KA KU YA KA BIBELE
Mesia
Bibele ne i polofitile kuli Mesia naa ka taha mwa lifasi ku to lukulula batu kwa matuku, manyando, ni lifu. Kana Jesu Kreste ki yena Mesia?
Batu ne ba ka ziba cwañi Mesia?
Ka ku ya ka bupolofita bwa Bibele, Mesia, kamba Kreste, naa ka peta likalulo ze peli ze fapahana, mi ne ku ka fita nako ye telele mwahali ku zwa fa petela kalulo ya pili ku taha ku ya bubeli. * Kalulo ya pili ya naa ka peta ki ku ba mutu. Kuli a zibahale hande, bañoli ba Bibele ne ba polofitile lika ze ñata ze ama bupilo ni musebezi wa hae wa ku kutaza. Niti kikuli, mulelo o mutuna wa bupolofita bwa mwa Bibele ki ku “paka Jesu.”—Sinulo 19:10.
Ha na li mutu, Jesu naa ezize feela lika li sikai kwa lika za ka eza mwa lifasi kaufela ha ka ba sibupiwa sa moya se si maata
ZE I BULELA BIBELE
Mesia . . .
Naa ka zwelela mwa lusika lwa Mulena Davida.—Isaya 9:7; Luka 3:23-31. *
Naa ka pepelwa mwa tolopo ya Betelehema.—Mika 5:2; Luka 2:4-7.
Naa ka ba mukutazi ya ikokobeza wa “taba ye nde.”—Isaya 61:1; Luka 4:43.
Naa ka nenaunwa ni ku ngiwa kuli haki se siñwi.—Isaya 53:3; Mateu 26:67, 68.
Naa ka betekwa ka masheleñi a mashumi a malaalu a muwayawaya wa silivera.—Zakaria 11:12, 13; Mateu 26:14, 15.
Naa ka kuza feela fapilaa ba ne ba mu tameleza litaba za buhata kuli a bulaiwe.—Isaya 53:6, 7; Mateu 27:12-14.
Naa ka ba “ngunyana” ya sitabelo se si felisa sibi ni ku konisa batu ku ba ba ba kenile fapilaa Mulimu.—Isaya 53:7; Joani 1:29, 34, 36.
Naa ka bulaiwa ku si na lisapo la hae le ne li ka lobiwa.—Samu 34:20; Joani 19:33, 36.
Naa ka bulukiwa ni bafumi.—Isaya 53:9; Mateu 27:57-60.
Naa ka zusiwa fa lizazi la bulaalu.—Mateu 16:21; 28:5-7.
Jesu naa talelelize bupolofita bo kaufela ni bo buñwi bo buñata. Hape, naa folisize bakuli ni ku zusa ba ba shwile. Ka ku eza cwalo, naa bonisize kuli ne li yena Mesia, mi hape naa lu tusize ku ba ni tumelo ye tiile mwa lisepiso za Bibele ze bonisa lika za ka eza mwa lifasi kaufela kwapili. (Luka 7:21-23; Sinulo 21:3, 4) Hasamulaho wa zuho ya hae, Jesu a ina ku “la bulyo” la Mulimu, ku libelela nako ya naa ka feza musebezi wa hae sina Mesia.—Samu 110:1-6.
“Kreste ha ka fita, ha na ku eza limakazo ze ñata ku fita za ezize mutu yo, nji cwañi?”—Joani 7:31.
Mesia u ka peta cwañi musebezi wa hae?
Majuda ba mwa linako za Jesu ne ba libelela kuli Mesia naa ka to ba lukulula kwa puso ya Siroma ni ku busa mubuso wa Isilaele o kutisizwe sinca. (Likezo 1:6) Konji hamulaho wa nako kihona balateleli ba Jesu ba Sijuda ha ne ba to utwisisa kuli naa ka feleleza ku peta musebezi wa hae kwa lihalimu sina sibupiwa sa moya se si maata, se si filwe maata kaufela.—Mateu 28:18.
ZE I BULELA BIBELE
Mwa kalulo ya bubeli, Mesia . . .
U ka busa sina Mulena wa Mubuso wa Mulimu, mulonga wa lifasi.—Daniele 7:13, 14; Sinulo 11:15.
U ka ba mbuyoti kwa batu kaufela ba ba bonisa tumelo ku yena.—Genese 22:17, 18; Samu 72:7, 8.
“U ka ba ya komokisa kwa macaba a mañata” ni baeteleli ba bona ha ka ba yundisa kabakala ku mu lwanisa.—Isaya 52:15; Sinulo 19:19, 20.
U ka pulusa batu ba ba sepahala ba “buñata bo butuna” ni ku ba kenya mwa lifasi le linca la kozo.—Sinulo 7:9, 10, 13-17.
Ni Jehova Mulimu, ba ka zuseza batu ba ba shwile kwa bupilo mwa Paradaisi mwa lifasi.—Luka 23:43; Joani 5:21, 28, 29.
U ka luta batu ba hae linzila za kozo ya niti.—Isaya 11:1, 2, 9, 10.
U ka feza sibi ili se si tahisanga matuku ni mafu.—Joani 1:29; Maroma 5:12.
U ka sinya misebezi kaufela ya Satani ni ku swalisanisa lubasi kaufela lwa batu mwatasaa puso ya Jehova Mulimu.—1 Makorinte 15:25-28; 1 Joani 3:8.
Jesu naa talelelize kalulo ya hae ya pili sina Mesia. U ka taleleza hape ni ya bubeli. Kacwalo, ba ba butali ba ituta ka za hae ka tokomelo, kakuli Jesu naa ize: “Ki na nzila ni niti ni bupilo.”—Joani 14:6.
“Mwa linako za hae, ya na ni niti u ka konda; mi kozo i ka ya i ekezeha, ku fitela kweli ha i ka fela. U ka busa, ku kalela kwa liwate le liñwi, ku ya ku le liñwi; ku zwa kwa nuka, ku ya kwa mafelelezo a lifasi.”—Samu 72:7, 8.
^ par. 5 Linzwi la “Mesia” li simuluha mwa puo ya Siheberu. Linzwi la “Kreste” li simuluha mwa puo ya Sigerike, mi li na ni taluso ye swana ni la Mesia.—Joani 1:41.
^ par. 7 Liñolo la pili li bonisa bupolofita; mi liñolo la bubeli li bonisa talelezo ya bupolofita.
Hape Mwendi Mwakona Kutabela Litaba Ze
LIKALABO KWA LIPUZO ZA BIBELE
Kana Bupolofita Bobubulela za Mesia Bubonisa Kuli Jesu Neli Yena Mesia?
Kana bupolofita bobubulela za Mesia nebukona kutalelezwa ki batu babañata?
TAWALA YA MULIBELELI
