Mulimu ufile batu buikoneli bobuipitezi, ili buikoneli bwa kuambola ni yena ni kumutaluseza mobaikutwela ka tapelo. Mupolofita Davida naalapezi kuli: “Wena Yautwa litapelo, batu ba mufuta kaufela bakataha ku wena.” (Samu 65:2) Kono luswanela kulapela ka mukwa ufi kuli Mulimu aluutwe ni kulufuyaula?

Hamulapela ku Mulimu “mumubulelele kaufela ze mwa lipilu zamina,” ili kumutaluseza momuikutwela luli. (Samu 62:8) Yamaata Kaufela watabelanga haiba lulapela litapelo zezwelela kwatasaa pilu.

Nihaike kuli Mulimu unani malumbatina amañata, unani feela libizo lililiñwi. Linzwi la Mulimu libulela kuli: “Ki na Jehova. Ki lona libizo laka.” (Isaya 42:8) Libizo la Jehova lifumaneha mwa Mañolo Akenile ibato ba ha 7,000. Bapolofita babañata nebaitusisanga libizo la Mulimu hane balapelanga. Abrahama naabulezi kuli: “Nakukupa, Jehova, . . . unilumeleze kubulela hape [ni wena].” (Genese 18:30) Ni luna halulapela, luswanela kuitusisanga libizo la Mulimu, lona la Jehova.

Mulimu wautwisisa molunahanela ni moluikutwela kusina taba ni puo yaluna. Linzwi lahae lilukolwisa kuli: “Mulimu haketululi, kono mwa sicaba ni sicaba mutu kaufela yamusaba ni kueza sesilukile ulumelelwa ki yena.”—Likezo 10:34, 35.

Kono kuli Mulimu alufuyaule, kunani zeñwi hape zelutokwa kueza kwandaa kulapela feela. Mwa litaba zetatama, lukanyakisisa zelutokwa kueza zeo kuli Mulimu alufuyaule.