mutu kabakala bufokoli bwa nama yamina; kakuli sina hane mufanile lilama zamina kuba batanga ba zemasila ni zemaswe ili zelibisa kwa bumaswe, cwale mufe lilama zamina sina batanga ba kuluka kokulibisa kwa bukeni.+
20 Kakuli hane muli batanga ba sibi, nemulukuluhile kwa neku la kuluka.
21 Cwale ki muselo mañi one mubeyanga ka nako yani? Ki lika zese muswabela cwale. Kakuli mafelelezo a lika zeo ki lifu.+
22 Kono cwale, bakeñisa kuli nemulukuluzwi kwa sibi mi mubile batanga ba Mulimu, mubeya muselo wamina mwa nzila ya bukeni,+ mi mafelelezo ki bupilo bobusa feli.+
23 Kakuli mupuzo wa sibi ki lifu,+ kono mpo yafa Mulimu ki bupilo bobusa feli+ ka Kreste Jesu Mulenaa luna.+
Litaluso ze kwatasi
^ Kamba “uswalezwi.”
^ Fo kikuli, azwise sibi.
^ Linzwi ka linzwi, “lilama.”
^ Linzwi ka linzwi, “lilama.”
