Ba Banca Ba Buza Kuli

Ni kona ku kwanisa cwañi likonkwani za ka?

KWA lika ze talu ze latelela, ki sifi se ne mu ka tabela ku ba ni sona?

● Buikolwiso bo butuna

● Balikani ba bañata

● Tabo ye tuna

Mane mwa kona ku ba ni lika ze talu zeo kaufela! Kamukwaufi? Ka ku itomela likonkwani ni ku li kwanisa. Ha mu nyakisise litaba ze latelela.

Buikolwiso bo butuna Ha mu itomela likonkwani ze nyinyani ni ku li kwanisa, mu ka ba ni buikolwiso bwa kuli mwa kona ku kwanisa nihaiba likonkwani ze tuna. Mu ka ba ni buikolwiso bo butuna bwa kuli mwa kona ku talimana hande ni matata a ka zazi ni zazi a cwale ka ku hanyeza sineneketo ya litaka za mina. Mi mwendi ba bañwi ba ka lemuha buikolwiso bwa mina, ili nto ye ka tahisa kuli ba mi kuteke. Mwendi ba bañwi ba ka tuhela ku mi kukueza hahulu ku eza lika ze mu sa tabeli. Mane mwendi ba kona ku kala ku tabela mupilelo wa mina.—Mu bapanye Mateu 5:14-16.

Balikani ba bañata Batu ba tabelanga ku ba hamoho ni batu ba ba lata ku itomela likonkwani—batu ba ba ziba lika ze ba bata ku peta ili ba ba tabela ku eza buikatazo bwa ku peta lika zeo. Mi batu ha ba sutelela ku mina kabakala likonkwani za mina, hañata ba kona ku mi tusa ku peta likonkwani zeo.—Muekelesia 4:9, 10.

Tabo ye tuna Taba ya niti kikuli, ha ku tabisi hahulu ku ina feela ni ku libelela kuli lika ze mu bata ku peta mwa bupilo li ka ikezahalela feela. Kono ha mu itomela likonkwani ni ku li kwanisa, mu ka ikutwa mwangalwa o tahiswa ki ze mu sweli ku peta. Kona libaka muapositola Paulusi, Mukreste wa mwa miteñi ya baapositola, naa kile a bulela kuli: “Ni mata ni nze ni talimezi kwa sikonkwani.” (1 Makorinte 9:26, Bibele ye Kenile, Hatiso ya 1984) Mi mu hupule kuli ha mu itomela sikonkwani se situna, mu ka ba ni tabo ye tuna ha mu ka kwanisa sikonkwani seo!

Kana mu itukiselize ku kala ku itomela likonkwani? Mu pume likepe le li kwa bulyo ni ku li puta, mi mu latelele mihato ye kolohanyizwe. *

Mwa kona ku fumana litaba ze ñata ka za “Ba Banca ba Buza Kuli” fa Intaneti ka ku itusisa keyala ya www.watchtower.org/ype

[Litaluso za kwatasi]

 ZA KU NAHANISISA

● Kana mutu wa kona ku ba ni likonkwani ze ñata-ñata ka nako ye swana?—Mafilipi 1:10.

● Kana ku itomela likonkwani ku talusa kuli nako ni nako ya bupilo bwa mina mu swanela ku i tomahanyeza sa ku eza?—Tite 2:12.

[Mbokisi/Maswaniso a fa likepe 25, 26]

Mo mu kona ku kwaniseza likonkwani za mina

MU ZIBE LIKONKWANI ZA MINA Liproverbia 4:25, 26 1

“Mu si ke mwa saba ku itomela likonkwani ze tuna. Haiba ba bañwi ba konile ku kwanisa likonkwani zeo, ni mina mwa kona ku li kwanisa.”—Roben.

1. Mu lemuhe likonkwani ze mu kona ku itomela. Mu ikole muhato wo! Mu si ke mwa nahanisisa za ku ñola, mu ñole feela ze mu hupula ka mo mu konela kaufela. Mu like ku ñola likonkwani ze 10 kamba ze 20.

2. Mu nyake likonkwani ze mu ñozi. Ki likonkwani lifi ze mi tabisa hahulu? Ki lifi ze bonahala taata? Ki lifi ze ka mi fa hahulu tabo ha mu ka li kwanisa? Mu hupule kuli, likonkwani ze mu bona ku ba ze nde hahulu ki zona za butokwa hahulu ku mina.

3. Mu kolohanye likonkwani za mina ka ku ya ka butokwa bwa zona. Pili mu kete likonkwani ze tokwa nako ye kuswani, ili ze mu kona ku kwanisa mwa mazazi a sikai. Kihona mu ka keta likonkwani ze tokwa nako ye ñata (ze mu kona ku kwanisa mwa lisunda ze ñata kamba likweli). Mu kolokise likonkwani za mina ka ku ya ka mo mu bata ku li kwaniseza.

Mitala ya Likonkwani ze mu Kona ku Itomela

Bulikani Ni fumane mulikani ya si taka ya ka. Ni kalise silikani ni mutu ye ne ni utwananga ni yena kale.

Buikangulo Ni ezange lipapali ze tiisa mubili ka mizuzu ye 90 ka sunda. Ni lobalange ka lihora ze 8 busihu ni busihu.

Sikolo Ni fumanange linepo ze nde mwa lipalo. Ni hanelange bana ba sikolo ba bañwi ha ba ni sineneketa kuli ni itusise bupumi mwa litatubo.

Bulikani bwa ka ni Mulimu Ni balange Bibele ka mizuzu ye 15 zazi ni zazi. Ni kutaze ku yo muñwi wa bana ba sikolo ba mwa kilasi ya luna sunda ye.

 Mu Lele Liproverbia 21:5 2

“Ku itomela likonkwani ki ko kunde, kono mu tokwa ku lelanga mwa ku li kwaniseza. Ha ku si cwalo, ha mu na ku kwanisanga likonkwani za mina.”—Derrick.

Kwa sikonkwani ni sikonkwani se mu ketile, mu eze ze latelela:

1. Mu ñole sikonkwani sa mina.

2. Mu tome nako fo mu ka kwaniseza sikonkwani seo. Niti kikuli, sikonkwani se si si ka tomelwa nako fo si swanela ku kwanisezwa si swana feela sina tolo!

3. Mu lele mihato ye mu tokwa ku nga.

4. Mu itukiseze ku talimana ni matata. Cwale mu nahane mo mu ka tatululela matata ao.

5. Mu eze buitamo. Mu itame kuli mu ka eza ka mo mu konela kaufela kuli mu kwanise sikonkwani sa mina. Cwale mu saine pampili ye mu ñozi sikonkwani seo ni ku ñola lizazi le mu i sainile.

Ni itute puo ya Spanish ni si ka ya kale kwa Mexico July 1

Mihato

1. Ni fumane buka ye na ni lipulelo za mwa puo ya Spanish.

2. Ni itutange manzwi a manca a lishumi sunda ni sunda.

3. Ni teelezange kwa batu ba bañwi ba ba bulela puo ya Spanish.

4. Ni kupe mutu yo muñwi kuli a teeleze nji mubulelelo ni mubizezo wa ka wa manzwi u lukile.

Matata e ni kona ku talimana ni ona

Ha ku na mutu ya bulela puo ya Spanish fakaufi

Mo ni kona ku a tatululela

Ni ka nga lihatiso za ku teeleza za mwa puo ya Spanish fa Intaneti ka ku itusisa keyala ya www.mt1130.com.

․․․․․ ․․․․․

Fa ku saina Lizazi

Mu Nge Muhato! Joani 13:17 3

“Ku bunolo mutu ku libala likonkwani za itomezi, kacwalo u swanela ku zwelapili ku iseza pilu kwa likonkwani za hae ni ku nga mihato ye mu tusa ku li kwanisa.”—Erika.

Mu kale ku nga mihato kapili-pili. Mu ipuze kuli, ‘Ki sika mañi se ni kona ku eza kacenu ilikuli ni kalise ku nga mihato ye ka ni tusa ku kwanisa sikonkwani sa ka?’ Ki niti kuli mwendi ha mu si ka tomahanya nto ni nto kaufela ye tokwa ku ezwa, kono mu si ke mwa lumeleza taba yeo ku mi palelwisa ku kalisa ku nga mihato ye mi tusa ku kwanisa sikonkwani sa mina. Sina mo i bulelela Bibele, “ha u ta litela ku fitela moya ni mufutumala li luka, ha u na ku cala se siñwi, mi ha ku na s’o ta kutula.” (Muekelesia 11:4, Bibele ye Kenile, Hatiso ya 1984) Mu bone se mu kona ku eza kacenu, mi mu si eze nihaikaba se sinyinyani.

Mu ikupulisange likonkwani za mina zazi ni zazi. Mu ikupulisange butokwa bwa sikonkwani ni sikonkwani se mu itomezi. Mu laitelange muhato ni muhato o se mu ngile (kamba ku ñola lizazi le mu felize muhato wo kwatuko ni wona).

Mu be batu ba ba kona ku cinca-cinca. Ku si na taba kuli milelo ya mina ki ye minde, mu kana mwa tokwa ku eza licinceho ha mu nze mu peta milelo yeo. Ku eza cwalo ku lukile. Mu si ke mwa ikutwa kuli mu tokwa ku eza lika ka ku ya ka mo ne mu li lelezi ku be cwañi kamba cwañi. Mu zwele feela pili ku nga mihato ye ka mi tusa ku peta ze mu lelile.

Mu beye sikonkwani sa mina mwa pono ni ku bona mo si ka petahalela. Mu nge kuli ki kale mu peta sikonkwani sa mina. Mu nahane tabo ye mu na ni yona. Cwale mu beye mwa pono muhato ni muhato o mu ka tokwa ku nga kuli mu pete sikonkwani seo. Sa mafelelezo, mu nge kuli ki mina bao ki kale mu kala ku nga mihato yeo. Mu ipone inze mu nga muhato ni muhato, mi mu nahane mo mu ka ikutwela hande ha mu ka kwanisa sikonkwani sa mina. Cwale ha mu kalise ku nga mihato ye ka mi tusa ku kwanisa sikonkwani sa mina!

[Siswaniso]

Likonkwani li swana sina milalo ya ndu ye tokwa ku yahiwa—mutu u tokwa ku nga mihato kuli a li pete!

[Mbokisi/Maswaniso a fa likepe 25]

ZE BA BULELA LITAKA ZA MINA

“Mutu u kona ku zwafa ka bunolo haiba ha ku na nto ye ñwi kwa isize mamelelo ya hae kamba ya nyolezwi kuli i ezahale. Kono ha itomela likonkwani ni ku li kwanisa, u ka ikutwa hande.”—Reed.

“Mu si ke mwa inyaza haiba mu palelwa ku kwanisa sikonkwani sa mina hande, kamba haiba mu palelwa ku si kwanisa mwa nako ye ne mu itomezi. Ku inyaza ha ku na ku mi tusa. Mu zwele feela pili ku lika ku kwanisa sikonkwani sa mina!”—Cori.

“Mu ambole ni batu ba se ba kwanisize likonkwani ze mu itomezi. Ba kona ku mi susueza ni ku mi fa liakalezo ze nde ze kona ku mi tusa. Hape mu taluseze ba lubasi lwa mina likonkwani za mina ilikuli ba mi tuse ku kwanisa likonkwani zeo.”—Julia.

[Siswaniso fa likepe 24]

(Kuli mu bone mo i hatiselizwe luli, mu bone hatiso)

Mu pume

Mu pute