Batu babanyalani habakutekana bakazwelapili kulatana niha basalumelelani fa taba yeñwi. Buka yeñwi yebizwa Ten Lessons to Transform Your Marriage, ibulela kuli: “Mañi ni mañi wa batu babanyalani ili babakutekana hañañelelangi fa mihupulo yahae. Kono hakuba ni butata baambolisananga kuli bafite fa kulumelelana fa taba yeñwi. Ka likute, bateelezanga ku bakubona habatalusa mobaikutwela mi baambolisananga kuli bafumane nzila ya kutatulula ka yona butata ili yekabatusa kaufelaa bona.”

SIKUKA SA MWA BIBELE: “Lilato . . . halibati zalona feela.”—1 Makorinte 13:4, 5.

“Nikona kubonisa kuli nakuteka bo musalaaka, ka kubaanga kuba ba butokwa hahulu ni kusaeza nto ifi kamba ifi yekona kusinya linyalo laluna.”—Bo Micah.

Haiba batu babanyalani habakutekani, bakanyazananga, bakaitusisanga lipulelo zemaswe, mane nihaiba kushwaulana, ili mikwa yeo babatisisi babulela kuli ikona kutahisa kuli babanyalani balelekane.

“Kuitusisa lipulelo zemaswe, kushendekela, kamba kueza lishea lelikona kuutwisa bo musalaa mina butuku kwa pilu kukatahisa feela kuli baikutwe kuli haki ba butokwa, basike bamisepa, mi kukona kusinya linyalo lamina.”—Bo Brian.

MUNYAKISISE ZELATELELA

Muise mamelelo ku zemuambola ni momuezeza bakumina mwa sunda. Mi cwale muipuze kuli:

• ‘Ninyazize bakuluna hakai mwa sunda mo, mi nibababalize hakai?’

• ‘Ki mwa linzila mañi luli monibonisize likute ku bakuluna?’

MUAMBOLISANE NI BAKUMINA

• Ki lika mañi zemukona kueza ni zemukona kubulela zekatahisa kuli bubeli bwamina muikutwe kuli mwakutekana?

• Ki lipulelo ni likezo zecwañi zekona kutahisa kuli bubeli bwamina muikutwe kuli hamukutekani?

LIAKALEZO

• Muñole linzila zetaalu zemubata kuli bakumina bamikuteke ka zona. Mukupe bakumina ni bona kuli baeze nto yeswana. Mufe bakumina mukoloko wamina mi ni bona bamife wabona mi mueze momukonela kaufela kubonisana likute mwa linzila zeo.

• Muñole mikwa yebanani yona bakumina yemutabela hahulu. Mi mubulelele bakumina kuli muitebuha hahulu ku bona bakeñisa mikwa yabona yeo.

“Nikona kubonisa kuli nikuteka bo muunaaka ka kueza lika zebonisa kuli nibaanga kuba ba butokwa mi nibata kuli babe ni tabo. Kukuteka bakuluna hakutalusi kuli konji hanika eza nto yetuna; fokuñwi nakona kubonisa likute ka kubaezeza feela tuka totunyinyani.”—Bo Megan.

Sa butokwa ni kufita haki momuikutwela mina ka za haiba mwakuteka bakumina kamba kutokwa, kono bakumina ki bona babaswanela kuikutwa kuli mwabakuteka luli.

SIKUKA SA MWA BIBELE: “Muapale lilato ni mukekecima, sishemo, buikokobezo, bunolo, ni pilu-telele.”—Makolose 3:12.