Kana mu Tomile Nako ya ku Itutanga Bibele?

ÑOHOLA, Sitopa se si Etelela ne si zibise cinceho ye ne ezizwe kwa tomahanyo ya mikopano ili ye ka lumeleza mabasi ku banga ni nako ye ñata ya ku nyakisisa ni ku ituta Bibele hamoho. Haiba mu toho ya lubasi, mu bone teñi kuli mwa zamaisa kamita tuto ya Bibele ya lubasi ni bo musalaa mina ni bana ba mina. Bo muuna ni musalaa hae ba ba si na bana ba ka tokwa ku itusisa nako ye kwa ku itutanga Bibele hamoho. Mizwale ni likaizeli ba makwasha ba ba si na buikalabelo ba ka kona ku itusisa hande nako ye kwa ku eza tuto ya Bibele ya ka butu.

Mizwale ni likaizeli ba bañata ba itumezi hahulu kwa tukiso ya ku banga ni Nako ya ku Lapela Sina Lubasi. Ka mutala, eluda ya bizwa Kevin, naa ñozi kuli: “Ha lu na manzwi a swanela hande a ku itumela ili ku bonisa maikuto a luna ba ba li mwa puteho. Ka ku ba maeluda, lu nyakisisize mo lu itusiseza nako ye ya ku lapela kuli lu eze hona cwalo feela mo lu bulelezwi ki Sitopa se si Etelela, ili ku ituta ni mabasi a luna.

Bo Jodi, ba ba nyezwi ki muuna yaa li eluda, ne ba ñozi kuli: “Lu na ni bana ba basizana ba balalu ba lilimo za 15, 11, ni 2. Kona lu sa zo tutela mwa puteho ya sikwata sa puo ya bosusu. Ku lu ngelanga nako ye ñata mi ku tokwa buikatazo bo butuna kuli lu itukiseze mikopano kaufela. Cwale cinceho ye, i lu ekelelize lizazi li li liñwi le li lu lumeleza ku isa pilu kwa tukiso ya luna ya Nako ya ku Lapela Sina Lubasi!”

Bo John ni bo JoAnn, ili bo muuna ni musali ba ba sebeza sina mapaina ba kamita, ne ba ñozi kuli: “Tuto ya luna ya lubasi hañata ne i ezwanga ka siwela kakuli ne lu icocomezanga mwa litukiso ze ñwi za misebezi ya puteho. Tukiso ye nca ye ki mpo ye zwa ku Jehova ye lu tusa kwa moya—haiba lu itusisa hande nako ye ka mo i lelezwi.”

Tony, ili muzwale wa likwasha wa lilimo za mwahalaa 20 ni 30, u tomile lizazi la Bubeli manzibwana kuli kona la ka ezanga tuto ya ka butu. U itusisanga linako ze ñwi za mwahalaa sunda kwa ku itukiseza mikopano ya puteho. Niteñi, Tony u bulela kuli: “Ni libelelanga sihulu lizazi la Bubeli.” Kabakalañi? “Lizazi leo ki la butokwa hahulu mwahalaa ka ni Jehova.” Tony u talusa kuli: “Ni itutanga lituto ze tiisa swalisano ya ka ni Jehova ka lihola ze batoo ba ze peli. Ku banga ni nako ye ñata ya ku ituta ku ni konisanga ku yeya litimana za Bibele ze ni bala.” Ku zwileñi? “Kelezo ya Jehova i sweli ya kena hahulu mwa pilu ya ka ku fita sapili.” Kana wa kona ku fa mutala wa zaa bulezi? U li: “Mwa buka ya Insight, ne ni balile za silikani se ne si li mwahalaa Davida ni Jonatani. Ne ni itutile lituto ze ñata kwa moya wa Jonatani wa ku sa ba ni buitati. Mutala wa hae u ni tusize ku bona hande se ku talusa ku ba mulikani wa niti. Ni nyolelwanga hahulu ku shitula lituto ze ñata za butokwa ze cwalo fa lizazi la Bubeli ni la Bubeli!”

Ku si na ku kakanya, batanga ba Jehova kaufela ba ka tusiwa hahulu ka ku itusisa nako ye ekelizwe ye, kwa ku ituta Bibele ni ku eza tukiso ya Nako ya ku Lapela Sina Lubasi.