1. Muikutwa cwañi ka za niti ye mwa Linzwi la Mulimu?

 BATANGA ba Jehova balata niti ye mwa Linzwi la Mulimu. Tumelo yaluna itomile fa niti yeo. (Maro. 10:17) Lukozwi kuli Jehova naatomile puteho ya Sikreste kuli ibe “yona musumo ni mutomo wa niti.” (1 Tim. 3:15) Mi luitatela kuutwa “babaetelela” mwahalaa luna habanze balutaluseza niti ye mwa Bibele ni kulufa ketelelo yelumelelana ni tato ya Mulimu.—Maheb. 13:17.

2. Ka kuya ka Jakobo 5:​19, ki lika mañi zekona kuezahala ku luna hase luitutile niti?

² Nihakulicwalo, hase luamuhezi niti ni kulumela kuli lufumana ketelelo yende mwa kopano ya Mulimu, lusakona kuyembululwa. (Mubale Jakobo 5:19.) Satani ubata kuli lutuhele kusepa Bibele kamba ketelelo yelufiwa ki kopano ya Mulimu.—Maef. 4:14.

3. Ki kabakalañi halutokwa kukumalela kwa niti? (Maefese 6:​13, 14)

³ Mubale Maefese 6:​13, 14. Honacwale-cwale fa, Diabulosi ukaitusisa litaba za buhata kuli akeluse macaba kaufela ni kutahisa kuli alwanise Jehova. (Sin. 16:​13, 14) Hape lwakona kulibelela kuli Satani ukaeza mwakonela kaufela kuli akeluse batu ba Jehova. (Sin. 12:9) Ki lona libaka halutokwa kuitwaeza kulemuha shutano ye mwahalaa niti ni litaba za buhata, ni kuikatulela kupila ka kulumelelana ni niti. (Maro. 6:17; 1 Pit. 1:22) Kueza cwalo kuka lutusa kupunyuha ñalelwa yetuna!

4. Lukanyakisisañi mwa taba ye?

 ⁴ Mwa taba ye, lukanyakisisa tulemeno totubeli totuka lutusa kulemuha niti ya mwa Bibele ni kuamuhela ketelelo yezwa kwa kopano ya Mulimu. Kihona lukanyakisisa lika zetaalu zeluswanela kueza kuli luzwelepili kukumalela kwa niti.

TULEMENO TOTUKA LUTUSA KULEMUHA NITI

5. Kusaba Jehova kukona kulutusa cwañi kulemuha niti?

⁵ Kusaba Jehova. Kusaba Jehova kutalusa kumulata hahulu kuli mane halukoni kueza nto ifi kamba ifi yesa mutabisi. Lunyolezwi hahulu kuziba shutano ye mwahalaa lika zelukile ni zesika luka, ye mwahalaa niti ni litaba za buhata, ilikuli lutabise Jehova. (Liprov. 2:​3-6; Maheb. 5:14) Haluswaneli kulumeleza sabo ya kusaba batu kuba yetuna hahulu kufita lilato laluna ku Jehova, bakeñisa kuli lika zetabisanga batu hañata halitabisi Jehova.

6. Kusaba batu nekutahisize cwañi kuli manduna ba Isilaele baalishumi basike babulela niti?

⁶ Haiba lusaba hahulu batu kufita Mulimu, kukona kulubela hahulu bunolo kukeluha mwa niti. Halunyakisiseñi mutala wa manduna ba 12 bane baizo twela naha yeo Jehova naasepisize kuifa kwa Maisilaele. Kono matwela baalishumi, nebasaba hahulu Makanana kufita mone balatela Jehova. Nebabulelezi Maisilaele babañwi kuli: “Halukoni kukambama kuyo lwanisa batu ba, kakuli bamaata kulufita.” (Num. 13:​27-31) Ki niti kuli ka kuya ka mubonelo wa batu, Makanana nebanani maata kufita Maisilaele. Kono kubulela kuli Maisilaele nebasike bakona kutula lila zabona, nekubonisa kuli nebasa sepi Jehova. Matwela baalishumi bao nebaswanela kuisa hahulu pilu kwa lika zeo Jehova naabata kuli Maisilaele baeze. Hape nebaswanela kunahanisisa ka za lika zanaa baezelize Jehova lilimonyana kwamulaho. Kueza cwalo  nekuka batusa kulemuha kuli Jehova naanani maata amatuna hahulu kufita one banani ona Makanana. Ka kushutana ni matwela bao bane basina tumelo, Joshua ni Kalebu bona nebabata kutabisa Jehova. Nebataluselize sicaba kuli: “Haiba Jehova alukatelwa, kaniti uka lutisa mwa naha ye, ni kulufa yona.”—Num. 14:​6-9.

7. Ki lika mañi zeluswanela kueza kuli lusabe hahulu Jehova? (Mubone ni siswaniso.)

⁷ Kuli lusabe hahulu Jehova, luswanela kunahana ka za moluka mutabiseza mwa likatulo kaufela zelueza. (Samu 16:8) Hamubala taba yeñwi ya mwa Bibele, muipuze kuli, ‘Kambe nenili mwa muinelo wo, ki katulo mañi yene nikaeza?’ Ka mutala, muunge kuli musweli kuteeleza kwa manduna ba Isilaele baalishumi habanze bafa piho yabona yemaswe. Kana nemuka lumela piho yabona ni kukenelwa ki sabo ya kusaba batu, kamba kana lilato lamina ku Jehova ni takazo yamina ya kumutabisa nelika tahisa kuli muhane piho yeo? Lusika lwani kaufela lwa Maisilaele nelupalezwi kulemuha kuli Joshua ni Kalebu nebabulela niti. Kabakaleo, Jehova naasika lumeleza Maisilaele bao kukena mwa Naha ya Sepiso.—Num. 14:​10, 22, 23.

8. Ki kalemeno mañi keluswanela kuikataza kuba ni kona, mi ki kabakalañi?

⁸ Buikokobezo. Jehova upatululanga niti yahae kwa batu babaikokobeza. (Mat. 11:25) Nelubonisize buikokobezo hane lulumezi kuituta niti. (Lik. 8:​30, 31) Nihakulicwalo, luswanela kutokomela kuli lusike lwakala kuikuhumusa. Kuba ni buikuhumuso kukona kutahisa kuli lukale kunahana kuli mibonelo yaluna ilukile sina feela likuka za mwa Mañolo ni ketelelo yelufiwa ki kopano ya Jehova.

9. Ki lika mañi zekona kulutusa kuzwelapili kuba ni buikokobezo?

⁹ Kuli luzwelepili kuba ni buikokobezo, luswanela kuhupula kuli lubabanyinyani hahulu halubapanywa ku Jehova. (Samu 8:​3, 4) Hape lwakona kukupa Jehova kuli alutuse kuba hahulu ni buikokobezo ni kulata kulutiwa. Jehova uka lutusa kuunga mihupulo yahae, yona yalufile ka kuitusisa Linzwi lahae ni kopano yahae, kuba ya butokwa hahulu kufita yaluna. Hamunze mubala Bibele mulemuhe mo Jehova aboniselize kuli walata buikokobezo ni kuli utoile buikuhumuso. Mi mueze momukonela kufela kuli muzwelepili kuikokobeza niha mufiwa buikalabelo bobukona kutahisa kuli muzibahale hahulu.

ZEKONA KULUTUSA KUKUMALELA KWA NITI

10. Ki bo mañi baitusisize Jehova kuli afe batu bahae litaelo ni ketelelo?

¹⁰ Muzwelepili kusepa ketelelo yelufiwa ki kopano ya Jehova. Mwa Isilaele wa kwaikale, Jehova naaitusisize Mushe mi hasamulaho naaitusisize Joshua kuli afe litaelo kwa batu bahae. (Josh. 1:​16, 17) Maisilaele nebafuyauzwi hane baangile baana bao sina bayemeli ba Jehova Mulimu. Hamulaho wa lilimo zeñata, puteho ya Sikreste hane itomilwe, baapositola ba 12 ki bona bane bafa ketelelo. (Lik. 8:​14, 15) Hasamulaho, sikwata seo nesihulile mi nekuekelizwe baana-bahulu babañwi ba mwa Jerusalema. Batu hane balatelezi ketelelo yene bafiwa ki baana babasepahala bao, “liputeho zazwelapili kutiiswa mwa tumelo mi palo ya balumeli yazwelapili kuekezeha ka zazi ni zazi.” (Lik. 16:​4, 5) Ni luna kacenu, lwafuyaulwanga halulatelela ketelelo yelufiwa ki kopano ya Jehova. Kono Jehova ukona kuikutwa cwañi haiba luhana kuutwa batu baketile?  Kuli lualabe puzo yeo, halunyakisiseñi zeneezahezi Maisilaele hane baya kwa Naha ya Sepiso.

11. Ki lika mañi zeneezahezi kwa batu ba mwa Isilaele wa kwaikale bane bahanile kuutwa Mushe, yena yanaaketilwe ki Mulimu kuli abaetelele? (Mubone ni siswaniso.)

¹¹ Nako yeñwi Maisilaele hane baya kwa Naha ya Sepiso, baana babakutekeha nebalwanisize Mushe mi nebasa kuteki buikalabelo bwanaa mufile Jehova. Nebabulezi kuli: “Kopano kaufela ikenile, kaufelaa bona [isiñi feela Mushe], mi Jehova u mwahalaa bona.” (Num. 16:​1-3) Ki niti kuli mwa meeto a Mulimu “kopano kaufela” neikenile, kono Jehova naaketile Mushe kuli aetelele batu bahae. (Num. 16:28) Bakwenuheli bao hane banyaza Mushe, yene banyaza luli ki Jehova. Nebasika isa pilu kwa lika zanaabata Jehova; kono nebaisize pilu kwa lika zene babata bona, ili maata ni libubo. Mulimu naabulaile bane baetelela mwa bukwenuheli bo, hamohocwalo ni batu babañata bane babayemela. (Num. 16:​30-35, 41, 49) Ni kacenu, lwaziba kuli Jehova habatabiswi ki batu babasa kuteki litukiso zeezizwe ki kopano yahae.

12. Ki kabakalañi halukona kuzwelapili kusepa kopano ya Jehova?

¹² Lwakona kuzwelapili kusepa kopano ya Jehova. Haiba kuba ni mabaka autwahala atahisa kuli lucince moluutwisiseza taba yeñwi ya mwa Bibele kamba mouonga-ongelwa musebezi wa Mubuso, mizwale babaetelela habazina-zinangi kueza licinceho zetokwahala. (Liprov. 4:18) Baezanga cwalo bakeñisa kuli nto yebaanga kuba ya butokwa hahulu ki kutabisa Jehova. Hape baezanga mobakonela kaufela kueza likatulo zetomile fa Linzwi la Mulimu, sona sikuka sebaswanela kulatelela batanga ba Jehova kaufela.

13. “Sikuka sa manzwi amande” ki nto mañi, mi ki lika mañi zeluswanela kueza hase lusizibile?

¹³ ‘Muzwelepili kuswala sikuka sa manzwi amande.’ (2 Tim. 1:13) Pulelo yeli, “sikuka sa manzwi amande,” iama kwa lituto za Sikreste  zefumaneha mwa Bibele. (Joa. 17:17) Litaba kaufela zelulumela litomile fa lituto zeo. Kopano ya Jehova ilulutile kukumalela kwa sikuka seo. Haiba luzwelapili kueza cwalo, lukafuyaulwa.

14. Bakreste babañwi nebatuhezi cwañi kukumalela kwa “sikuka sa manzwi amande”?

¹⁴ Ki lika mañi zekona kuezahala haiba lutuhela kukumalela kwa “sikuka sa manzwi amande”? Halunyakisiseñi mutala wo. Mwa linako za baapositola, Bakreste babañwi nebahasanya taba ya buhata ya kuli lizazi la Jehova nelifitile. Kubonahala kuli nekunani liñolo lene liingiwa kuli nelizwa ku muapositola Paulusi, ili lene libulela cwalo. Bakreste babañwi mwa Tesalonika nebalumezi taba ya buhata yeo mane ni kuihasanya basika batisisa kuli bazibe haiba neli ya niti kamba kutokwa. Kambe nebahupuzi litaba zanaa balutile Paulusi hanaasali ni bona, nebasike bapumiwa. (2 Mates. 2:​1-5) Paulusi naaelelize mizwale bahae kuli basike balumela litaba kaufela zebautwa. Mi kuli abatuse kusapumiwa kwapili, Paulusi naafelize liñolo lahae labubeli lanaañolezi Bakreste ba kwa Tesalonika ka manzwi ali: “Ki yeo tumeliso yaka, na Paulusi, ka lizoho laka, sona sisupo sesi mwa mañolo aka kaufela; wo ki ona muñolelo waka.”—2 Mates. 3:17.

15. Lukona kuisileleza cwañi kwa litaba za buhata zekona kubonahala inge kuli ki za niti? Mufe mutala. (Mubone ni maswaniso.)

¹⁵ Ki lika mañi zelukona kuituta kwa manzwi ao Paulusi naañolezi Bakreste ba kwa Tesalonika? Haiba luutwa taba yesalumelelani ni litaba zeluitutile mwa Bibele kamba taba yekomokisa, luswanela kuba ni temuho. Mwa linaha zenebusiwa ki puso ya Soviet, lila zaluna nelihasanyize liñolo lene libonahala inge kuli nelizwa kwa ofisi yetuna yezamaisa musebezi waluna mwa lifasi kaufela. Liñolo leo nelisusueza mizwale babañwi kutoma kopano yeñwi yeicemezi. Liñolo leo nelibonahala inge kuli neli la niti. Kono mizwale babasepahala nebasika pumiwa. Nebalemuhile kuli litaba zenefumaneha mwa liñolo leo nelisa  lumelelani ni litaba zene balutilwe. Kacenu, batu babalwanisa niti bakona kuitusisa zwelopili ya bumapanga-panga kuli balulyanganise ni kulukauhanya. Kufita kutuhelela “minahano [yaluna] kulyanganiswa ka bubebe,” lwakona kuisileleza ka kunyakisisa litaba zeluutwa ni zelubala ni kubona haiba zalumelelana ni litaba za niti zeluitutile.—2 Mates. 2:2; 1 Joa. 4:1.

16. Ka kuya ka Maroma 16:​17, 18, ki lika mañi zeluswanela kueza haiba batu babañwi bazwa mwa niti?

¹⁶ Muzwelepili kuswalisana ni batu babasepahala ku Jehova. Mulimu ubata kuli luswalisane halunze lumusebeleza. Lukazwelapili kuswalisana haiba lukumalela kwa niti. Batu kaufela babakeluha mwa niti batahisanga likauhano mwa puteho; kacwalo, Mulimu ubata kuli ‘lubaambuke.’ Haiba lusaezi cwalo, ni luna lwakona kukeluha mwa niti.—Mubale Maroma 16:​17, 18.

17. Lukatuseha cwañi haiba lulemuha niti ni kuikumalela?

¹⁷ Haiba lulemuha niti ni kuikumalela, lukaba ni silikani sesitiile ni Jehova ni kuba ni tumelo yetiile ku yena. (Maef. 4:​15, 16) Lukasilelezwa kwa lituto za buhata za Satani ni litaba za buhata zasweli kuhasanya, mi lukazwelapili kusilelezwa ki Jehova ni kubabalelwa ki yena ka nako ya ñalelwa yetuna. Muzwelepili kukumalela kwa niti mi “Mulimu wa kozo ukaba ni mina.”—Mafil. 4:​8, 9.