PUPO YE MAKAZA!

Muhata wa Siku

SIKU si kona ku tula ku zwa fafasi ku ya fa limota ka bunolo. Kono haiba fafasi kwa telela, ha si tomelangi hande, niteñi si sa kona ku yo swala hande fa limota. Kamukwaufi? Si tusiwanga ki muhata wa sona.

Mu nyakisise taba ye: Siku ha si tula ku zwa fafasi fo ku tiile, ili fo si kona ku tomela hande, si kalanga ku yemisa hande mubili wa sona ni ku talimisa muhata wa sona fafasi. Ku eza cwalo ku si tusanga ku tula inze si talimezi hande fo si tulela. Kono ha si tula ku zwa fo ku telela, sa telelanga ni ku palelwa ku talimela hande fo si tulela. Nihakulicwalo, ha si sa li mwa moya si sikululanga hande mubili wa sona ni ku talimela fo si tulela ka ku isa muhata mwahalimu. Ku eza cwalo ku ama lika ze ñata. Piho ye ne filwe ki ba University of California, mwa Berkeley ne i ize: ‘Siku ha si tula si zwelangapili ku sikulula muhata wa sona kuli si zwelepili ku talimela ko si tulela.’ Ha si tula ku zwa fo ku telela hahulu, si isanga hahulu muhata wa sona mwahalimu ilikuli si yo swala hande fo si tulela.

Muhata wa siku wa kona ku tusa bomanjinela ku panga limota ze si na bazamaisi ze kona ku mata hahulu li sa pindumuki mwa libaka ze shutana-shutana, ili ze kona ku itusiswa kwa ku bata batu hamulaho wa zikinyeho kamba kozi ye ñwi. Mubatisisi ya bizwa Thomas Libby u bulela kuli: “Mishini ye kona ku izamaisa ha i koni ku mata ka mo li matela hande lifolofolo, kamukwaocwalo, nto ifi kamba ifi ye kona ku ezwa kuli mishini yeo i kone ku zamaya ku si na ku pindumuka ki zwelopili ye tuna.”

Mu bona cwañi? Kana muhata wa siku ne u itahezi feela ka ku ipilaula? Kamba kana ne u ezizwe ki Mubupi?

[Manzwi a bañi ba siswaniso 16]

© Ariadne Van Zandbergen