Mihato ye 7 ye Kona ku mi Tusa ku Utwisisa ha mu Bala Bibele

Hatiso ya TIME MAGAZINE ne i bihile kuli, “Bibele ki buka ye lekiwanga hahulu nako kaufela, mi hape i lekiwanga hahulu silimo ni silimo ku fita buka ifi kamba ifi.”

“Nako ye ñwi na balanga Bibele, kono ya ni utwisanga buzwa.” —KEITH, MUOPELI YA TUMILE HAHULU WA KWA ENGLAND.

KWA KOMOKISA kuli batu ba bañata ba na ni Bibele kono ku bonahala kuli ha i ba tusi hahulu ha ba i bala. Kono ba bañwi ba itebuha ze ba balanga mwa Bibele. Ka mutala musali ya bizwa Nancy u talusa kuli: “Ku zwa fo ni kalela ku balanga Bibele ni ku yeya ze i bulela, ni ikutwanga kuli ni itukiselize ku talimana ni matata a kona ku taha mwahalaa lizazi. Ku balanga Bibele ku ni tusize hahulu ku fukuza kwa ku zwafa ko ni ikutwanga ka linako ze ñwi ku fita linzila kaufela ze ni likile ka lilimo ze 35.”

Nihaike kuli ha mu si ka bala kale Bibele, kana kwa mi tabisa ku ziba kuli ba bañwi ba tusizwe ki ku bala Bibele? Haiba mwa balanga Bibele, kana mwa tabela ku tusiwa hahulu ki yona? Haiba ku cwalo mu like ku sebelisa mihato ye 7 ye talusizwe mwa taba ye.

Muhato 1 Mu bale ka mulelo o munde

▪ Mwa kona ku bala Bibele sina feela buka ye nde kamba ka libaka la kuli mu ikutwa kuli mu tamehile ku i bala, kamba mwendi ka libaka la kuli mu ka fumana ketelelo mwa lifasi le la matata. Kono mu ka tusiwa hahulu haiba nji mulelo wa mina ki wa ku ituta niti ka za Mulimu. Hape mu ka ba ni limbuyoti haiba mulelo wa mina wa ku bala Bibele ki wa kuli mu bone mo lushango lwa yona lu kona ku mi tuseza mwa bupilo bwa mina.

Mañolo a bonisa libaka ha ku li kwa butokwa ku balanga Bibele ka mulelo o munde ka ku bapanya Bibele kwa siiponi kuli: “Mutu haa utwa Linzwi, a sa li ezi, u swana sina mutu ya  talima mwa siiponi pata ya hae yaa pepilwe ni yona; Mihe a mano ipona, wa ikela mi u libala kapili mwa inezi. Kono ya talimisisa mwa Mulao o petehile, ona Mulao wa tukuluho, mi a tiiseza mwateñi, isi muutwi feela ya libala, kono muezi ya eza musebezi, mutu yo u ka fuyaulwa ku zaa eza kaufela.”—Jakobo 1:23-25.

Mutu ya bulezwi mwa mutala wo, na talimile sifateho sa hae mwa siiponi kono na palezwi ku lukisa ponahalo ya hae. Mwendi naa kecuzi feela, kamba mwendi naa si na takazo ya ku eza licinceho ze ñwi. Kamukwaoswana, ha lu na ku tusiwa hahulu haiba lu balanga Bibele ka ku tula-tula kamba haiba lu sa utwisisi ze lu bala. Kono lu ka ba ni tabo haiba lu bala Bibele ka mulelo wa kuli lu be ‘baezi,’ ili ku tuhelela mubonelo wa Mulimu ku zamaisa mihupulo ni likezo za luna.

Muhato 2 Mu kete Bibele ye tolokilwe hande

▪ Mwendi mu na ni litoloko ze ñata za Bibele mwa puo ya mina ze mu kona ku keta ku zona. Nihaike kuli mwa kona ku tusiwa ki toloko ifi kamba ifi ya Linzwi la Mulimu, litoloko ze ñwi li itusisize manzwi a kale hahulu kamba a taata ku utwisiswa ki batu ba ba si ka ituta. (Likezo 4:13) Litoloko ze ñwi mane li cincize lushango luli lwa Bibele ka ku itinga fa lizo. Litoloko ze ñwi li yolisize libizo la Mulimu, lona la Jehova, ka malumbatina a cwale ka “Mulimu” kamba “Mulena.” Kacwalo ha mu keta toloko ya Bibele, mu kete ye tolokilwe ka ku nepahala ili ye bunolo ku utwisisa ni ye ka mi susueza ku zwelapili ku bala.

Buñata-ñata bwa batu mwa lifasi kaufela ba lemuhile kuli Bibele ya New World Translation i nepahezi mi i bunolo ku utwisisa mi i susueza mutu ku zwelapili ku i bala. * Mu nyakisise mutala wa muuna wa musupali wa kwa Bulgaria. Na fumanehile kwa mikopano ya Lipaki za Jehova mi na filwe Bibele ya New World Translation. Hamulaho na bulezi kuli, “Ni balile Bibele ka lilimo ze ñata, kono ha ni si ka bala kale toloko ye swana sina ye, ye bunolo ku utwisisa ili ye ni fitile kwa pilu.

Muhato 3 Mu lapelange

▪ Mwa kona ku utwisisa hahulu Bibele ha mu kupa tuso ku Musimululi wa yona, sina mwa na ezelize walisamu ya na bulezi kuli: “Tonisa meto a ka, kuli ni boniseze litaba ze komokisa ze mwa mulao wa hao.” (Samu 119:18) Mu lapelange ku Mulimu nako kaufela ha mu bala Mañolo, ili ku mu kupa kuli a mi tuse ku utwisisa Linzwi la hae. Hape mwa kona ku itumela ku yena kwa ku lu fa Bibele, kakuli kambe ha lu na yona ne lu si ke lwa ziba Mulimu.—Samu 119:62.

Kana Mulimu wa utwanga litapelo ze cwalo za ku kupa tuso? Ha mu nyakisise se ne si ezahezi kwa basizana ba babeli ili mutu ni munyanaa hae ba kwa Uruguay. Ne ba palezwi ku utwisisa ze i bulela Bibele kwa Daniele 2:44 mi ba lapela ku Mulimu kuli a lume mutu ku to ba tusa ku utwisisa liñolo le. Bibele ya basizana bao inge i sa apuzwi, Lipaki za Jehova ba babeli ba taha kwa ndu ya bona, ba to bala timana ye swana yeo ye ne ba lapelezi basizana bao, mi Lipaki bao ba bulela kuli timana ye i talusa kuli Mubuso wa Mulimu u ka to yola mibuso ya batu. * Basizana bao ne ba kozwi kuli Mulimu na alabile tapelo ya bona.

Muhato 4 Mu balange Bibele zazi ni zazi

▪ Batu ba bañata ba tabelanga feela ku bala Linzwi la Mulimu ha ba li mwa ziyezi. Ka mutala, muhatisi wa libuka yo muñwi naa bulezi kuli “batu ne ba kalile ku leka hahulu Libibele ze ñata” hamulaho wa sinyeho ye ne ezahezi mwa United States ka la September 11, 2001. Kono Bibele i lu susueza kuli lu no i balanga ka zazi ni zazi. I bulela kuli: “Buka ye ya mulao i si ke ya zwa mwa mulomo wa hao, kono u i nahane musihali ni busihu; kuli u tokomele ku eza se si ñozwi mwateñi kaufela. Ka ku eza cwalo u ka kondisa  nzila ya hao, mi zoo ka eza kaufela, u ka li kona.”—Joshua 1:8.

Butokwa bwa ku balanga Bibele ka zazi ni zazi bu kona ku bapanywa ku mutu ya kile a kula butuku bwa pilu ka sipundumukela ili ya ikatulela ku canga lico ze tusa mutu ku ba ni buikangulo bo bunde. Kana mutu yo na ka tusiwa ki katulo ya hae haiba na ka canga feela lico zeo ka nako ya utwa butuku mwa sifuba? Kutokwa. U swanela ku canga lico zeo zazi ni zazi kuli a kone ku tusiwa. Kamukwaoswana, ku balanga Bibele ka zazi ni zazi ku ka mi tusa ku ‘kondisa nzila ya mina.’

Muhato 5 Mu cinca-cincange mibalelo ya mina

▪ Ku kala ku bala Bibele kwa Genese ku isa kwa Sinulo ku kona ku ba nto ye nde, kono mwendi mibalelo ye miñwi ni yona ya kona ku ba ye tabisa. Ki ze liakalezo li sikai.

Mu balange ka za mutu a li muñwi mwa Bibele. Mu bale likauhanyo kamba libuka kaufela ze ambola ka za mulapeli wa Mulimu yo, sina mitala ye latelela:

• Josefa: Genese 37-50.

• Ruti: Ruti 1-3.

• Jesu: Mateu 1-28; Mareka 1-16; Luka 1-24; Joani 1-21. *

Mu Ise mamelelo kwa taba ye mu bala. Mu bale mañolo a lumelelana ni taba yeo. Ka mutala, mu eze patisiso fa taba ye ambola ka za tapelo, mi cwale mu bale kelezo ya Bibele ka za tapelo hamohocwalo ni ze ñwi kwa litapelo ze ñata ze ñozwi mwa Bibele. *

Mu balange ka ku tumusa. Mwa kona ku tusiwa hahulu ka ku balanga Bibele ka ku tumusa. (Sinulo 1:3) Mane mwa kona nihaiba ku bala sina lubasi ka ku tumusa, ku ikabelanga litimana kamba ku ikabela likalulo za batu ba ba mwa likande le li balwa. Ba bañwi ba ikolanga ku teeleza kwa tepu kamba CD ya Bibele. Musali yo muñwi na bulezi kuli, “Ne ku ni bezi taata ku kalisa ku balanga Bibele, kacwalo ne ni kalisize ka ku teelezanga kwa CD ya Bibele. Nako ye cwale ni boni kuli Bibele ya tabisa ku i bala ku fita buka ifi kamba ifi.”

Muhato 6 Mu yeyange

▪ Kabakala mipateho ni lika ze ñwi ze hakanyisa, ku taata hahulu ku yeya za bala mutu. Nihakulicwalo, sina feela lico ze lu ca ha li swanela ku lubiwa kuli li matafaze mubili wa luna, lu swanela ku yeyanga ze lu bala mwa Bibele kuli lu kone ku tusiwa. Lu eza cwalo ka ku lundulula ze lu bala ni ka ku ipuza lipuzo ze cwale ka ze: ‘Ki likamañi ze ni itutile ka za Jehova Mulimu? Litaba ze ni balile ze, li ni ama cwañi? Ni kona ku li sebelisa cwañi kuli ni tuse ba bañwi?’

Ku nahanisisa ko ku cwalo kwa tusanga kuli lushango lwa Bibele lu fite kwa pilu ya luna ni ku ekeza kwa tabo ya luna ye lu fumana mwa ku bala Linzwi la Mulimu. Samu 119:97 i bulela kuli: “Hasi mo ni latela mulao wa hao! Na u nahana musihali kaufela.” Ka ku yeya Linzwi la Mulimu, walisamu naa nahananga Mañolo musihali kaufela. Ku eza cwalo ne ku mu tusize ku lata hahulu za naa itutile.

Muhato 7 Mu kupe tuso kuli mu utwisise Bibele

▪ Mulimu ha libelelangi kuli lu kone ku utwisisa Linzwi la hae ka maata a luna. Nihaiba yona Bibele ka sibili i bulela kuli i na ni “litaba ze ñwi ze taata kwa ku li utwiseza.” (2 Pitrosi 3:16) Buka ya Likezo i bulela za muuna wa Muetopia ya na palelwa ku utwisisa kalulo ya Bibele ya na bala. Mulimu naa lumile yo muñwi wa batanga ba Hae ku yo mu tusa, mi se ne si zwile mwa ku eza cwalo ki sa kuli muuna yo wa Muetopia “a zwelapili mwa nzila ya hae, a tabile.”—Likezo 8:26-39.

Ni mina mwa kona ku tusiwa hahulu ki ku bala Bibele ha mu kupa tuso ya ku utwisisa ze mu bala. Mu zibise Lipaki za Jehova ba mwa sibaka se mu pila ku sona, kamba mu ñolele kwa keyala ye fa likepe 4 la magazini ye, ka za tuto ya Bibele ye sa lifelwi.

[Litaluso za kwatasi]