Sitoyo Sikafela Kuya Kuile!
Niha lukona kufelisa sitoyo selunani sona, halukoni kutahisa kuli batu babañwi baeze lika ni kunahana ka nzila yelubata luna. Batu babasina mulatu bazwelapili kutoiwa ki batu. Kacwalo, ki mañi yakona kufelisa sitoyo kuya kuile?
Jehova Mulimu ki yena feela yakona kufelisa sitoyo selubona mwa lifasi kacenu. Bibele isepisa kuli Mulimu ukaeza cwalo luli.—Liproverbia 20:22.
MULIMU UKAFELISA ZETAHISA SITOYO
-
1. SATANI DIABULOSI. Satani, lona lingeloi lelikwenuhezi Mulimu, ki yena yakukueza batu kubonisa sitoyo selubona mwa lifasi kacenu. Mulimu ukayundisa Satani ni babaswalisana ni yena kaufela mwa kubonisa sitoyo.—Samu 37:38; Maroma 16:20.
-
2. LIFASI LELIMASWE LA SATANI. Mulimu ukafelisa lika kaufela zemaswe fa lifasi, kubeya cwalo ni baeteleli ba likopano za lipolitiki babaeza lika zemaswe ni baeteleli ba bulapeli babakukueza sitoyo. Mulimu hape ukayundisa batu babaeza lipisinisi ka buitati ni kuputelela babañwi. —2 Pitrosi 3:13.
-
3. KUSAPETAHALA. Bibele italusa kuli batu kaufela bahozize kusapetahala, mi kusapetahala ko kutahisanga kuli banahane lika zemaswe, babe ni maikuto afosahalile, mane ni kueza lika zemaswe. (Maroma 5:12) Nto yeñwi yetahiswa ki kusapetahala ki kuzwelapili kutoya babañwi. Mulimu ukatusa batu kufelisa maikuto amaswe olubanga ni ona kabakala kusapetahala, ili nto yekatahisa kuli sitoyo sifeliswe kuya kuile.—Isaya 54:13.
BIBELE ISEPISA KULI SITOYO HASINA KUBA TEÑI MWA LIFASI LELINCA
-
1. HAKUNA YAKANYANDISWA. Mubuso wa Mulimu ki ona okabusa lifasi kuya kuile, ili mulonga ofumaneha kwa lihalimu oeza lika ka nzila yelukile. (Daniele 2:44) Batu habana kuketulula babañwi mi bakalumelelana. Mulimu ukafelisa lika kaufela zebakopana ni zona batu.—Luka 18:7.
-
2. BATU KAUFELA BAKAPILA KA KOZO. Hakuna mutu yakanyandiswa ki lindwa kamba mifilifili. (Samu 46:9) Batu babalata kupila ka kozo bakaikola kupila mwa lifasi lelinde.—Samu 72:7.
-
3. BATU BAKAPILA BUPILO BOBUNDE KUYA KUILE. Batu kaufela babakapila fa lifasi bakalatana. (Mateu 22:39) Hakuna yakabilaezwa ki nto ifi kamba ifi, nihaiba lika zekile zaezahala kwamulaho. (Isaya 65:17) Ka nako yeo, batu babasina sitoyo “bakataba hahulu kabakala kozo yetuna.”—Samu 37:11.
Kana mwatabela kutopila mwa lifasi lelicwalo? Nihaiba kacenu, batu babañata baituta mwa kutuhelela sitoyo ka kusebelisa likuka za mwa Bibele. (Samu 37:8) Kona zebaeza Lipaki za Jehova mwa lifasi kaufela kacenu. Nihaike kuli banani lizo ni lisimuluho zeshutana, bazwelapili kuswalisana ni kubonisana lilato.—Isaya 2:2-4.
Lipaki za Jehova bakatabela kumitaluseza litaba zebaitutile zekona kumitusa hamunyandiswa kamba hamuketululwa ki babañwi. Zemuka ituta lika mitusa kutuhela sitoyo ni kuba ni lilato. Mwakona kuituta momukona kupilisanela hande ni babañwi nihaiba batu babasina buitebuho kamba bababonisa sitoyo. Mi mukaba ni tabo ni kupilisana hande ni babañwi. Sa butokwa ni kufita kikuli mukaituta zemukona kueza kuli muto pila mwa lifasi lelika busiwa ki Mubuso wa Mulimu ili mokusike kwaba ni sitoyo kuya kuile.—Samu 37:29.
Hape Mwendi Mwakona Kutabela Litaba Ze
TAWALA YA MULIBELELI
Mubuso wa Mulimu Ukaezañi?
Jesu naaziba kuli Mubuso wa Mulimu ki ona feela okafelisa miinelo yetaata fa lifasi. Ki lika mañi zese upetile Mubuso wo zelutusa kuba ni sepo?
LIKALABO KWA LIPUZO ZA BIBELE
Ki Lika Mañi Zekona Kunitusa Kuba ni Sepo?
Kufumana simbule sesisepahala kuka lutusa kuba ni bupilo bobunde cwale ni sepo yende kwapili.
MUZUHE!
Ketululo—Mubuso Okafelisa Ketululo
Ki lika lifi zeene zeuka eza Mubuso wa Mulimu kuli ufelise ketululo?
