2 | “Kuomba-Ombiwa ki Mañolo”
ZEIBULELA BIBELE: “Lika kaufela zeneñozwi kwamulaho neliñolezwi kululuta, kuli ka buitiiso bwaluna ni ka kuomba-ombiwa ki Mañolo lukone kuba ni sepo.” —MAROMA 15:4.
Zeitalusa Taba Yeo
Mwa Bibele kunani litaba zeomba-omba zekona kulutusa kuba ni maata ni kuitiisa halukatazwa ki minahano. Litaba zefumaneha mwa Bibele hape lilufa sepo ya kuli honacwale-cwale fa, lika zeutwisa butuku mwa munahano likafeliswa.
Moikona Kumituseza Taba Yeo
Kaufelaa luna lufelelwanga ki tabo ka linako zeñwi, kono batu babakatazwa hahulu ki minahano ni lipilaelo baikutwanga hahulu bumaswe ka nako kaufela. Bibele ikona kumitusa cwañi?
Mwa Bibele kunani litaba zende zeñata zekona kulutusa kuba ni mubonelo oswanela halukatazwa ki minahano yemaswe. (Mafilipi 4:8) Bibele yakona kuluomba-omba ni kulutusa kuba ni maikuto amande aka lutusa kutuhela kunahana lika zesaswaneli.—Samu 94:18, 19.
Bibele yakona kulutusa kufelisa maikuto a kuli halu ba butokwa.—Luka 12:6, 7.
Litaba zeñata zeñozwi mwa Bibele lilukolwisa kuli Mulimu, yena Mubupi waluna, wautwisisa moluikutwela.—Samu 34:18; 1 Joani 3:19, 20.
Bibele isepisa kuli Mulimu ukafelisa lika kaufela zeluutwisa butuku cwale, mi halisana kuhupulwa. (Isaya 65:17; Sinulo 21:4) Sepiso ye yakona kulutusa kuzwelapili kuitiisa haluikutwa kuzwafa.
Hape Mwendi Mwakona Kutabela Litaba Ze
LIKALABO KWA LIPUZO ZA BIBELE
Kana Mwakona Kufumana Manzwi Aomba-Omba Mwa Bibele?
Litimana za mwa Bibele liomba-ombile batu babañata babakopana ni miinelo yetaata ni babazwafile.
