HAIBA mukile mwabanduka kozi, mwendi mwakona kuutwisisa mone baikutwezi batu babañwi bane babile mwa muinelo oswana ni wamina. Nebakomokile hahulu, nebapalelwa kuutwisisa, nebalyangani, nebabilaela, mi nebabanga ni litolo zesabisa. Batu babañata bane babandukile kozi ili bane bazwafile ni kukatala, baikutwanga kulembwala hahulu.

Haiba ni mina nemubile mwa kozi, mwendi muikutwanga kuli hamusakona kutiyela muinelo otaata wo. Mane mwakona kukalisa kunahana kuli neikaba hande kushwa kufita kupila. Nihakulicwalo, Bibele ibulela kuli kunani tuso ya kupila mi mwakona kusepa kuli lika likaba hande kwapili.

Liñolo la Muekelesia 7:8 libulela kuli: “Mafelelezo a taba ki amande kufita makalelo ayona.” Hamulaho wa kozi, mukona kuikutwa kufelelwa ki sepo. Kono haiba musebeza ka taata hanyinyani-hanyinyani, lika zakona kuba hande.

Bibele ibulela kuli kwapili, “hakusana kuutwahala . . . batu babalila, kamba babatonga kabakala manyando.” (Isaya 65:19) Taba yeo ikaezahala Mubuso wa Mulimu hauka busa batu, ili fo lifasi likaba paradaisi. (Samu 37:11, 29) Ka nako yeo, hakusana kuba ni likozi hape. Batu habasana kuhupula ni kamuta lika zemaswe zene bafitile ku zona, kakuli Mulimu Yamaata Kaufela usepisa kuli: “Lika zakale halisana kuhupulwa, mi halisana kukutela mwa lipilu.”—Isaya 65:17.

Munahane feela taba ye: Mubupi waluna ulukisize ‘kulufa bupilo bobunde kwapili, ni sepo,’ ili bupilo bwa kozo inze lubusiwa ki Mubuso wa Mulimu. (Jeremia 29:11) Kana kuziba taba yeo kwakona kumitusa kuitiisa ni kuba ni sepo? Bo Sally, bababulezwi mwa taba ya makalelo, babulela kuli, “Kunahananga lika kaufela zende zeuka luezeza Mubuso wa Mulimu kwapili, kwakona kulutusa kusaisa pilu kwa lika za kwamulaho ni kutiyela muinelo olukopana ni ona ka nako ya cwale.”

Mwakona kuituta zeñata ka za lika zeuka eza Mubuso wa Mulimu ona cwale-cwale fa. Kueza cwalo kukamitusa kulemuha kuli kusina taba ni kozi yene mubile ku yona, mwakona kuba ni sepo hamunze mulibelela nako ya kwapili ili fo likozi halisana kuba teñi. Kono pili nako yeo isika fita kale, Bibele ilubulelela litaba zekona kulutusa kutiyela miinelo yetaata yelukona kukopana ni yona hamulaho wa kutahelwa ki kozi. Munyakisise litaba lisikai zelatelela.