Piho ya Mukopano wa ka Silimo

Mukopano O ne U Talusa za Swalisano ni Milelo ye Tabisa

MIKOPANO ya ka silimo ya Watch Tower Bible and Tract Society of Pennsylvania i tahisanga tabo ka nako kaufela. Mukopano wa ka silimo wa bu 127 o ne u ezizwe la 1 October, 2011, ne u tabisize luli! Baenyi ba ne ba zwa mwa libaka za mwa lifasi kaufela ne ba memilwe ku kopana mwa Ndu ya Mukopano ya Lipaki za Jehova ya mwa tolopo ya Jersey, ili mwa New Jersey, kwa U.S.A.

Muzwale Gerrit Lösch ya li mwa Sitopa se si Etelela naa kalisize mukopano wo ka ku amuhela baputehi. Naa bulelezi baputehi ba ne ba zwa mwa linaha ze bato ba 85 kuli ne ba li kalulo ya lubasi lwa mwa lifasi kaufela lo lu swalisani hahulu ku fita sikwata sifi kamba sifi mwa lifasi. Swalisano yeo i fa bupaki bo bunde mi i lumbekisa Jehova. Mane linzwi la swalisano ne li kuta-kutezwi ku bulelwa kwa mukopano wo.

PIHO YE NDE YE ZWA KWA NAHA YA MEXICO

Mwa ngambolo ya pili ya fa mukopano wo, ne ku filwe mitala ye bonisa swalisano ya batu ba Jehova. Kacenu, ofisi ya mutai ya kwa Mexico i okamela linaha ze silezi za mwa Central America. Muzwale Baltasar Perla wa kwa mutai wa Mexico naa buisani ni batu ba balaalu ba mwa lubasi lwa fa mutai wa Mexico, mi naa ba buzize kuli ba taluse ze zwile mwa cinceho ya ku kopanya mitai ya mwa linaha ze 6. Ne ba bulezi kuli lubasi lwa Betele lwa kwa Mexico lu na ni mizwale ni likaizeli ba lizo ze shutana-shutana, mi mizwale ni likaizeli bao ba zwa mwa linaha ze shutana. Mañi ni mañi wa susuezwa ki swalisano ye nde ye mwahalaa bona. Ku swana feela inge kuli Mulimu u kopanyize balapeli bao sina lubasi lu lu luñwi mwa naha i liñwi.

Hamulaho wa cinceho yeo, puteho ni puteho ne i amuhezi keyala ya fa Intaneti ilikuli batu ba ba mwa libaka ze kwahule ba kone ku ambola ni ofisi ya mutai ka ku itusisa keyala yeo. Nto yeo i tusa bahasanyi ba ba mwa linaha mo ku sina mitai kuli ni bona ba ikutwe kuli ba sa li kalulo ya kopano.

LIPIHO ZE ZWA KWA JAPAN

Muzwale James Linton ya naa zwa kwa mutai wa Japan naa talusize mo mizwale ba luna ne ba amezwi ki lizikinyeho ni munda o mutuna o no ezahezi mwa kweli ya March 2011. Batu ba bañata ne ba latehezwi ki balatiwa ba bona ni lika kaufela ze ne ba na ni zona. Lipaki ba bañwi ba ne ba si ka amiwa ki kozi yeo ne ba lukisize libaka ze 3,100 kuli batu ba ne ba amilwe ba fumane makundamo, mi ne ba itusisize limota za bona kuli ba tuse batu bao. Baitateli ba ne ba lumilwe ki Tutengo Twa Miyaho ya Mwa Silalanda sa Naha ne ba sebelize busihu ni musihali ku lukisa mandu a mizwale ba luna. Baitateli ba ba fitelela 1,700 ne ba sebelize ko ne ku tokwahala kaufela. Hape ne ku na ni baitateli ba 575 ba ne ba tusize kwa ku lukisa Mandu A Mubuso ku kopanyeleza ni sikwata se ne si zwa kwa naha ya America.

Ki ze ñata ze ezizwe ili ku omba-omba ni ku tiisa tumelo ya batu ba ne ba wezwi ki kozi ye tuna yeo. Baana-bahulu ba ba fitelela 400 ne ba potezi batu ba ne ba wezwi ki kozi bao. Sitopa se si Etelela ne si lumile baokameli ba mitai ba ne ba zwa kwa ofisi ya zamaiso ilikuli ba yo sususeza mizwale ni likaizeli ba ne ba wezwi ki kozi. Batu ba ne ba wezwi ki kozi hape ne ba omba-ombilwe hahulu bakeñisa kuli Lipaki ba mwa lifasi kaufela ne ba ba bonisize lilato.

 KU WINA MIZEKO

Baputehi hape ne ba nyolelwa ku teeleza ku muzwale Stephen Hardy ya na zwa kwa mutai wa Britain ni mizwale ba bañwi be ne ba ka nyakisisa za mizeko ye ne lu sa zo wina. Ka mutala, muuso wa France ne u bata kuli Lipaki za Jehova za mwa naha ya France ba life mitelo ili madola a kwa America a eza 82 milioni (Ibato ba K418,200,000,000). Kuta ya Mwa Europe ye Talima Litaba ze Ama Liswanelo za Sicaba (European Court of Human Rights) ne i atuzi kuli taba yeo ne i si ya ka mulao. Katulo yeo ne i bonisize kuli Kuta ne i lumela kuli Lipaki ne ba sa picuki ku lifa mitelo. Kuta yeo ne i bulezi kuli muuso wa France ne u lobile mulao o fa batu tukelo ya ku lapela (Article 9 of the European Convention). Ka mutala, muuso wo, ne u hanile kuli Lipaki ba zibahale sina bulapeli, mi hape ne u bata ku felisa katengo ka Lipaki ka ne ka ba zekelanga. Muuso wo hape ne u likile ku zwisa bulapeli bwa Lipaki mwa naha, mi ne u zwezipili ku nenauna Lipaki.

Kuta yeo hape ne i atuzi ka ku lu yemela mwa muzeko o no ama Lipaki za Jehova ba mwa Armenia. Ku zwa ka silimo sa 1965, Kuta ne i lumela kuli mukopano wa kwa Europe ne u si ka fa mutu tukelo ya ku hana taelo ya muuso ya ku kena busole. Kono baatuli ba batuna ili ba ba na ni maata a matuna mwa Kuta ya Mwa Europe ye Talima Litaba ze Ama Liswanelo za Sicaba, ne i atuzi kuli mukopano wa kwa Europe u fe mutu tukelo ya ku hana sebelezo ya busole haiba u eza cwalo ka mabaka a tiile a tumelo ya bulapeli. Bakeñisa katulo ye ne ezizwe ki Kuta yeo, muuso wa Armenia hamohocwalo ni mibuso ya Azerbaijan ni Turkey i swanela ku kuteka tukelo yeo.

MISEBEZI YA BUYAHI

Muzwale Guy Pierce wa mwa Sitopa se si Etelela ki yena mubuleli ya naa tatami mi naa bulezi kuli baputehi kaufela ba nyolelwa ku ziba za misebezi ya luna ya buyahi ye eziwa mwa New York. Naa buhisize vidio ye ne bonisa miyaho ye yahilwe ni ye ka yahiwa kwa Wallkill, ili kwa Patterson, mi hape mwa vidio mo ne ku buhisizwe miyaho ya luna ye minca ya kwa Warwick ni Tuxedo, ili mwa New York. Muyaho o munca o na ni mizuzu ye fitelela 300 u sweli wa yahiwa kwa Wallkill, mi u swanela ku fezwa ku yahiwa mwa silimo sa 2014.

Ku na ni milelo ya ku yaha miyaho ye minca fa sibaka se si eza lihekele ze 100 kwa Warwick. Muzwale Pierce naa bulezi kuli nihaike kuli Sitopa se si Etelele ha si zibi hande za lelile Jehova ka nako ya cwale ka za sibaka seo, lwa itukiseza ku kalisa ku yaha. Sitopa se si Etelela si lela ku tutisa liofisi za zamaiso za Lipaki za Jehova ku zwa kwa Brooklyn ku isa kwa Warwick. Ka nako ye i ka yahiwa miyaho kwa Warwick, ku lelilwe kuli mishini ni liyahiso li bulukiwe kwa sibaka se siñwi se si kwa mutulo wa sibaka sa Warwick ili likilomita ze 10, mi sibaka seo si kwana lihekele ze 20. Muzwale Pierce naa bulezi kuli, “Lu ka kalisa musebezi wa ku yaha ha lu ka fiwa tumelezo, mi lu sepa ku feza musebezi wo mwa lilimo zee ne kamba ze sa fiti fo. Hamulaho kihona lu ka lekisa miyaho ya luna ya kwa Brooklyn.”

Kana Sitopa se si Etelela ha si sa nahana kuli ñalelwa ye tuna i fakaufi? Muzwale Pierce naa alabile kuli: “Kutokwa. Haiba ñalelwa ye tuna i palelwisa mulelo wa luna, nto yeo i ka tabisa hahulu ni ku fita!”

MU TOKOMELE TAU YE BULUMA

Muzwale Stephen Lett yo muñwi wa mwa Sitopa se si Etelela naa nyakisisize liñolo la 1 Pitrosi 5:8 le li li: “Mu buluke minahano ya mina i nze i iketile, mu tone. Sila sa mina, yena Diabulosi, u zamaya sina tau ye buluma, ye bata ye i ka ca.” Muzwale Lett naa bulezi kuli ha lu nyakisisa mo li inezi luli litau, lwa kona ku utwisisa libaka swanisezo ya Pitrosi ha i li ye swanela.

Litau li tiile mi li na ni lubilo ku fita batu. Satani u tiile hahulu kuli mane ha lu koni ku mu lwanisa kamba ku mu picuka ka maata a luna. Lu tokwa tuso ya Jehova. (Isa. 40:31) Tau hañata i zumanga ka ku nanalela ilikuli i si ke ya bonwa ki lifolofolo. Haiba lu bata kuli lu si ke lwa swasiwa ki Satani, lu swanela ku bona kamba ku utwisisa mwa likelanga ku lu swasa. Sina feela tau mo i kona ku bulaela mutobo o sa koni ku itamulela kamba pizi ya mwana ye lobezi, Satani ha na makeke mi u tabela ku lu bulaya. Tau ha se i felize ku ca folofolo yeo,  folofolo yeo ya shanaukanga ni ku bonahalela mu sili ku fita mo ne i bonahalela sapili. Ka nzila ye swana, haiba Mukreste a swasiwa ki Satani, muinelo wa hae u banga o maswe hahulu ku fita mane mo ne u inezi ha si ka ituta kale niti. (2 Pit. 2:20) Lu swanela ku lwanisa Satani ka ku zwelapili ku mamela ze lu ituta mwa Bibele.—1 Pit. 5:9.

MU ITEBUHE TOHONOLO YA KU BA MWA NDU YA JEHOVA

Mubuleli ya naa tatami ne li muzwale Samuel Herd ya li mwa Sitopa se si Etelela mi naa bulezi kuli: “Kaufela luna lu na ni tohonolo ya ku ba mwa ndu ya Jehova.” Taba yeo i talusa kuli Bakreste kaufela ba ba na ni tumelo mwa sitabelo sa Jesu se si liulula ba kona ku lapela Mulimu ka nzila ya tabela. Kaufela luna lu swanela ku itumela ku Jehova kuli lu na ni tohonolo ya ku ba mwa ndu ya hae. Davida naa bata kuli a “ine mwa Ndu ya Muñaa Bupilo” ka mazazi kaufela a bupilo bwa hae. Sina Davida, ni luna lu tabela ku lapela Jehova mwa mazazi a bupilo bwa luna kaufela.—Samu 27:4.

Muzwale Herd naa amile kwa liñolo la Samu 92:12-14 ni ku talusa mo Jehova a tuseza batu ba hae kuli ba kondise mwa bupilo. Mulimu wa lu omba-omba, ku lu sileleza, ni ku lu fa mezi a niti a katulusa. Muzwale Herd naa susuelize baputehi kuli ba itebuhe ku Jehova bakeñisa za ba ezeza ni ku mu lapela mwa ndu ya hae ku ya ku ile.

BAKRESTE BA NITI BA KUTEKA LINZWI LA MULIMU

Muzwale David Splane ya li mwa Sitopa se si Etelela ki yena ya naa file ngambolo ye ne tatami. Naa talusize kuli Bakreste ba niti ba zwezipili ku kuteka Linzwi la Mulimu. Ka mutala, mwa linako za baapositola, Bakreste ba niti ne ba itusisize Mañolo kuli ba tatulule butata bwa mupato. (Lik. 15:16, 17) Kono mwa lilimo za mwanda wa bubeli, batu ba bañwi ba ne ba ipapata ku ba Bakreste ne ba kalile ku kuteka lituto za mihupulo ya butu ya Sigerike ku fita ku kuteka Mañolo. Hamulaho, ba bañwi ne ba kalile ku luta mihupulo ya babusi ba Roma ni ya baeteleli ba likeleke ku fita ku luta lituto za Bibele. Ki mona mo ne li kalezi lituto za bulapeli bwa buhata.

Muzwale Splane hape naa nyakisisize ye ñwi ya liswanisezo za Jesu. Swanisezo yeo i bonisa kuli ku zwa feela ka nako ya baapositola, Bakreste ba ba tozizwe ba zwezipili ku ba teñi fa lifasi kuli ba yemele niti. (Mat. 13:24-30) Ha lu koni ku ziba luli kuli batu bao ne li bo mañi. Kono ka lilimo ze ñata, ba bañata ba lwanisize litumelo ni likezo za bulapeli bwa buhata. Ba bañwi ba batu bao  ki Bishopu yo mutuna ya bizwa Agobard wa kwa Lyons ya naa pilile mwa lilimo za ma 800, Peter wa kwa Bruys, Henry wa kwa Lausanne, ni Valdès (kamba, Waldo) ya naa pilile mwa lilimo za ma 1100, John Wycliffe ya naa pilile mwa lilimo za ma 1300, William Tyndale ya naa pilile mwa lilimo za ma 1500, ni Henry Grew ni George Storrs ba ne ba pilile mwa lilimo za ma 1800. Lipaki za Jehova kacenu ba zwelapili ku eza ze i luta Bibele, mi litumelo za bona li tomile feela fa niti ya mwa Bibele. Kona libaka Sitopa se si Etelela ha si ketile liñolo la Joani 17:17 kuli li be lona liñolo la silimo sa 2012, liñolo leo li bulela kuli: “Linzwi la hao ki yona niti.”

LICINCEHO ZE TABISA KA ZA LIKOLO ZA BIBELE

Muzwale Anthony Morris ya li mwa Sitopa se si Etelela naa zibisize licinceho ze ka ba teñi kwa balumiwa ni mapaina ba ba ipitezi. Mwa September 2012, Sikolo sa Bibele sa Bakreste ba ba Nyalani si ka kalisa mwa linaha ze ñwi. Ñohola mwa kweli ya October, mulelo wa Sikolo sa Giliadi ne u cincizwe. Ku zwa cwale, ba ba ka memiwanga kwa sikolo sa Giliadi ba ka banga batu ba ba inzi kale mwa sebelezo ya ka nako kaufela. Ba bañwi ba ka banga balumiwa ba ba si ka kena kale sikolo sa Giliadi. Ba bañwi ba ka banga mapaina ba ba ipitezi, baokameli ba maeto, kamba batu ba ba li lilama za Betele. Ha se ba kwazize sikolo sa Giliadi, ba ka lumiwanga ku yo sebeleza kwa liofisi za mutai, mwa musebezi wa maeto, kamba ku lumiwa ku yo eza musebezi wa ku kutaza ni liputeho ze mwa litolopo ze tuna. Teñi ko, ba kona ku yo tiisa, ku tusa, ni ku luta mizwale ni likaizeli mwa ku kutaleza.

Hape ne ku zibisizwe kuli ku kalisa la January 1, 2012, mizwale ba bañwi ba ba keni Sikolo sa Bibele sa Mizwale ba Makwasha ni Bakreste ba ba keni Sikolo sa Bibele sa Bakreste ba ba Nyalani ba ka ba mapaina ba ba ipitezi ba ka nakonyana. Ba ka kutaleza mwa libaka mo ku na ni bahasanyi ba banyinyani kamba mo ku si na bahasanyi. Ba ka banga mapaina ba ba ipitezi ka silimo si li siñwi. Haiba ba eza hande, ba ka kupiwa ku zwelapili hape ka silimo si li siñwi. Mi hape haiba ba eza hande ku seo, ba ka kupiwa ku zwelapili ni mwa silimo sa bulaalu. Ha se ba sebelize ka lilimo ze sa fiteleli ze taalu, ba ba eza hande ba ka ketiwa kuli cwale ba zwelepili ku sebeza sina mapaina ba ba ipitezi.

Mukopano wa ka silimo wa 2011 ne u tabisize luli. Kopano ya Mulimu i zwelapili ku kutaza mwa libaka ze ñata za mwa lifasi ni ku swalisanisa mizwale ba luna mwa lifasi kaufela. Lu sepa kuli Jehova u ka fuyola musebezi wa luna ni kuli musebezi wo u ka tahisa kanya ni tumbo ku yena.

[Mbokisi/Maswaniso a fa likepe 18]

KU FITA FA KU ZIBA HANDE BATU BA BAÑWI

Fa mukopano wo, muzwale yo muñwi naa buisani ni likaizeli ba 9 ba ba li limbelwa ba ne ba nyalwanga ki mizwale ba ne ba banga mwa Sitopa se si Etelela. Bo kaizeli Marina Sydlik, kaizeli Edith Suiter, kaizeli Melita Jaracz, kaizeli Melba Barry, ni kaizeli Sydney Barber ba talusa mo ne ba itutezi niti ni mo ne ba kenezi mwa sebelezo ya nako kaufela. Likaizeli bao kaufela bona ba taluseza baputehi linako ze nde ze ne ba bile ni zona, mi ba talusa mo ba ikutwela ka za bakubona, ni limbuyoti ze ne ba ikozi hamoho. Ka ku ungula puisano yeo, baputehi ba opela pina 86, ye li “Basali ba ba Sepahala, Likaizeli za Sikreste.”

[Maswaniso]

(Fahalimu) Bo Daniel ni bo Marina Sydlik; bo Grant ni bo Edith Suiter; bo Theodore ni bo Melita Jaracz

(Kwatasi) Bo Lloyd ni bo Melba Barry; bo Carey ni bo Sydney Barber

[Mapa ye fa likepe 16]

(Kuli mu bone mo i hatiselizwe luli, mu bone hatiso)

Mitai ye silezi ne i kopanyizwe kuli i okamelwe ki mutai wa Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Siswaniso se si fa likepe 17]

Mo si ka bonahalela sibaka sa zamaiso sa Lipaki za Jehova mwa Warwick, kwa New York