LIPUZO ZE ZWA KWA BABALI

Ki bo mañi “bana ba bashimani ba Mulimu” ba ba bulezwi kwa Genese 6:2, 4 ba ne ba pilile pili Muunda u si ka taha kale?

▪ Ku na ni libaka luli le li tahisa kuli lu lumele kuli bana bao ba ba bulezwi kwa liñolo leo ba talusa bana ba moya ba Mulimu. Ki bufi bupaki bo bu bonisa cwalo?

Timana ya pili kwa litimana zeo i bulela kuli: “Bana ba bashimani ba Mulimu, se ba bona bana ba basizana ba batu kuli ki ba bande, mi ba ikungela basali ku be ba ketile kamukana.”—Gen. 6:2.

Mwa Mañolo a Siheberu, manzwi a kuli “bana ba bashimani ba Mulimu” ni a kuli “bana ba Mulimu” a fumaneha kwa Genese 6:2, 4; Jobo 1:6; 2:1; 38:7; ni Samu 89:6. Mañolo ao a bonisañi ka za “bana ba Mulimu”?

“Bana ba bashimani ba Mulimu” ba ba bulezwi kwa Jobo 1:6, ne li libupiwa za moya ze ne kopani fapilaa Mulimu. Mwahalaa libupiwa zeo ne ku na ni Satani ya naa zwa kwa ku ‘zamaya-zamaya mwa lifasi.’ (Jobo 1:7; 2:1, 2) Hape kwa Jobo 38:4-7, lu bala za “bana ba Mulimu” ba ne ba ‘luluwelisizwe ki tabo’ Mulimu ha naa bupile lifasi. Ha lu kakanyi kuli bana ba Mulimu ba ba bulezwi kwa liñolo leo ki mangeloi kakuli ka nako yeo batu ne ba si ka bupiwa kale. Bana ba Mulimu ba ba bulezwi kwa Samu 89:6, ki libupiwa za kwa lihalimu ze pila ni Mulimu isiñi batu.

Kono cwale “bana ba bashimani ba Mulimu” ba ba bulezwi kwa Genese 6:2, 4, ki bo mañi? Ka ku ya ka litaba za niti ze lu balile mwa Bibele, kwa swanela ku bulela kuli manzwi ao a mwa liñolo leo a talusa bana ba Mulimu ba moya ba ne ba tile fa lifasi.

Batu ba bañwi ha ba lumeli kuli mangeloi a kona ku ba ni takazo ya somano. Manzwi a Jesu a bulezwi kwa Mateu 22:30 a bonisa kuli libupiwa za kwa lihalimu ha li nyalangi mi ha li ezangi somano. Kono fokuñwi mangeloi naa ipetulanga batu, mi mane naa canga ni ku nwa ni batu. (Gen. 18:1-8; 19:1-3) Kamukwaocwalo, kwa utwahala ku lumela kuli haiba mangeloi naa kona ku ipetulanga batu, mangeloi ao naa ka kona ku eza somano ni basali.

Ku na ni mabaka a mwa Bibele a bonisa kuli mangeloi a mañwi naa ezize somano ni basali. Liñolo la Juda 6, 7 li bapanya sibi sa baana ba mwa Sodoma ili ba ne ba latelezi litakazo za nama ya bona, kwa sibi sa “mangeloi a naa si ka buluka litulo za ona kono a siya libaka za ona ze swanela.” Sisupo mwa litaba ze peli ze kaufela ki sa kuli mangeloi ao ni batu ba mwa Sodoma ne ba “ineezi ku eza buhule bo bu swabisa mi ne [ba] ndongwami litakazo za nama ze si za taho.” Mi taba ye swana ye fumaneha kwa 1 Pitrosi 3:19, 20 i bonisa kuli mangeloi ao naa si ka ipeya ku utwa sina mangeloi a mwa “mazazi a Nuwe.” (2 Pit. 2:4, 5) Kamukwaocwalo, ku sa ipeya ku utwa kwa naa bonisize mangeloi a mwa mazazi a Nuwe ku kona ku bapanywa kwa sibi se ne ba ezize batu ba mwa Sodoma ni Gomora.

Kamukwaocwalo, kwa utwahala luli ku bulela kuli “bana ba bashimani ba Mulimu” ba ba bulezwi kwa Genese 6:2, 4 ne li mangeloi a naa ipetuzi batu ili ao naa ezize somano ni basali.

 Bibele i bulela kuli Jesu “naa ile ku yo kutaza kwa mioya ye ne i li mwa tolongo.” (1 Pit. 3:19) Taba yeo i talusañi?

▪ Muapositola Pitrosi u talusa kuli mioya yeo ki yona “ye ne i si ka ipeya ku utwa ka nako yeo Mulimu naa libelezi ka pilu-telele mwa mazazi a Nuwe.” (1 Pit. 3:20) Pitrosi naa talusa mangeloi a naa iketezi ku swalisana ni Satani mwa ku kwenuhela Mulimu. Juda u talusa za mangeloi “a naa si ka buluka litulo za ona kono a siya libaka za ona ze swanela,” mi hape u li Mulimu “u a bulukile a tamilwe mwa mawenge a ku ya ku ile mwa lififi le linsu kuli a libelele katulo ya lizazi le lituna.”—Juda 6.

Ki mwa nzila ifi mo mangeloi ao naa si ka ipeya ku utwa mwa mazazi a Nuwe? Pili Muunda u si ka taha kale, mioya ye maswe yeo ne ipetuzi ku ba batu ili nto ya naa si ka lela Mulimu. (Gen. 6:2, 4) Ku zwa fo, mangeloi ao a naa ezize somano ni basali naa ezize nto ye si ya ka taho. Mulimu naa si ka bupa libupiwa za moya kuli li ezange somano ni basali. (Gen. 5:2) Mangeloi ao a maswe, ili a sa ipeyi ku utwa, a ka sinyiwa ka nako ye swanela ya Mulimu. Haili ka nako ya cwale, sina mwa taluseza Juda, mangeloi a maswe ao a mwa muinelo wa “lififi le linsu” ili ku talusa kuli a mwa tolongo ya kwa moya ka mubulelelo o muñwi.

Jesu naa kutalize cwañi kwa ‘mioya ye mwa tolongo’ mi ne li lili? Pitrosi u ñola kuli Jesu naa ezize cwalo ha sa zuhile kwa bafu. (1 Pit. 3:18, 19) Mu lemuhe kuli Pitrosi u bulela kuli Jesu “naa ile ku yo kutaza.” Mubulelelo wa Pitrosi wa kuli Jesu naa ile ku yo kutaza u bonisa kuli taba yeo ne i ezahezi pili Pitrosi a si ka ñola kale liñolo la hae la pili. Kamukwaocwalo, ku bonahala kuli ha se ku fitile nakonyana ku zwa fa naa zuselizwe kwa bafu, Jesu naa kutalize kwa mioya ye maswe ili ku talusa ka ku tala katulo ye swanela ye ka fiwa mioya yeo. Jesu naa si ka fa sepo ni ye kana kwa mioya yeo. Jesu naa kutaza za katulo ye ne i ka fiwa kwa mioya yeo. (Jona. 1:1, 2) Jesu ha sa bonisize tumelo ni busepahali bwa hae ku isa lifu ni ku zuswa kwa bafu ili ku bonisa kuli Diabulosi ha na maata fahalimwaa hae, naa kona ku lukuluha ku fa lushango lwa katulo kwa mioya yeo.—Joa. 14:30; 16:8-11.

Kwapili, Jesu u ka tama Satani ni mangeloi ao ni ku ba nepela mwa mukoti. (Luka 8:30, 31; Sin. 20:1-3) Kono pili nako yeo i si ka fita kale, mioya yeo ye sa ipeyi ku utwa i mwa muinelo wa lififi le linsu la kwa moya, mi ku si na ku kakanya mioya yeo i ka to yundiswa luli.—Sin. 20:7-10.