Ko ne ni Kuta Kaufela Batu ne ba Eziwa Maswe

Taba ye kandekilwe ki bo Patrick O’Kane

NE NI pepilwe mwa silimo sa 1965 mwa lubasi lo lu shebile kwa naha ya Northern Ireland. Ne ni hulezi mwa sibaka se si bizwa County Derry ka nako ye ne ku na ni mufilifili o no bizwa “Troubles,” ili mufilifili o no li mwahalaa Makatolika ni Maprotestanti o no tandile lilimo ze fitelela ze 30. Makatolika ba ne ba li ba banyinyani ne ba ikutwa kuli ne ba sa eziwi hande ki Maprotesitanti ba ne ba li ba bañata; Makatolika ne ba tameleza Maprotesitanti kuli ne ba sa zamaisi hande lika ze cwale ka liketisa, litaba za mulao, za misebezi, ni za mandu.

Ko ne ni kuta kaufela batu ne ba sa eziwi hande mi ne ku na ni saluluti. Hañata ne ni natiwanga, ku zwisiwa mwa mota ni ku supiswa tobolo, kamba mane ku tikitibwa ni ku tatubiwa fa mubili ki mapokola kamba masole. Ne ni ikutwa kuli ne ni sa eziwi hande mi na kenelwa ki muhupulo wa kuli, ‘Na kona ku ba tuhelela inze ba ni eza cwana, kamba na kona ku itwanela!’

Ne ni ikenyize mwa likezo za ku caula mwa silimo sa 1972 ze ne bizwa Bloody Sunday ili ku hupula batu ba 14 ba ne ba kunupilwe ki masole ba naha ya Britain. Hape naa ikenya mwa likezo za ku caula za ku tompa mapantiti ba ne ba lwanela naha, ba ne ba shwile kabakala ku itima lico mwa silimo sa 1981. Ne ni pahekanga lindembela za naha ya Northern Ireland ze ne hanisizwe, mi ne ni ñolanga kamba ku swanisa fa  mamota litaba ze ne lwanisa mubuso wa Britain, kai ni kai ko ne ni kona ku eza cwalo. Ka nako ni nako, ne ku bonahala kuli ne ku banga nto ye maswe ye ne eziwa kamba Mukatolika ya bulailwe, ili ze ne tahisanga kuli lu ikenye mwa likezo za ku caula. Hañata niha ne lu kalisanga ka ku yema feela kamba ku caula, mafelelezo ne lu ipumananga kuli se lu pwacaka lika.

Ha ne ni li kwa yunivesiti, naa ikenya mwa likezo za bana ba sikolo za ku caula ni ku pwacaka lika ka mulelo wa ku lwanisa mikwa ye silafaza lifasi. Hasamulaho naa tutela kwa London, mi teñi ko naa yo ikenya mwa likezo za ku caula ka mulelo wa ku lwanisa milao ya muuso ye ne bonahala kuli ne i tusa feela batu ba ba fumile isiñi babotana. Ne ni ikenyize mwa likezo za ku lilimala ku beleka ilikuli muuso u si ke wa pumakela sicaba lituwelo za bona. Hape mwa silimo sa 1990, ne ni cauzi ni ba bañwi ka mulelo wa ku lwanisa mutelo o ne ba lifiswa batu, mi ku caula ko, ne ku tahisize kuli patelo ye bizwa Trafalgar Square i sinyiwe hahulu ki batu ba ne ba pwacaka lika.

Kono hamulaho wa nako, na fita fa ku zwafa. Mwa sibaka sa ku peta milelo ya luna, ku caulanga ni ku pwacaka lika ne ku tahisa kuli batu ba toyane hahulu ni ku fita.

Ibato ba ka nako ye swana yeo, mulikanaa ka a ni zibahaza kwa Lipaki za Jehova. Lipaki za Jehova ne ba ni lutile ku zwa mwa Bibele kuli Mulimu wa iyakatwa manyando a luna, ni kuli u ka felisa bumaswe kaufela bo bu tahisizwe ki batu. (Isaya 65:17; Sinulo 21:3, 4) Ku si na taba ni milelo ye minde ye ba kona ku ba ni yona batu, ha ba koni ku felisa likezo za ku eza maswe batu ba bañwi ni saluluti. Ha lu tokwi feela ketelelo ya Mulimu, kono hape lu tokwa maata a hae kuli lu kone ku tiyela mioya ye maswe ye tahisanga butata bo bu shutana-shutana bo ba talimana ni bona batu mwa lifasi.—Jeremia 10:23; Maefese 6:12.

Ka nako ya cwale ni ikutwa kuli ku caulanga ni ku pwacaka lika ko ne ni ezanga ne ku swana sina mutu ya lika ku otolola ngulu ye sikami. Ki nto ye tabisa ku ziba kuli nako i ka taha ili fo ha ku na ku ba ni batu ba ba ka eziwa maswe mwa lifasi mo, mi batu kaufela ba ka likanelela.

Bibele i luta kuli Jehova Mulimu “u lata ku atula ka mulao.” (Samu 37:28) Leo ki le liñwi la mabaka ha lu kona ku ba ni buikolwiso bwa kuli Mulimu u ka felisa bumaswe ka nzila ye ba sa koni ku eza batu ba ba busa mwa lifasi. (Daniele 2:44) Haiba mwa tabela ku ituta ze ñata, mu ambole ni Lipaki za Jehova mwa silalanda sa mina kamba mu ye fa Webusaiti ya luna ya www.mt1130.com.

[Maswaniso a fa likepe 8]

[Manzwi a bañi ba siswaniso]

Maswaniso a batu ba ba caula ni ku pwacaka lika: Copyright Homer Sykes

[Manzwi a fa likepe 9]

Ku si na taba ni milelo ye minde ye ba kona ku ba ni yona batu, ha ba koni ku felisa likezo za ku eza maswe batu ba bañwi ni saluluti