Lituto za mwa Bibele linani maata akucinca mupilelo wa batu. Munyakisise mitala yemibeli yebonisa cwalo: Bo Ricardo ni bo Andres.

BO RICARDO: Hane ninani lilimo feela ze 15 za kupepwa, nakala kuswalisana ni sikwata sa likebenga. Nenieza lika kaufela zene babata balikani baka babanca bao. Mane nenibata kutamiwa mwa tolongo ka lilimo ze 10! Nto yeo mwendi yakona kumikomokisa. Kono mwa sibaka sene nipila kusona, batu bane batamiwa ka nako yetelele nebatabelwa hahulu ni kukutekiwa. Mi ni na nenibata kuba inge bona.

Nenieza lika kaufela zeeziwanga ki likebenga, zecwale ka kuitusisa milyani yekola, kueza buhule, ni kutahisa mifilifili. Nako yeñwi busihu nelubile mwa ndwa ya kukunupana ni sikwata sesiñwi sa likebenga. Neninahana kuli nenika bulaiwa, kono nenikonile kubaleha nisika holofala. Hamulaho wa fo, nakala kunahanisisa hahulu ka za bupilo bwa ka ni zene nilela kueza mwa bupilo, mi naikatulela kueza licinceho. Kono nenika kona cwañi kueza cwalo? Ki mañi yanaaka nitusa?

Buñata bwa bana bahesu nebasina tabo mwa bupilo. Nebakopana ni miinelo yetaata mwa bupilo bwa bona. Kono lubasi lwa bo malume lona, nelunani tabo. Ba mwa lubasi lo neli batu babande, kakuli nebapila ka likuka za mwa Bibele. Mane, nako yeñwi nebanilutile kuli libizo la Mulimu ki Jehova. Kacwalo nakonyana hamulaho wa ndwa yani, nalapela ku Jehova, naeza cwalo ka kumupunda fa libizo lahae mi namukupa kuli anituse. Nto yene nikomokisize hahulu ki kuli habusa, yomuñwi wa Lipaki za Jehova ato nikutaza fa ndu yaka! Nakala kuituta Bibele ni Paki yo.

Kono hape nakopana ni muinelo otaata hahulu. Batu bane niswalisananga ni bona mwa sikwata sale sa likebenga, nebazwezipili kunilizezanga kuli nikale kuswalisana ni bona hape. Nenihanile kuswalisana ni bona, nihaike kuli kueza cwalo nekuli taata. Neniikatulezi kuzwelapili kuituta Bibele, mi nitabile hahulu kuli nenizwezipili kuituta Bibele! Bupilo bwaka bucincize hahulu, mi ninani tabo luli.

Nahupula kuli nenitaluselize Mulimu mwa tapelo kuli nako yeñwi nenibatanga kutamiwa ka lilimo ze 10, kuli batu banikuteke ka kuba yomuñwi wa sikwata sa likebenga. Kacwalo nakupa Mulimu kuli anituse kumusebeleza ka lilimo ze 10 inze nili mukutazi wa nako kaufela, ili kuli nituse babañwi sina mone nituselizwe ni na. Mulimu naalabile tapelo yaka, kakuli seni sebelize sina mukutazi wa nako kaufela ka lilimo ze 17! Mi nitabile kubulela kuli hanisika tamiwa kale fateñi.

Nihakulicwalo, buñata bwa bane niswalisananga ni bona mwa sikwata sa likebenga, sebabile mwa tolongo ka lilimo zeñata. Babañwi kubona batimezi. Haninahana zeezahezi mwa bupilo bwaka, niitumela hahulu kwa lubasi lwa bo malume bane bali Lipaki. Nebashutana  hahulu ni batu babañwi, kakuli bona nebapila ka likuka za mwa Bibele. Nenibakuteka hahulu kufita mone nikutekelanga ba mwa sikwata sale sa likebenga. Kono niitumela hahulu ku Mulimu, ka kuniluta kuziba mwakupilela bupilo bo bunde ka kufitisisa.

BO ANDRES: Nenipepezwi ni kuhulisezwa mwa sibaka sesishebile hahulu ili monekuatile hahulu likezo zemaswe zecwale ka kuitusisa milyani yekola, busholi, bukebenga, ni buhule. Bo ndate neli macakolwa mi nebaitusisa hahulu milyani yekola. Bo ndate ni bo ma kamita nebaomananga ni kulwana.

Nenikalile kunwanga bucwala ni kuitusisa milyani yekola inze nisali mwanana hahulu. Nenifumanehanga hahulu mwa mikwakwa inze niuzweza batu ni kulekisa zene niuzwa. Hane ninze nihula, bo ndate nebakalile kuswalisana hahulu ni na kono ili ka nzila yemaswe, kakuli nebanilutile mwakukenyeza milyani yekola ni lika zeñwi mwa naha isi ka mulao ni mwakulilekiseza. Nenifumananga masheleñi amañata ka bubebe. Kono zazi leliñwi mapokola bataha fa ndu yaka mi banitama ka mulatu wa kuli nenibata kubulaya mutu. Neniatulezwi kupika lilimo ze 5 mwa tolongo.

Zazi leliñwi kakusasana nekufilwe zibiso mwa tolongo ya kuli mapantiti nebakupiwa kufumaneha kwa lipuisano zetomile fa Bibele ili zene lizamaiswa ki Lipaki za Jehova. Nayofumaneha kwa lipuisano zeo. Zene babulezi neliutwahala, kacwalo nakalisa kuituta Bibele ni Lipaki za Jehova. Nebasika pata litaba zeñwi kono nebabulezi lika kaufela zabata Mulimu kuli batu baeze.

Nalemuha kapili kuli nenisakoni kueza licinceho zene nitokwa kueza ka ilina muñi, sihulu ka nako yene nibembiwa ki mapantiti babañwi ili bane basatabeli lika zene nieza. Kacwalo nalapela ku Jehova kuli anife maata ni butali, mi nanitusize. Kufita kuli nisabiswe ki mifumbo yabona, mane neniambozi ka bundume kwa mapantiti babañwi ka za Bibele.

Nako ya kuli nilukululwe hane ifitile, nenisabile hahulu mi nenisabata kuina mwa tolongo ka nakonyana kakuli nese nitwaezi hahulu bupilo bwa mwa tolongo! Hane ninze nizwela kwande a tolongo, mapantiti babañatanyana banilaeza ka kuyemisa mazoho abona mwahalimu. Babañwi mane bahuweleza ka silikani kuli, “Uzamaye hande, mukutazi wa mwanana!”

Nasabanga haninahana mone bukabela bupilo bwaka kambe nenisika lumeleza Mulimu kuniluta. Naitumela hahulu ku Mulimu kakuli naanibonisize lilato mi naasika tuhela kunitusa. a