Ba ‘Beya Miselo mwa Bucembele’

BATU ba bañata mwa linaha ze li bukaufi ni liwate la Mediteranea ba calanga likota za nzalu (ze bizwa date palms) mwa malapa a bona. Likota zeo ki ze nde mi li beyanga litolwana ze munati. Mi li kona ku beya miselo ka lilimo ze fitelela 100.

Mulena Salumoni wa Isilaele wa kwa ikale na talusize musizana wa Mushulami mwa toko kuli na swana inge kota ya nzalu. (Pina ya Lipina 7:7) Buka ye ñwi (Plants of the Bible) i bulela kuli: “Linzwi la Siheberu la kota ya nzalu ye bizwa date palm ki ‘tàmâr.’ . . . Kota yeo ne i tilo itusiswa ki Majuda sina sisupo sa mufelañeke ni bunde mi hañata libizo la yona ne li fiwanga kwa bana ba basizana.” Ka mutala, kaizel’a Salumoni yo munde ne li yena Tamare. (2 Samuele 13:1) Bashemi ba bañwi ba fanga bana ba bona ba basizana libizo la Tamare.

Kono basali ba bande hasi bona fela ba ba swaniselizwe kwa likota za nzalu. Walisamu na opezi kuli: “Batu ba niti ba ka konda sina nzalu, ba hule sina misidare ya kwa Lebanoni. Ba ba calilwe mwa Ndu ya [Muñ’a] Bupilo, ba ka konda sina likota za mwa malapa a Mulimu wa luna; ba beye miselo ni mwa bucembele bo butuna bwa bona, inze ba tezi mezi ni butala.”—Samu 92:12-14.

Basupali ba ba sebeleza Mulimu ka busepahali ba swanisezwa kwa kota ya nzalu. Bibele i bulela kuli: “Milili ye li pululu, ki mushukwe wa ku kutekiwa, u fumanwa mwa mizamao ye lukile.” (Liproverbia 16:31) Nihaike kuli ba kana ba felelwa ki m’ata lilimo ha li nze li ekezeha, basupali ba sa kona ku tiya kwa moya ka ku ituta kamita Linzwi la Mulimu, yona Bibele. (Samu 1:1-3; Jeremia 17:7, 8) Manzwi a bona a’ susueza ni mutala wa bona o munde li susueza hahulu ba bañwi, mi ba zwelapili ku beya miselo. (Tite 2:2-5; Maheberu 13:15, 16) Ka ku swana sina kota ya nzalu, basupali ba kona ku beya miselo mwa bucembele.