ZEKONA KULUTUSA KUFELISA SITOYO
3 | Muambuke Sitoyo
Zeiluta Bibele:
“Mufetuhe ka kucinca munahano wamina, kuli mulemuhe tato ya Mulimu yende ni yeamuheleha ni yepetehile.”—MAROMA 12:2.
Zelitalusa Liñolo:
Mulimu ubata kuli luunge lika mwaliingela. (Jeremia 17:10) Kunani zelutokwa kueza kwandaa kuambuka feela kubulela kamba kueza nto ifi kamba ifi yebonisa sitoyo. Sitoyo sikalelanga mwa munahano ni mwa pilu. Kacwalo, luswanela kubona teñi kuli minahano ni maikuto aluna halibonisi nihanyinyani kuli lunani sitoyo. Haluka eza cwalo, ‘lukafetuha’ ni kutuhela sitoyo.
Zemukona Kueza:
Munyakisise momuikutwela ka za babañwi, sihulu batu ba mubala wa litalo lisili kamba babazwa kwa naha isili. Muipuze kuli: ‘Niinga cwañi batu ba? Kana mubonelo waka uitingile fa lika zeniziba feela na ka za batu ba? Kamba kana mubonelo waka utahiswa ki ketululo?’ Muambuke mawebusaiti, mafilimu, kamba lika za kuitabisa ka zona zebonisa lika za mifilifili ni batu bababonisa sitoyo.
Linzwi la Mulimu lakona kulutusa kufelisa sitoyo selukona kuba ni sona mwa munahano ni mwa maikuto aluna
Kutaata hañata kunyakisisa minahano ni maikuto aluna kuli lulemuhe folusa ezi hande. Kono Linzwi la Mulimu lakona kulutusa “kulemuha mihupulo ni milelo ya mwa pilu.” (Maheberu 4:12) Kacwalo, muzwelepili kunyakisisanga litaba za mwa Bibele. Mubapanye momunahanela ni zeiluta Bibele, mi mueze momukonela kaufela kuli zemunahana lilumelelane ni zeiluta Bibele. Linzwi la Mulimu lakona kulutusa kufelisa sitoyo ‘sesitiile’ sesi mwa pilu ni munahano waluna.—2 Makorinte 10:4, 5.
