Nihaike kuli Bibele haki buka ya likalafo, ifa likelezo zende zetusa. Likelezo zeo zakona kutusa mutu yakatazwa ki butuku bwa mwa munahano. Halunyakisiseñi likelezo zeñwi zefumaneha mwa Bibele.

“Batu babaiketile habatokwi mualafi, kono baba mutokwa ki babakula.”—MATEU 9:12.

Bibele ibonisa kuli lwakona kuya kwa sipatela halutokwa likalafo. Batu babañata babanani butuku bwa mwa munahano batusizwe ka kuziba hande butuku bobakula hamulaho wa kuya ku dokota.

“Ku eza misebezi ye tiisa lilama za mubili ku nani tusonyana.”—1 TIMOTEA 4:8, Bibele Yekenile, Hatiso ya 1984.

Kubanga ni nako ya kueza lika zeñwi kukona kumitusa kuba ni buiketo bobunde bwa mwa munahano. Mi lika zeo likopanyeleza kuezanga lipapali zetiisa mubili nako kaufela, kucanga lico zeswanela, ni kubanga ni nako yeñata ya kulobala.

“Pilu yetabile ki mulyani omunde, kono pilu yelobehile ifeza mutu maata.”—LIPROVERBIA 17:22.

Kubalanga litaba za mwa Bibele zeomba-omba ni kuitomela likonkwani zemukona kupeta ka bunolo kukona kumitusa kuba ni  tabo. Haiba muisa pilu kwa lika zende ni kuba ni sepo ya kuli lika likaba hande kwapili, mukakona kuitiisa niha mukatazwa ki butuku bwa mwa munahano.

“Butali bufumaneha ku babaishuwa.”—LIPROVERBIA 11:2.

Mwendi kuka mibela taata kueza lika zeñwi ili zemubata kueza mina bañi, kacwalo muamuhele tuso ya babañwi. Balikani ni ba lubasi lwamina mwendi babata kumitusa kono mwendi habazibi hande mwaku mituseza. Kacwalo, mubataluseze lika zemubona kuli zakona kumitusa hahulu. Hamuswaneli kulibelela kuli bamiezeze lika zeñata hahulu, mi kamita muitebuhe tuso yeba mifa.

“Neniikutwa kuli nekunani nto yeñwi yene nibilaeza, kacwalo nakupa tuso ku musali yali dokota. Anitaluseza muinelo waka. Kueza cwalo neku nitusize kuutwisisa muinelo waka ni kuziba mialafelo yenekona kunitusa.”—Bo Nicole, a babakula butuku bwa mwa munahano bwa bipolar disorder.

“Nilemuhile kuli kubalanga Bibele nako kaufela ni bo musalaa ka kunitusa kuba ni mihupulo yeminde nako kaufela. Mi hañata hanikatazwanga ki muinelo waka, niomba-ombiwanga ki kubala timana yeñwi ya mwa Bibele.”—Bo Peter, babakula butuku bwa kulembwala.

“Nekuli taata kutaluseza babañwi ka za muinelo waka bakeñisa kuli neniikutwa maswabi. Mulikanaa ka naaniteelelize ka tokomelo mi naalikile ka taata kuutwisisa mone niikutwela. Naanitusize hahulu kuli niikutwe hande ni kuli nisike naikutwa buinosi.”—Bo Ji-yoo, babanani butata bwa kuca ka kutula tikanyo.

“Bibele initusize kuba ni mubonelo oswanela ka za mubeleko ni kupumula. Butali bwa mwa Bibele bunitusize kutiyela minahano yemaswe yenibanga ni yona nako kaufela.”—Bo Timothy, babakula butuku bwa mwa munahano bwa obsessive-compulsive disorder.