BIBELE YA CINCANGA BUPILO BWA BATU

“Ha ni sa ikutwa kuli naa swanela ku cinca lifasi”

Taba ye kandekilwe ki bo Jukka Sylgren

SILIMO SE NE BA PEPILWE: 1966

NAHA KO NE BA PEPEZWI: FINLAND

LITABA ZE EZAHEZI: MUYEMELI WA LISWANELO ZA BATU NI LIFOLOFOLO

BUPILO BWA KA BWA KWAMULAHO: Ku zwelela feela kwa bwanana bwa ka, ni lata hahulu lika ze bupilwe. Hañata, lubasi lwa luna ne lu ikolanga ku tama misipili ya ku ya mwa mishitu ni masa a bonahala hande a potolohile tolopo ya luna ya Jyväskylä, mwa Central Finland. Hape ni lata hahulu lifolofolo; ha ne ni sa li mwanana, ne ni batanga ku kumbata kaze kamba nja ye ne ni bona kaufela! Ha ne ni nze ni hula, ne ni kalile ku sa tabela mo ne ba nyandiseza batu lifolofolo. Hasamulaho, naa kala ku swalisana ni katengo ka ne ka talima za liswanelo za lifolofolo ili mo ne ni kopani ni batu ba ne ba na ni mubonelo o swana ni o ne ni na ni ona.

Ne lu lwanelanga ka taata liswanelo za lifolofolo. Ne lu hasanyize litaba kwa batu, ne lu onga-ongile batu kuli ba caulange ni ku yo bonisa bunyemi bwa bona kwa lintolo ko ne ku lekisezwa boya bwa lifolofolo ni kwa miyaho ko ne ku tatubelwa lifolofolo. Mane ne lu tomile katengo ka ka nca ka ne ka talima za ku babalela lifolofolo. Bakeñisa kuli ne lu ngile mihato ye mituna ya ku bata ku zwisezapili mubonelo wa luna, hañata ne lu lwaniswanga ki ba muuso. Ne ni tamilwe ni ku zekiswa hañata-ñata.

Kwandaa ku bilaezwa feela ki litaba za lifolofolo, ne ni bilaezwa ki lika ze ñwi hape ze ne ezahala mwa lifasi. Kwa mafelelezo, naa kala ku swalisana ni tutengo tu sikai, ku kopanyeleza cwalo ni katengo ka Amnesty International ni ka Greenpeace. Ne ni itusisize maata a ka kaufela ku yemela misebezi ye ne tu peta tutengo too. Ne ni lwanezi liswanelo za batu ba ba cwale ka babotana, batu ba ne ba shwa tala, ni batu ba bañwi ba ne na ni mayemo a kwatasi mwa bupilo.

Nihakulicwalo, hanyinyani-hanyinyani naa fita fa ku lemuha kuli ne ni si ke naa kona ku cinca lifasi. Nihaike kuli tutengo too, ne tu konile ku tatulula butata bo buñwi bo bu nyinyani, ne ku bonahala kuli butata bo butuna bona ne bu zwelapili ku hula. Ne ku swana feela inge kuli bumaswe ne bu yambalakani lifasi kaufela kono ne ku si na mutu ya naa isa pilu kwateñi. Ne ni zwafile hahulu.

 MO NE I CINCELIZE BUPILO BWA KA BIBELE: Bakeñisa ku ikutwa bumaswe bwa ku palelwa ku cinca lika mwa lifasi, naa kala ku nahana ka za Mulimu ni ka za Bibele. Sapili ne ni itutanga Bibele ni Lipaki za Jehova. Nihaike kuli ne ni itumelanga kwa sishemo ni pabalelo ye ne ba ni bonisanga Lipaki, ne ni si ka itukiseza kale ku cinca mupilelo wa ka. Kono cwale ne se ni cincize mubonelo wa ka.

Naa nga Bibele ya ka ni ku kala ku i bala. Ne ni omba-ombilwe hahulu ki yona. Ne ni balile litimana ze ñata za mwa Bibele ze bulela za ku bonisa sishemo kwa lifolofolo. Ka mutala, liñolo la Liproverbia 12:10 li bulela kuli: “Mutu yo munde u babalela limunanu za hae.” (Bibele ye Kenile, Hatiso ya 1984) Hape ne ni lemuhile kuli Mulimu haki yena ya tahisa butata mwa lifasi. Kono butata bo lu talimana ni bona mwa lifasi, bu ekezehile hahulu bakeñisa kuli batu ba bañata ha ba lateleli ketelelo ya Mulimu. Ne ni tabile hahulu ha ne ni itutile za lilato la Jehova ni za pilu-telele ya hae.—Samu 103:8-14.

Mwahalaa nako ona yeo, ne ni fumani pampili ye ne bonisa mwa ku kupela buka ya Bibele I Lutañi Luli? mi ne ni i talelelize ni ku i lumela. Hamulahonyana wa fo, naa potelwa ki mutu ni musalaa hae ba ba li Lipaki, mi naa lumela ku itutanga Bibele ni bona. Hape naa kala ku yanga kwa mikopano ya Sikreste, kwa Ndu ya Mubuso. Kabakaleo, naa kala ku lata hahulu litaba ze ne ni sweli ku ituta mwa Bibele.

Ne ni konile ku eza licinceho ze ñata mwa bupilo bwa ka, bakeñisa ku ituta Bibele. Ne ni tuhezi ku zuba kwai ni ku nwa hahulu bucwala. Ne ni tuhezi ku itusisanga lipulelo ze maswe mi naa kala ku ba ni ponahalo ye nde. Ne ni cincize mubonelo o ne ni naa ni ona kwa mubuso wa naha. (Maroma 13:1) Hape ne ni tuhezi mupilelo wa buitamaeli ili nto ye ne ni tabela hahulu ku eza mwa bupilo bwa ka.

Cinceho ye tuna ka ku fitisisa ye ne ni tokwa ku eza nee li ya ku ba ni mubonelo o lukile ka za tutengo to tu talima za liswanelo za batu ni lifolofolo. Ne ku fitile nako ye telele kuli ni kone ku cinca mubonelo wa ka. Kwa makalelo, ne ni ikutwile kuli ku tuhela ku swalisana ni tutengo too, ne i ka ba ku tu beteka. Kono ne ni itutile kuli, Mubuso wa Mulimu ki ona feela o ka kona ku cinca miinelo ya lifasi. Naa ikatulela ku itusisa maata a ka kaufela ku eza misebezi ye ama Mubuso wo ni ku tusa batu ba bañwi ku ituta ka za teñi.—Mateu 6:33.

MO NI TUSELIZWE: Ka ku ba muyemeli wa liswanelo za batu, ne ni nga batu ba bañwi kuli ba maswe, kono ba bañwi ne ni banga kuli ki ba bande, mi ne ni itukiselize ku lwanisa batu kaufela be ne ni nga kuli ba maswe. Nihakulicwalo, Bibele i ni tusize ku tuhela ku toya batu ba bañwi. Mwa sibaka sa ku toya batu ba bañwi, ni lika ka taata ku ba ni lilato la Sikreste kwa batu kaufela. (Mateu 5:44) Ni bonisanga lilato leo ka linzila ze ñata, mi nzila ye ñwi ki ka ku kutaza taba ye nde ya Mubuso wa Mulimu. Ni tabile hahulu ku bona ka mo musebezi o munde wo, u sweli ku tuseza batu ku ba ni kozo, tabo, ni sepo ya luli.

Cwale se ni ikutwa ku lukuluha bakeñisa kuli naa ziba kuli Jehova ki yena ya ka tatulula butata kaufela. Ni na ni sepo ya kuli ka ku ba Mubupi, Mulimu haa na ku tuhelela lifolofolo ni batu ku nyandiswa ku ya ku ile, mi haa na ku tuhelela kuli lifasi la luna le li nde li sinyiwe. Kono yena mane u tuha a itusisa Mubuso wa hae ku lukisa lika kaufela ze ba sinyize batu. (Isaya 11:1-9) Ni banga ni tabo ye tuna hahulu kakuli ni fitile fa ku ziba litaba za niti zeo ni kuli ni sweli ku tusa batu ba bañwi ku ba ni tumelo mwa litaba zeo. Ha ni sa ikutwa kuli naa swanela ku cinca lifasi.

[Manzwi a bañi ba siswaniso]

Animalia