Ze Maswe Kaufela li ka Feliswa!

MULIMU u lu file linzwi la hae le li buyelezwi, ili le li talusa mabaka batu ha ba ezanga lika ze maswe. Hape u lu file tukuluho ya ku iketela ni buikoneli bwa ku ba ni buiswalo, ili ku lu tusa ku sa keta ku eza lika ze maswe. (Deuteronoma 30:15, 16, 19) Kacwalo, kabakala lika ze, ze lu filwe, lwa kona ku lemuha mikwa ye maswe ye lu kana lwa ba ni yona ni ku eza licinceho ze swanela. Haiba lu tokolomoha likezo ze maswe lu ka ba ni tabo mi lu ka tabisa batu ba bañwi be lu pila ni bona.—Samu 1:1.

Nihakulicwalo, ku si na taba ni kuli luna ka butu lwa ikataza ku hanyeza lika ze maswe, lifasi li zwelapili ku silafazwa ki likezo ze maswe ze ba ezanga batu ba bañwi. Bibele i lu lemusa kuli: “U zibe kuli, mwa mazazi a maungulelo, ku ka taha linako ze taata.”  Bibele i zwelapili ku bonisa ze bisa mazazi a maungulelo ku ba a “taata.” I bulela kuli: “Batu ba ka ba baitati, ba ba lata mali, ba ba itumbaeta ni ku ikuhumusa; ikaba banyefuli, ba ba sa utwi bashemi ba bona, ba ba si na buitumelo, ba ba hana za Mulimu; Ikaba batu ba ba si na lilato la taho, ba ba na ni ñole, ba ba seba batu ka buhata, ba ba sa koni ku iswala, ba ba na ni buhali, ba ba toya batu ba bande; Ikaba lishembi ni matanya, ni ba ba inuneka, ni ba ba lata minyaka, isi Mulimu; Ikaba batu ba ba eza mukwa wa bulumeli, kono se si eza mata a bulumeli ba si latuzi. U sabe kwa batu ba ba cwalo.”—2 Timotea 3:1-5.

Mwa manzwi a bupolofita a bonisizwe fahalimu, mwendi mu lemuhile pulelo ye li “mazazi a maungulelo.” Pulelo yeo i talusañi? Batu ba bañata ba utwisisa kuli “mazazi a maungulelo” a talusa kuli ku na ni nto ye tuha i fela. Nto yeo i kona ku ba ñi? Ha mu bone za sepisa Mulimu mwa Linzwi la hae.

Batu ba ba maswe ba ka yundiswa.

“Ku sa na ni nakonyana ye nyinyani, mi ya maswe haa sa na ku ba teñi; E, u ka bata sibaka sa hae, kono si se si ka ba siyo. Kono ba ba ishuwa ba ka luwa naha, ba ka ikola kozo ye tuna.”—SAMU 37:10, 11.

“Muñaa Bupilo u babalela kamukana ba ba mu lata, kono u ka yundisa ba ba maswe kaufela.”—SAMU 145:20.

Buhateleli ha bu sa na ku ba teñi.

“U ka lamulela mubotana ya itilelela ku yena, ni yena mukunyandela ya si na ya mu tusa. A ba liulule ku ba ba limba, ba ba ba nyandisa.”—SAMU 72:12, 14.

“Ze bupilwe li ka lukululwa kwa butanga bwa ku bola, kuli li fiwe tukuluho ya kanya ya bana ba Mulimu.”—MAROMA 8:21.

Batu ba ka fiwa lika kaufela ze ba tokwa kwa mubili.

“Ba ka ina, mutu ni mutu mwa kota ya hae ya veine ni mwa kota ya hae ya feiga, ku si na ya ba sabisa.”—MIKA 4:4.

“Ba ka yaha mandu, ba pile ku ona; ba cale likota za veine mi ba ce ze bewa ki zona. Ha ba na ku ikahela mandu mi ku pile ba sili mwateñi, kamba ku cala likota za veine mi li ciwe ki ba sili. Kakuli mazazi a ba sicaba sa ka, a ka likana ni mazazi a likota; mi baketiwa ba ka, ba ka ikola misebezi ya mazoho a bona nako ye telele.”—ISAYA 65:21, 22.

Katulo ye lukile i ka ba teñi.

“Mi Mulimu a si ke a atulela baketwa ba hae, ba ba huweleza ku Yena musihali ni busihu . . . ? “Na mi bulelela kuli u ka akufela ku ba atulela.”—LUKA 18:7, 8. 

“Muñaa Bupilo u lata ku atula ka mulao, mi haa tuheli ba hae ba ba kenile. Ba babalelwa ku ya ku ile.”—SAMU 37:28.

Buitati bu ka yoliwa ki ku luka.

‘Batu ba lifasi ba ka ituta ku luka.’ —ISAYA 26:9.

“Ka sepiso ya hae, lu talimezi lihalimu le linca, ni lifasi le linca, mo ku yahile ku luka.” —2 PITROSI 3:13.

Nihaiba Kacenu Batu ba Cinca Mipilelo ya Bona

Ku si na ku kakanya, kaufela luna lwa tabela lisepiso ze cwalo. Kono ki likamañi ze lu kolwisa kuli lisepiso ze li ka talelezwa? Mane, bupaki bwa kuli lisepiso za Mulimu li ka talelezwa  bu teñi ka yona nako ye. Ki bupaki mañi bo? Taba ya kuli buñata-ñata bwa batu mwa lifasi kacenu ba fumani tuso bakeñisa ku tuhela mikwa ya bona ya buitati, ku sa luka, kamba mifilifili mi ba itutile ku ba ni busepahali, kozo ni musa ki bupaki bwa kuli lisepiso za Mulimu li ka talelezwa. Kacenu, Lipaki za Jehova ba ba fitelela 7 milyoni, ba swalisani sina mizwale ba mwa lifasi kaufela mi ba zwelapili ku tula saluluti sa mubala, sa mushobo, sa mwahalaa macaba, sa bupolitiki, ni ku tokwa swalisano mwahalaa bafumi ni babotana, ili lika ze tahisize sitoyo se situna, mifilifili, ni lipulayano ku zwa feela kwamulaho. * Bakeñisa kuli miinelo ye cwalo ya ezahala ka nako ye, bo ki bupaki bo bu tiile bo bu lu kolwisa kuli lisepiso za Mulimu li ka talelezwa ka ku tala.

Kono ki likamañi ze tahisanga licinceho ze cwalo? Kalabo i fumaneha mwa sepiso ye ñwi kwa lisepiso za mwa Bibele, ze ñozwi ki mupolofita Isaya. Na ñozi kuli:

“Sitongwani si ka ina ni ngunyana, ngwe i bute ni mwanaa puli; namani ni mwanaa tau ni lisuhana li ka pila hamoho; mi mwana yo munyinyani u ka li soteza. . . . Tau i ka fula bucwañi sina komu. Mbututu ya anya u ka bapalela mwa musima wa sibili, mwana ya kwile a kenye lizoho mwa musima wa nyengo. Ha ku sa na ya ka holofaza kamba ku sinya fa lilundu la ka le li kenile; kakuli lifasi li ka tala zibo ya Muñaa Bupilo, sina mezi mwaa kwahelezi liwate.”—Isaya 11:6-9.

Kana bupolofita bo bu talusa feela nako yeo lifolofolo li ka pila mwa kozo ni batu? Kutokwa, ku na ni ze ñwi ze ñata ze amiwa. Mu lemuhe kuli kalulo ya mafelelezo ya bupolofita bo i bonisa se si tahisa cinceho yeo: “Lifasi li ka tala zibo ya Muñaa Bupilo.” Kana zibo ya Mulimu ya cinca mikwa ya  lifolofolo? Kutokwa. Kono zibo ya Mulimu ya cincanga mipilelo ya batu! Bupolofita bo, bu talusa kuli batu ili bao mwendi ne ba banga ni mikwa ya bufolofolo ne ba ka i tuhela ni ku bonisa butu bo bu swana ni bwa Kreste bakeñisa ku ituta ni ku sebelisa ze i luta Bibele.

Mu nyakisise mutala wa bo Pedro. * Ne ba lumela kuli se ne ba kenezi mwa kopano ya likelemi ze tahiseza batu ku pila mwa sabo ne li kuli ba felise sobozi. Hamulaho wa ku lutiwa, ba laelwa ku yo sinya munganda wa mapokola. Ha ne ba nze ba itukiseza ku yo sinya munganda wo, bo Pedro ba tamiwa. Bo Pedro ba tanda likweli ze 18 mwa tolongo mi ba zwelapili ku lela za ku yo sinya munganda wa mapokola. Ka nako yeo, basali ba bo Pedro ba kalisa ku ituta Bibele ni Lipaki za Jehova. Ha se ba zwile mwa tolongo, bo Pedro ni bona ba kalisa ku ituta Bibele, mi ze ne ba itutile ka za Jehova Mulimu ne li ba susuelize ku eza licinceho ze tuna ka mo ne ba ngela bupilo. Bo Pedro ba li, “Ni itumela ku Jehova kuli ha ni si ka bulaya mutu mwahalaa lilimo ze ne ni li sikelemi. Cwale ni itusisa lilumo la moya wa Mulimu, yona Bibele kwa ku taluseza batu lushango lwa kozo ni ku luka ili yona taba ye nde ya Mubuso wa Mulimu.” Bo Pedro mane ne ba izo potela sibaka sa mapokola se ne ba kile ba lela ku sinya ili ku yo  taluseza batu ba mwateñi lushango lwa kozo ni lwa lifasi le li si na mifilifili.

Licinceho ze ba kona ku eza batu bakeñisa ku susuezwa ki Linzwi la Mulimu li lu fa mabaka a mañwi a lu kolwisa kuli sepiso ya Mulimu ya kuli ze maswe kaufela li ka feliswa ki ya niti. Kaniti, batu ha ba na ku eza bumaswe ku ya ku ile kono ba ka ba batu ba ba nde. Jehova u tuha a yundisa musimululi wa bumaswe kaufela, yena Satani Diabulosi, ya sweli ku zamaisa lifasi. Bibele ili: “Lifasi kamukana li lapalezi mwatasaa ya maswe.” (1 Joani 5:19) Kono ona cwale-cwale fa, Satani u ka yundiswa. Ba bañwi hape ba ba ka yundiswa ki batu ba ba hana ku tuhela linzila za bona ze maswe. Bupilo bu ka tabisa luli ka nako yeo!

Mutu u tokwa ku ezañi kuli a to ikola bupilo bo? Mu hupule kuli ki “zibo ya Mulimu” ye tahisa kuli batu ba eze licinceho kacenu ni ye ka tahisa cinceho mwa lifasi kamukana ona cwale-cwale fa. Haiba mu ipumanela zibo ye nepahezi ya Bibele ni ku i sebelisa mwa bupilo bwa mina—sina mo ne ba ezelize bo Pedro—ni mina mwa kona ku sepa ku to pila mwa lifasi “mo ku yahile ku luka.” (2 Pitrosi 3:13) Kacwalo lu mi susueza ku itusisa nako ye siyezi kwa ku ituta za Mulimu ni Jesu Kreste, ili nto ye ka mi fumanisa bupilo bo bu sa feli.—Joani 17:3.

[Litaluso za kwatasi]

[Manzwi a fa likepe 9]

Ni mina mwa kona ku sepa ku to pila mwa lifasi “mo ku yahile ku luka.”—2 PITROSI 3:13