Kana nako yeñwi neku mibezi taata kuhupula litaba zene musazo ituta? Nto yeo yaezahalanga ku luna kaufela ka linako zeñwi. Ki nto mañi yekona kulutusa? Kulundulula lisupo zetuna kwakona kulutusa.

Hamunze muituta, mukutumanange ka linako zeñwi kuli munahanisise litaba za butokwa zemuitutile. Mulemuhe mo muapositola Paulusi naatuselize banaañolezi liñolo kueza cwalo hanaañozi kuli: “Cwale se ki sona sisupo sesituna.” (Maheb. 8:1) Ka kueza cwalo, naabatusize kuutwisisa zanaatalusa, ni mo sisupo ni sisupo nesiswalisanela ni taba yeneambolwa.

Mwendi mwakona kuitusisa nihaiba mizuzu yelishumi kwa mafelelezo a tuto yamina, ilikuli munahanisise lisupo zetuna zemuitutile. Haiba kumibela taata kuhupula zemuitutile, mutalime tutoho twa litaba kamba kubala mubamba wapili mwa paragilafu ni paragilafu kuli mukone kuhupula zemuitutile. Haiba muitutile nto yeñwi yenca, mulike kuitalusa ka manzwi amina. Kulundulula lisupo zetuna kuka mitusa kuekeza kwa buikoneli bwamina bwa kuhupula litaba mi hape kuka mitusa kuutwisisa hande mo litaba zemuituta liamela bupilo bwamina.