“Mu Zwelepili ku ba Bukaufi ni Jehova!” Mukopano wa Sikiliti wa Lipaki za Jehova

● Mikopano ya mazazi a malalu ye likiti-kiti, ili ye ka ezwa lifasi kaufela, i tomahanyelizwe ku ezwa mwa Zambia ku kala ka kweli ya August. Mwa Zambia, mikopano yeo i ka kalisanga ka lipina ka 8:20 hrs. Toho ya taba ya lizazi la pili ye tomile fa liñolo la Samu 73:28 i li “Buswa Bwa ka, ki ku Sutelela ku Mulimu.” Ngambolo ya muina-situlo i ka latelelwa ki lingambolo ze li “Mikopano I lu Tusa ku Sutelela ku Jehova” ni “Mwana U Lata ku Talusa Ndate.” Hasamulaho, ku ka ba ni ngambolo ya ka ku tatamana ye li “Mu Likanyise Batu ba ne ba Zwezipili ku ba Balikani ba Batuna ba Jehova,” ye ka nyakisisa ka mo Abrahama, Ruti, Ezekiasi ni Maria ne ba ezelize cwalo. Tukiso ya kakusasana i ka unguka ka ngambolo ye tuna ye li “Ka mo Jehova A Sutelela ku Luna.”

Ngambolo ya pili ye ka fiwa fa lizazi la pili musihali i li “Ku Alaba Lipuzo ka za Jehova” mi i ka latelelwa ki lingambolo ze li “Mu Amuhele Kalimelo ya Jehova” ni “Mu si ke Mwa ‘Nyemela Jehova.’” Hasamulaho, ku ka ba ni ngambolo ya ka ku tatamana ya likalulo ze ketalizoho ye li “Ku Ambolisana ku Tusa Mabasi ku ba Bukaufi ni Jehova.” Likalulo zeo li ka ba ni litoho za taba ze li “Jehova ki Muamboli yo Mutuna,” “Baana, mu Ambolisanange ni Basali ba Mina!,” “Basali, mu Ambolisanange ni Baana ba Mina!,” “Bashemi, mu Ambolisanange ni Bana ba Mina!,” ni “Bana, mu Ambolisanange ni Bashemi ba Mina!” Kalulo ya musihali i ka fela ka ngambolo ye li “Pupo I Patulula ‘Mulimu ya Pila’!”

Toho ya taba ya lizazi la bubeli i li “Ya Lukile U Latwa ki Yena,” ye tomile fa liñolo la Liproverbia 3:32. Ngambolo ya ka ku tatamana ya likalulo ze ketalizoho ye li “Mu Tuse Batu Kuli ba ‘Kutisane ni Mulimu’” i ka ba ni likalulo ze li “Ba Kwahule mi ha ba na Sepo,” “A ba Buza,” “Mu Tuse be mu Kutaza ni Bona,” “Mu ba Kolwise ka Mizamao ye Minde,” ni “Mu Tukufalelwe mi mu Tundamene.” Hamulaho wa lingambolo ze li “Sebelezo ya Nako Kaufela I Tiisa Bulikani Bwa Mina ni Jehova” ni “Ba ba Lata Jehova ‘ha ku na se si ka ba Yaulula,’” ku ka latelela ngambolo ya mafelelezo kakusasana, ili ngambolo ya kolobezo. Mi hamulaho, ba ba kwanisize ze tokwahala za kuli ba kolobezwe ba ka kolobezwa.

Tukiso ya musihali lizazi la bubeli i ka ba ni ngambolo ya ka ku tatamana ya likalulo ze 8, ye li, “Mu si ke Mwa Tuhelela Nto Ifi Kamba Ifi ku mi Kauhanya ku Jehova”—“Malaba a Satani,” “Ku Itumba,” “Mali,” “Buikangulo,” “Ku Keta za ku Eza Mwa Bupilo,” “Ku Itabisa,” “Lubasi,” ni “Bumapangapanga.” Kihona ku ka latelelwa ki drama ye ipitezi ya ku teeleza feela ye li “Mu si ke Mwa Fela Pilu ha mu Kalimelwa ki Jehova!” Ngambolo ya mafelelezo fa lizazi la bubeli i ka ba ni toho ya taba ye li “Mu Zwelepili ku ba Bukaufi ni Jehova Sina Mwa Naa Ezelize Jeremia.”

Toho ya taba ya lizazi la bulalu i li “Mu Kumalele ku Jehova,” mi i tomile fa liñolo la Joshua 23:8, NW. Hamulaho wa pina ni tapelo ya kakusasana, ku ka ba ni ngambolo ya ka ku tatamana ye li “Ku Itebuha Tulemeno Twa Jehova to Tunde.” Ngambolo yeo i ka lundulula tulemeno twa hae to tu 8 to tu latelela: “Ku Atumeleha,” “Mufelañeke,” “Buitebuho,” “Bufani,” “Kutokwa Ketululo,” “Ku Swalela,” “Kutwisiso,” ni “Busepahali.” Ku ka latelelwa ki ngambolo ya nyangela ye li “Mu Kona ku Sutelela Cwañi ku Mulimu?” Kalulo ya kakusasana i ka unguka ka ngambolo ye kusufalizwe ya ka sunda ya Tawala ya Mulibeleli.

Fa lizazi la bulalu musihali, ku ka ba ni tukiso ye ipitezi ya drama ya ba ba apezi mikanjo ye ka bonisa za bupilo bwa mwa linako za baapositola. Drama yeo i ama za ku baleha kwa Bakreste mwa Jerusalema mi i li “Mu Zamaye ka Tumelo, Isi ka ku Bona.” Hamulaho wa drama, mukopano u ka fela ka ngambolo ye li “Mu Zwelepili ku ba ‘Mwa Mukunda wa Muambakani-ya-Pahami.’”

Mu eze litukiso cwale za ku fumaneha teñi. Kuli mu fumane sibaka ko ku ka ezezwa mukopano wo se si li bukaufi ni habo mina, mu buze fa Ndu ya Mubuso ya Lipaki za Jehova ye mwa silalanda sa mina kamba mu ñolele bahatisi ba magazini ye. Kalulo ya fa Intaneti ya www.mt1130.com i bonisa libaka ko i ka ezezwa mikopano ya sikiliti lifasi kaufela.