Ze Lu Ituta Ku Jesu

Ka za Mwaa Swanela ku Pilela Mabasi

Ba ba nyalani ba swanela ku nga cwañi linyalo kuli mabasi a bona a be a tabile?

Linyalo ki tamo ye kenile. Jesu ha naa buzizwe kuli telekano ya lumelelwa kamba cwañi, naa ize: “Ha mu si ka bala kuli Ya naa ba ezize kwa simuluho, naa ezize muuna ni musali? Mi a li: Kabakaleo, muuna u ka tuhela ndatahe ni mahe, a kumalele musalaa hae, mi ba babeli ikaba nama i liñwi feela. Kuli mane ha ba sa li ba babeli, kono ki nama i liñwi feela. Cwalehe, Mulimu saa kopanyize hamoho, mutu a si ke a si kauhanya. . . . Ya leleka musalaa hae, konji ka mulatu wa buhule, mi a nyala yo muñwi, wa buka.” (Mateu 19:4-6, 9) Batu ba ba nyalani ha ba mamela kelezo ye ya Jesu mi ba sepahala mwa linyalo la bona, bona ni bana ba bona ba ka pila mwa buiketo ni tabo.

Ki kabakalañi lilato la ku lata Mulimu ha li tahisa tabo mwa mabasi?

Jesu naa ize: “Lata Mulena Mulimu wa hao, ka pilu ya hao kaufela, ni ka moya wa hao kaufela, ni ka kutwisiso ya hao kaufela. O ki mulao o mutuna ni wa pili.” Mulao o mutuna wa bubeli ki ufi? Jesu naa ize: “Lata wahenu mo u itatela.” (Mateu 22:37-39) Batu ba bañwi be mu swanela ku lata ki be mu pila ni bona—ili lubasi lwa mina. Kacwalo kuli mabasi a luna a be a tabile, lu swanela ku ba ni bulikani bo bunde ni Mulimu, kakuli ku lata Mulimu ku lu susumeza ku latana.

 Baana ba kona ku tabisa cwañi basali ba bona, mi basali ba kona ku tabisa cwañi baana ba bona?

Baana ba tabisa basali ba bona ha ba latelela mutala wa Jesu. Jesu naa lata hahulu musalaa hae wa swanisezo, ili puteho ya Bakreste. (Maefese 5:25) Naa ize: “Mwanaa mutu ya si ka taha kuli a sebelezwe, kono ili ku sebeleza.” (Mateu 20:28) Jesu naa sa hatelelangi batu be ne ba babalelwa ki yena kamba ku ba eza ka lunya kono naa ba imululanga. (Mateu 11:28) Baana ni bona ba swanela ku itusisa maata a bona ka nzila ye musa ilikuli bote mwa lubasi ba tusehe.

Basali ni bona ba kona ku ituta se siñwi kwa mutala wa Jesu. Bibele i li: “Mulimu ki toho ya Kreste.” Hape i bulela kuli “muuna ki toho ya musali.” (1 Makorinte 11:3) Jesu naa si ka ikutwa kuli naa sa swaneli ku ipeya kwatasaa Mulimu. Naa kuteka hahulu Ndatahe. Jesu naa ize: “Kamita ni eza ze mu tabisa.” (Joani 8:29) Musali ya ipeya kwatasaa muunaa hae kabakala ku lata ni ku kuteka Mulimu u tusa kuli lubasi lwa hae lu be lo lu tabile.

Bashemi ba kona ku itutañi ku Jesu ka mwa naa ngela bana?

Jesu naa tolanga ni bana mi naa isanga pilu kwa mihupulo ni maikuto a bona. Bibele i li: “Jesu a ba biza, a li: Mu tuhele bana ba tahe ku na.” (Luka 18:15, 16) Zazi le liñwi, batu ne ba nyazize bana ba bañwi be ne ba bulezi ka za tumelo ya bona ku Jesu. Kono Jesu naa babalize bana bao mi a bulelela batu be ne ba ba nyaza, a li: “Ha mu si ka bala taba ye li: Ka milomo ya bana, ni ya ba ba anya, u fumani milumbeko ye petehile?”—Mateu 21:15, 16.

Bana ba kona ku itutañi ku Jesu?

Jesu naa tomezi bana mutala o munde o bonisa kuli ba swanela ku tabela za Mulimu. Ha naa li wa lilimo ze 12, naa fumanwi “mwa Tempele, a inzi fahalaa baluti, a ba teeleza, a ba buza.” Batu kaufela be ne ba mu teeleza ne ba ikutwile cwañi? “Ne ba tabiswa ki kutwisiso ya hae, ni likalabo” za hae. (Luka 2:42, 46, 47) Nihakulicwalo, Jesu naa si ka ikankabeka kabakala zibo ya naa na ni yona. Kono zibo yeo ne i mu tusize ku kuteka bashemi ba hae. Bibele i li: “Naa ikokobeza ku bona.”—Luka 2:51.

 Kuli mu zibe litaba ze ñata, mu bale kauhanyo 14 mwa buka ya Bibele I Lutañi Luli? *

[Litaluso za kwatasi]