Za na Lutile Jesu ka za Hae

“Jesu na si ka kakanya yo na li yena, kwa na zwile, libaka la na tezi mwa lifasi, ni za na bulukezwi kwapili.”—MUÑOLI HERBERT LOCKYER.

PILI lu si ka amuhela kale ni ku lumela lika za na lutile Jesu, lu tokwa ku ziba litaba ze ñwi ka za hae. Jesu na li mañi luli? Na zwa kai? Na lela ku ezañi mwa bupilo? Mwa Litaba za Evangeli za—Mateu, Mareka, Luka, ni Joani—lwa kona ku ikutwela likalabo inge kuli li zwelela ku yena Jesu ka sibili.

Na pilile a si ka pepwa kale fa lifasi Nako ye ñwi Jesu na bulezi kuli: “Abrahama a si ka ba teñi kale, ne ni nze ni li teñi.” (Joani 8:58) Abrahama na pilile lilimo ze batoo ba 2,000 kwamulaho pili Jesu a si ka pepwa kale. Niteñi, Jesu na pilile pili toho ya lusika ya sepahala yo a si ka ba teñi kale. Kono Jesu na pilile kai? Na talusize kuli: “Ni zwile kwa lihalimu.”—Joani 6:38.

Mwanaa Mulimu Jehova u na ni bana ba bañata ba mangeloi. Kono Jesu u ipitezi. Na ipulezi kuli ki “Mwanaa Mulimu, wa libanda.” (Joani 3:18) Pulelo yeo i talusa kuli Jesu ki yena a nosi feela ya na bupilwe ki Mulimu. Mulimu na ezize linto kamukana ka ku itusisa Mwana wa libanda.—Makolose 1:16.

“Mwanaa mutu” Jesu na itusisize hahulu pulelo ye ku fita ifi kamba ifi ili ku ama ku yena. (Mateu 8:20) Kacwalo na bonisize kuli na si lingeloi le ne li ipetuzi mutu. Kono na li mutu luli. Mulimu na itusisize moya wa hae o kenile ku shimbulula bupilo bwa Mwanaa hae ku zwa kwa lihalimu ni ku bu beya mwa mba ya mwalyanjo Maria. Kacwalo, Jesu na pepilwe inge a li mutu ya petehile, ya si na sibi.—Mateu 1:18; Luka 1:35; Joani 8:46.

Mesia ya na sepisizwe Musali wa Musamaria na bulelezi Jesu kuli: “Ni ziba kuli Mesia wa ta.” Jesu na alabile kuli: “Ki na yo, na, ya bulela ni wena.” (Joani 4:25, 26) Linzwi la “Mesia,” le li swana ni la “Kreste,” li talusa “Mutoziwa.” Jesu na tozizwe, kamba ku ketiwa ki Mulimu, kuli a pete musebezi o ipitezi mwa ku taleleza lisepiso za Mulimu.

Musebezi wa hae o mutuna Nako ye ñwi Jesu na bulezi kuli: “Ni swanezi ku yo bulelela ni minzi ye miñwi taba ye munati ya mubuso wa Mulimu; kakuli ki sona se ni lumezwi.” (Luka 4:43) Nihaike kuli na ezelize batu ba ne ba li mwa butokwi lika ze nde ze ñata, musebezi wa hae o mutuna mwa bupilo ne li ku kutaza Mubuso wa Mulimu. Za na lutile ka za Mubuso wo, li ka nyakisiswa hasamulaho.

Kaniti, Jesu ne si mutu-tu feela. * Sina mo lu ka bonela, bupilo bwa na pilile mwa lihalimu ne bu pakile hande za na bulezi ha na li fa lifasi. Ha lu swaneli ku komoka kuli na kutalize lushango lo ne lu ka ama batu ba bañata mwa lifasi kaufela.

[Litaluso za kwatasi]